Փաստ ինֆո

«Փաստինֆո»-ի եթերում բժիշկ-սեքսոլոգ Լուսինե Ստեփանյանն այսուհետ կքննարկի սեռական կյանքի և սեռական առողջության վերաբերյալ հարցերը: Հաղորդման շրջանակում բժիշկն առավել մանրամասն անդրադառնալու է հատկապես կանանց սեռական առողջության հարցերին:

Նախ հասկանանք, թե ինչ խնդիրներով է զբաղվում սեքսոլոգը և երբ պետք է դիմել մասնագետին:

Բժիշկ սեքսոլոգը զբաղվում է՝

նախաամուսնական խորհրդատվության և ընտանիքի պլանավորման հարցերով,

անպտղությամբ,

տարբեր տարիքային խմբերի տղամարդկանց և կանանց սեռական խանգարումներով,

սեռական աններդաշնակություններով

Որոնք են առավել հաճախ հանդիպող սեռական խանգարումները:

Կանանց մոտ առավել հաճախ հանդիպող սեռական խանգարումներն են ՝

լիբիդոյի՝ սեռական ցանկության նվազում կամ բացակայություն

սեքսուալ ավերսիա կամ սեռական զզվանք

գերակտիվ սեռական ցանկություն

լյուբրիկացիայի (հեշտոցի խոնավեցման) անբավարարություն կամ բացակայություն

օրգազմի կամ հեշտանքի խանգարում՝ անօրգազմիա կամ հիպոօրգազմիա

վագինիզմ

դիսպարեունիա՝ ցավոտ սեռական ակտ

կոիտոֆոբիա՝ վախ սեռական հարաբերությունից

Տղամարդկանց առավել հաճախ հանդիպող սեռական խանգարումներն են՝

սեռական ցանկության՝ լիբիդոյի նվազում կամ բացակայություն

էրեկցիայի խանգարում կամ էրեկցիոն դիսֆունկցիա

սերմնաժայթքման խանգարում՝ վաղաժամ սերմնաժայթքում, ուշացած սերմնաժայթքում, սերմնաժայթքման բացակայություն, ռետրոգրադ կամ հետընթաց

սերմնաժայթքում, ցավոտ սերմնաժայթքում:

«Սեռական ֆունկցիան զույգային ֆունկցիա է, հետևաբար զույգերից մեկի մոտ առաջացած սեռական խանգարումը զուգընկերոջ մոտ ևս կարող է խնդիրների առաջացման պատճառ դառնալ՝ ժամանակի ընթացքում բերելով ամուսնական աններդաշնակությունների և ամուսնալուծությունների», - նշել է բժշկուհին:

Նրա փոխանցմամբ` սեռական խանգարումները բազմապատճառային են, իսկ առաջացման գործում մեծ դեր ունեն` ընտանիքը, սեռական դաստիարակության տիպը, սեռականի վերաբերյալ ապատեղեկատվությունը, թերինֆորմացիան կամ ինֆորմացիայի լրիվ բացակայությունը և այլն:

«Կապված վիրտուալ կյանքի զարգացման հետ շատերի համար ինֆորմացիայի աղբյուր են համացանցի ոչ մասնագիտական և ոչ հավաստի նյութերը, որոնք, իհարկե, ավելի շատ վնասում են, քան օգնում են», - նշել է Լ.Ստեփանյանն ու ավելացրել. «գովելի է այն նպատակը, որ ցանկանում եք ավելին իմանալ և տեղեկացված լինել, սակայն կարևոր է որ ինֆորմացիան լինի մասնագիտական և միայն մասնագետների կողմից տրամադրված»:

Շատ կանայք տարիներով ապրում են սեռական կյանքով, սակայն վախենում, թաքցնում, կաշկանդվում են բարձրաձայնել առկա խնդիրները ՝ վնասելով իրենց սեռական առողջությունը:
Սեքսոլոգը խորհուրդ է տալիս` խնդիրները պետք չէ անտեսել, այլ ցանկալի է հնարավորինս վաղ դիմել մասնագետին, որպեսզի դրանք չարմատավորվեն:
Ձեզ հուզող հարցերով կարող եք դիմել բժիշկ-սեքսոլոգ Լուսինե Ստեփանյանին, որոնց կանդրադառանաք հաջորդ հաղորդումների ընթացքում:

Աղբյուր` Փաստինֆո