Փաստ ինֆո

Կառավարության փոփոխության հրամայականի մասին ընդդիմադիր ուժերի հայտարարությունները կարող են նոր քաղաքական գործընթացների հանգեցնել։ «Փաստինֆո»-ի հետ զրույցում նման կարծիք է հայտնել քաղտեխնոլոգ Արմեն Բադալյանը։

Նշենք, որ հակաճգնաժամային կառավարության ձեւավորման անհրաժեշտության մասին վերջին շրջանում առավել հաճախակի են խոսում Ազգային անվտանգության նախկին տնօրեն Արթուր Վանեցյանը և Սուրբ Աթոռում ՀՀ նախկին դեսպան Միքայել Մինասյանը։ Քաղտեխնոլոգի գնահատմամբ՝ տվյալ պարագայում երկու գործիչների հայտարարություններն ուղղակի համընկել են և դրանցում որևէ միտում չկա։

«Քաղաքական ուժերը նպատակահարմար են գտնում իրենց գործունեության մասին հայտնել այն ժամանակ, երբ հայտնում են, ուստի տրամաբանական չէ Միքայել Մինասյանին և Արթուր Վանեցյանին կապել միմյանց հետ ու ասել, որ համագործակցված են աշխատում։ Մենք ծանոթ ենք ԱԱԾ նախկին տնօրենի հայտարարությանը Միքայել Մինասյանի մասին և այս պահին որևէ փաստ չկա, որպեսզի ասենք, որ Վանեցյանի հայտարարությունն իրականությանը չի համապատասխանում»,-ասաց քաղտեխնոլոգն ու շեշտեց, որ ԱԱԾ նախկին տնօրենն ընդհանրապես մերժել է նախկինների հետ կապն ու այժմ գաղտնիք չէ, որ իշխող քաղաքական ուժն ամեն կերպ փորձում է նրան նույնականացնել նախկինների այդ թվում Միքայել Մինասյանի հետ։

Շարունակելով խոսքը, Բադալյանն ասաց, որ Միքայել Մինասյանը ասոցացվում է ՀՀ երրորդ նախագահ Սերժ Սարգսյանի հետ, ոչ միայն նրա փեսան լինելու պատճառով, այլև Սարգսյանի պաշտոնավարման ընթացքում բավականին բարձր պաշտոն զբաղեցնելու համար. «Ուստի Միքայել Մինասյանը նույնպես պատասխանատվություն է կրում այն ամենի համար, ինչը մերժվեց 2018թ-ի ապրիլ-մայիս ամիսներին»։
Քաղտեխնոլոգը չբացառեց, որ ընդդիմադիր ուժերի կողմից արվող այս հայտարարությունները կարող են քաղաքական դաշտում նոր գործընթացների հանգեցնել։

«Այսօր Հայաստանում ոչինչ չի բացառվում, քանի որ այս վատթարացող իրավիճակը տեսանելի է ոչ միայն փորձագետների, ընդդիմադիր ուժերի, այլև իշխող քաղաքական ուժի համար, և նրանց մեջ էլ կան մարդիկ, որոնք նույնպես կցանկանային քաղաքական գործընթացներին մասնակցել և չկրել ստեղծված իրավիճակի պատասխանտվությունը»,-ասաց Բադալյանն ու շեշտեց, որ Ամերիկա չի հայտնաբերվում, երբ նշվում է, որ այս կառավարությունը պետք է հրաժաական տա, քանի որ աշխատանքի արդյունքները պարզ են և՛ արտաքին, և՛ ներքին քաղաքականության մեջ։

Հարցին, ինչու են քաղաքական ուժերը շեշտադրումը դնում հենց վարչապետի հրաժարականի և ոչ թե ամբողջ քաղաքական իշխանության փոփոխության անհրաժեշտության վրա, մեր զրուցակիցը պատասխանեց համեմատությամբ, որ որքան Փաշինյանը բարձր վարկանիշ ունի, այնքան «սոսինձն» ավելի ամուր է ու կարողանում է միասնական պահել ապաքաղաքական, ապագաղափարական սկզբունքներով միավորված «Իմ քայլը» խմբակցությունը. «Այս խմբակցությունում մարդիկ են, որոնք իրար հետ ընդհանրապես առնչություն չունեն։ Կան խմբեր, որոնք ունեն ընդհանրություններ, բայց կա մի մեծ ճահիճ՝ մոտ 50-60 հոգի, որոնք այնտեղ են, որովհետև իրականում Նիկոլ Փաշինյանը գրիչով գրել է նրանց անուն, ազգանունը։ Երբ անձնիշխան համակարգից անձին հեռացնում ես այդ համակարգն ամբողջովին փլուզվում է, քանի որ այն սպասարկում է մեկ մարդու շահերը։ Երբ այդ մեկ մարդը չկա, համակարգը կանգնում է կոլապսի առաջ ու փնտրում նոր տերեր։ Այս պատճառով է հիմնական թիրախը վարչապետը»։

Ամփոփելով խոսքը՝ Բադալյանն արձանագրեց, որ 2018թ-ի ապրիլ-մայիսյան իրադարձություններից հետո Հայստանում ձևավորվեց քաղաքական նոր համակարգ, իսկ մինչ այդ ձևավորված համակարգը քրեաօլիգարխիկ էր, որովհետև պետական կառավարման համակարգն ու ամեն բան սպասարկում էր քրեաօլիգարխիայի շահերը։

«2018թ-ից հետո այդ կոնտեքստում հեղափոխություն տեղի ունեցավ, քրեաօլիգարխիան իր տեղը զիջեց մեկ մարդու, և հիմա այդ ամբողջ ապարատը, իհարկե, բացառությամբ՝ ՍԴ-ի, որոշ ինստիտուտների, եկեղեցու և որոշ լրատվամիջոցների, անձնիշխան համակարգ է, այսինքն այդ ամբողջ համակարգը սպասարկում է մեկ անձի իշխանությանը, այդ մեկ անձն է ամեն ինչ որոշում, իսկ մյուսները ոչինչ չեն որոշում ու իրենցից ոչինչ չեն ներկայացնում, տեսակետներ չեն ունենում և ծափահարում են միայն կոնկրետ մեկ մարդու»,-ընդգծեց քաղտեխնոլոգը։

Հեղինակ՝ Սոնա Գեւորգյան

Աղբյուր` Փաստինֆո