Փաստ ինֆո

Ես էլ կասկած չունեմ, որ Միքայել Մինասյանը հաստատ տիրապետում է նմանատիպ նախկինում օգտագործված սխեմաների, բայց դա Հրաչ Հակոբյանի հետ որևէ կապ չի կարող ունենալ, որովհետև սկսած սիգարետի արտադրողներից կտեսնեք, թե ովքեր են։ Մարդիկ, որոնք կախված են նախկին իշխանությունների օլիգարխիկ թևի հետ։ ԱԺ ճեպազրույցների ժամանակ այս մասին ասաց ԱԺ «Իմ քայլը» խմբակցության պատգամավոր Անդրանիկ Քոչարյանը՝ անդրադառնալով ծխախոտի մաքսանենգությանը և դրա վերաբերյալ Վատիկանում ՀՀ նախկին դեսպան Միքայել Մինասյանի անդրադարձին։

Անդրանիկ Քոչարյանը նշեց, որ ազգային անվտանգության տեսանկյունից, եթե մաքսանենգ ապրանք է դուրս եկել, մաքսանենգությունը պետք է ֆիքսված լինի Հայաստանի մաքսային տարածքում և եթե մաքսանենգ ապրանքը հայտնվել է օտար պետությունում, ապա քրեական գործեր կհարուցվեն և կբացահայտվեն դեպքի հետ կապված բոլոր դրվագները. «Բայց եթե մաքսանենգ չի, այդ դեպքում լրիվ ուրիշ պատմություն է։ Ստացվում է, որ հատուկ նպատակով փորձ է արվում վարկաբեկել մեր գործընկերոջը և պարզվում է, որ միայն Հրաչ Հակոբյանը չէ, այլ Փաշինյանի ընտանիքի հետ առնչություն ունեցող բոլոր քաղաքական տիրույթում գտնված, և՛ Սիփան Փաշինյանի անունն է գրված, և՛ հանցագործ աշխարհի ինչ-որ մարդիկ են։ Ինչ ասես մտցնում են այդ պատրաստված նյութերի մեջ»,-ասաց պատգամավորը։

Նրա կարծիքով ուսումնասիրությունները պետք է գնան ամբողջության և լրիվության մեջ, որպեսզի այս թեման ոչ միայն բացահայտվի, այլև չշահարկվի վարկաբեկման այն տիրույթում, որի նպատակն է մաշեցնել իշխանության լեգիտիմությունը։

Հարցին՝ ինչ ընթացքի մեջ է այդ ուսումնասիրությունը, Անդրանիկ Քոչարյանն ասաց, որ ՌԴ-ում պետք է ընթացքն իրացվի և եթե դա իսկապես մաքսանենգ ապրանք է, այնտեղից պետք է տեղափոխվի Հայաստանի իրավական համակարգ, բայց Անդրանիկ Քոչարյանի խոսքով նման գործընթաց չեն տեսնում. «Դա կա՛մ սուտ տեղեկատվություն էր, որի նպատակը նշեցի որն էր, որովհետև առայժմ մեր իրավապահ մարմինները ՌԴ-ից չեն ստացել մաքսանենգ ապրանքի, բացի այն պատրաստված հոդվածները, որոնք դեռ կասկած են հարուցում, թե ինչքանով առնչություն ունեն իրավապահ համակարգի հետ»,-հավելեց Անդրանիկ Քոչարյանը։

Աղբյուր` Փաստինֆո