Փաստ ինֆո

«Այն, որ իշխանությունները բազմաթիվ կոպիտ սխալներ են անում, դա փաստ է եւ այն, ինչ տեղի ունեցավ Գավառում, իսկ ընդամենը մեկ օր առաջ Կապանում, այդ սխալներից մեկն էր, որը բնականաբար հանգեցնում է դժգոհությունների»,-«Փաստինֆո»-ի հետ զրույցում ասաց քաղաքագետ Գագիկ Համբարյանը՝ անդրադառնալով նախօրեին Սյունիքում ծավալված դեպքերին, երբ հասարակությունը արդարության պահանջով փողոց էր դուրս եկել:

Նախօրեին, հիշեցնենք, Կապանում քաղաքացիները ոստիկանության բաժնի առջեւ մինչեւ ուշ գիշեր բողոքի ակցիա էին իրականացնում՝ արդարության պահանջով: Իրավիճակը լարված էր: Կապանում նույն օրը բերման ենթարկված քաղաքացիների : Կապանի ոստիկանության բաժին բերման էր ենթարկվել Քաջարանի համայնքապետի չորս մերձավոր, որոնցից երեքը ձերբակալվել են։ Բերման ենթարկվածներից մեկը ավելի ուշ ազատ էր արձակվել: Պարզվել էր, որ Քաջարանի բնակիչ Նվեր Խաչատրյանը սխալմամբ է բերման ենթարկվել ոստիկանություն, նաև բռնության ենթարկվել։

Գագիկ Համբարյանի խոսքով, թեեւ խնդիրը լոկալ էր, բայց նման խնդիրները կաթիլ-կաթիլ լցնում են հասարակության համբերության բաժակը :

«Թեեւ Կապանում բողոքի ակցիան լոկալ բնույթի էր, սակայն Փաշինյանին ոչ ոք չի երաշխավորում , որ հասարակությունը երկար կնստի եւ կսպասի, թե ինչպես իր թիմը վայելում, իսկ ինքը, Փաշինյանի բառապաշարով ասած՝ թուլափայերով պետք է բավարարվի: Ոչ ոք չի երաշխավորում Փաշինյանին, որ լոկալ խնդիրների չլուծումն ու իր կառավարության բազմաթիվ բացթողումները ի վերջո հանգեցնելու են մասշտաբային պայթյունի»,-կարծում է քաղաքագետը՝ չբացառելով, որ տարբեր պատճառներով՝ արդարության պահանջից մինչեւ սոցիալական խնդիրներ, հասարակության տարբեր շերտերի շրջանում լարումներ կլինեն:

«Այն, որ իշխանությունների կոպիտ սխալների պատճառով իրավիճակը երկրում մերթընդմերթ լարվում է, դա փաստ է եւ դա, իհարկե, ավելացնում է հասարակության համբերության բաժակը»-ասաց քաղաքագետը՝ հավելելով. «Երեկ տեղի ունեցածը իշխանության կոպիտ սխալն էր, երբ իրենք մինչեւ վերջ հանրությանը չէին բացատրում, թե, նախ ինչի համար են ձերբակալվել այդ անձինք եւ երկրորդ՝ ի՞նչ է նշանակում ոստիկանությունում խոշտանգել մարդկանց: Մի բան, որ շատ վաղուց հասարակությունը մոռացել էր, վերջին տարիներին ես չեմ հիշում, որ որեւէ մեկին տանեն ոստիկանություն ու ծեծի ենթարկեն: Այդ մշակույթը վաղուց մոռացվել էր, բայց մենք տեսնում ենք, որ Սիսիանի ոստիկանապետն է մի ծեր մարդու ծեծում , Կապանում Քաջարանից բերման ենթարկված երիտասարդներին են ծեծում: Սա իհարկե, չի կարող հասարակության մոտ դժոհություն չառաջացնել»:

Քաղաքագետը շեշտում է՝ իշխանությանը ոչ միայն չի հաջողվում տեղական մակարդակով լուծել խնդիրները տեղերում , այլեւ իր գործողություններով գլոբալ խնդիրներ է ստեղծում: Մասնավորապես, ձախողելով կորոնավիրուսի դեմ պայքարը:

Աղբյուր` Փաստինֆո