Փաստ ինֆո

«Մեր իշխանությունների մոտ գոյություն չունի ազգային անվտանգության վերաբերյալ պատկերացում, ցավոք նրանք կարծում են, որ Ազգային անվտանգության ծառայությունը մի հրեշ է, որը ամեն ինչ գիտի ու ամեն ինչ կարող է անել»,- «Փաստինֆո»-ի հետ զրույցում նման կարծիք հայտնեց Ազգային անվտանգություն կուսակցության նախագահ Գառնիկ Իսագուլյանը՝ անդրադառնալով այն գործընթացներին, որոնք տեղի են ունենում ուժային կառույցներում ու մասնավորապես ԱԱԾ-ում:

Հիշեցնենք, Նիկոլ Փաշինյանի քաղաքական որոշմամբ ԱԱԾ տնօրենի առաջին տեղակալ նշանակվեց համակարգի հետ կապ չունեցող 28-ամյա Արգիշտի Քյարամյանը, որին համակարգում տեղավորելու համար վարչապետը մեկ օրով ՔԿ գործուղեց: Այս նշանակումը դժգոհության ալիք բարձրացրեց ԱԱԾ-ում, որն ուղեկցվեց ոլորտի հնաբնակների հրաժարականներով ու չնայած ԱԱԾ-ի պաշտոնական հերքումներին՝ մեր տեղեկություններով համակարգի մի քանի տասնյակ աշխատակից իրենց պաշտոններից ազատման դիմումներ են ներկայացրել եւ ԱԱԾ տնօրենը փորձում է համոզել իր աշխատակիցներին հետ վերցնել դիմումները, որպեսզի համակարգը չկազմաքանդվի:

Ըստ Իսագուլյանի, իշխանությանը թվում է, թե երբ ինչ հանձնարարություն տրվի հատուկ ծառայություններին, պետք է կատարեն: «Օրինակ, ասացին Գառնիկ Իսագուլյանին կալանավորել , կառույցները պետք է իմանան, թե այդ պահին որտեղ է Իսագուլյանը, ինչ հանցանք է կատարել, եթե չի էլ կատարել, պետք է կարողանան իրեն մի հանցանք վերագրել ու կալանավորել: Հավատացեք, դա այդ կառույցը չէ եւ ով աշխատում է այդ համակարգում, տարիների ընթացքում հասկանում է, թե ինչ է կարելի, ինչ ոչ: Հիմա պարոն Քյարամյանն եկել է եւ պատկերացրեք, թե ինչեր է մտածել համակարգի մասին ու եկել է՝ առանց հասկանալու, որ իր իմացածն իրականության հետ կապ չունի: Նա ո՞նց է կարողանալու կառավարել այն հատվածը կառույցի, որը կվստահվի իրեն»,-հարցնում է Իսագուլյանը:

Մեր զրուցակցի խոսքով, վարչապետը անթաքույց հայտարարեց, որ իր նպատակը քաղաքական է, մինչդեռ չի կարող հատուկ ծառայության աշխատակիցը կամ ղեկավարը լինել քաղաքականության հետ առնչություն ունեցող անձնավորություն: Հատուկ ծառայություններում պետք է պրոֆեսիոնալներ լինեն, որոնք ծառայում են պետությանը եւ տվյալ պահի քաղաքական իշխանությանը, իսկ այս դեպքում, տեղի է ունեցել օրենքի կոպտագույն խախտում: « ԱԱԾ-ի մասին օրենքը հստակ նշում է այն սկզբունքներն ու չափանիշները, որոնց հիման վրա պետք է համալրվեն վերին էշելոնները: Ցավոք, սա արդեն 2-րդ անգամ է կրկնվում, երբ անձին, որը պրոֆեսիոնալ չէ եւ որին պետք է նշանակել, նախ այլ աշխատանքի են նշանակում, տալիս համապատասխան կոչում, ապա ձեւականորեն պահպանելով օրենքը, նշանակում են ոստիկանության կամ հատուկ ծառայությունների բարձր պաշտոնների: Ավելի ազնիվ կլիներ ուղղակի օրենքը չխախտել, կատարել օրենսդրական փոփոխություն»,-ասաց Իսագուլյանը:

Գառնիկ Իսագուլյանի խոսքով, եթե Նիկոլ Փաշինյանի նպատակն ԱԱԾ-ում «աչք ու ականջ» ունենալն է, նա դա կարող էր անել պրոֆեսիոնալի նշանակման միջոցով:

«Հավատացեք, եթե համակարգում երկար տարիների աշխատող չես, կարող են այնպես կարող են ֆռռացնել, որ ոչ մի բան չհասկանաս: Պատկերացրեք ուրիշ բան, պրոֆեսիոնալ աշխատողը, ավագ օպերը, վարչության, գլխավոր վարչության պետը, մարդիկ, որոնք երկար տարիներ աշխատել են՝ մտածելով, որ իրենց համար առաջխաղացում է լինելու, հիմա տեսնում են , որ հանկարծ դրսից ինչ-որ մեկին բերում են: Վիրավորական է: Պատկերացրեք, մարդուն, որը համակարգից չէ, եկել է գրությունը, որը նա պետք է մակագրի ինչ-որ մեկին, չգիտի ՝ ում պետք է մակագրի, պատկերացնո՞ւմ եք, հետախուզության հետ կապված տվյալը ուղարկեն այլ գլխավոր վարչություն, որտեղ այդ նամակն ընդհանրապես չպետք է գնար: Մինչեւ այդ մարդը գա, սովորի, թե ինչ բան է համակարգը…»:

Անդրադառնալով ԱԱԾ-ից հնարավոր արտահոսքին Գառնիկ Իսագուլյանն ասաց՝ քաղաքական ղեկավարությունը պետք է հասկանա՝ չի կարելի հատուկ ծառայություններին պատվիրել ինչ-որ բան, որովհետեւ նրանք իրենց գործառույթները լավ գիտեն:

«Այո, պրոֆեսիոնալների արտահոսք է լինում, հավատացեք, եւս մի քանի տարի եւ մենք հատուկ ծառայություն չենք ունենա: Չգիտեմ՝ ինքը ինչ պատվերներ է տվել Օրինակ, ասում են՝Գագիկ Խաչատրյանի որդուն կալանավորելու հարցը, հավատացեք, ԱԱԾ-ն չի կարող բոլոր մարդկանց նկատմամբ արտաքին դիտարկում կատարել կամ ի՞նչ գիտի, թե քննչական մարմինները վաղն ում են մեղադրելու, որ նրանց աչքի տակ պահի: Կրկնում եմ՝ ԱԱԾ-ի վերաբերյալ սխալ պատկերացում կա: Փորձ է արվում կառույցը ծառայեցնել քաղաքական իշխանության անձնական, խմբակային, կլանային նպատակներին»,-շեշտեց Գառնիկ Իսագուլյանը՝ հավելելով, որ ստեղծված իրավիճակի ողբերգությունը հենց սա է:

Աղբյուր` Փաստինֆո