Փաստ ինֆո

ՌԴ արտգործնախարար Սերգեյ Լավրովն իր հայտարարությամբ ցույց տվեց, որ Հայաստանի իշխանություններն այնքան էլ ազնիվ չեն հասարակության նկատմամբ։ «Փաստինֆո»-ի հետ զրույցում ասել է քաղտեխնոլոգ Արմեն Բադալյանը՝ անդրադառնալով Լավրովի աղմկահարույց հայտարարությանը։

Հիշեցնենք՝ նախարար Սերգեյ Լավրովը ապրիլի 21-ին հայտնել էր, որ բանակցային սեղանին մի փաստաթուղթ է, որը ենթադրում է ԼՂ հակամարտության կարգավորման փուլային տարբերակը: Նա խոսել էր նաև Եվրասիական տնտեսական միության անդամ երկրների համար գազի գնի իջեցման հարցի վերաբերյալ ու նշել, որ դաշնակիցները, իհարկե, պետք է տնտեսական առավելություններ ստանան. «Սակայն կան որոշակի պարտավորություններ՝ նախատեսված պայմանագրով»,- ասել էր Լավրովը։

ՀՀ վարչապետ Նիկոլ Փաշինյանն առայժմ չի արձագանքել Լավրովի հայտարարություններին, թեեւ, ինչպես նշեց քաղտեխնոլոգը, ամեն մի անիմաստ հարցի համար ժամերով ուղիղ եթեր է մտնում ու բացատրություններ է տալիս։ «Ինչպես տեսնում ենք, Լավրովի հայտարարության վերաբերյալ նա դեռևս ոչ մի բացատրություն չի տվել, ուղիղ եթեր չի մտել ու չի հայտարարել, որ Ռուսաստանի ԱԳՆ-ի ասածը չի համապատասխանում իրականությանը: Ուստի կարող ենք եզրակացնել, որ այն ինչ ասել է Լավրովը համապատասխանում է իրականությանը»,- «Փաստինֆո»-ի հետ զրույցում ասաց քաղտեխնոլոգ Արմեն Բադալյանը:

Քաղտեխնոլոգը շեշտեց, որ Սերգեյ Լավրովի առաջ քաշած երկու հարցն էլ (Արցախի և գազի գնի հարցերը) օգտագործվում են որպես ճնշում Հայաստանի իշխանությունների վրա:

«Արցախի հարցում Լավրովը ցույց տվեց, թե ինչ իրավիճակ է տիրում բանակցային գործընթացում, այդպիսով հայտնելով, որ Հայաստանի իշխանություններն այդքան էլ ազնիվ չեն հասարակության նկատմամբ, մի բան ասում են, բայց լրիվ այլ գործընթաց բանակցում են: Նույնը նաև ասվեց գազի հետ կապված՝ քանի որ ռուսական ձեռնարկությունների նկատմամբ այդպիսի ոչ դրական վերաբերմունք է դրսևորվում, ապա գազի հետ կապված խնդիրներ կլինեն»,-ասաց Բադալյանը:

ՀՀ արտգործնախարարությունն ի պատասխան Լավրովի հայտարարության նշել է, թե «Հայաստանի համար ընդունելի չեն դեռևս մինչև 2018թ. ներկայացված և ղարաբաղյան խաղաղ կարգավորման փուլային տարբերակ ենթադրող առաջարկները: Ավելին, 2018թ.-ից ի վեր Հայաստանը չի վարում բանակցություններ, որոնք հիմնված կլինեն փուլային կարգավորման վրա», նման շեշտադրումներով մեկնաբանություններով են հանդես եկել նաեւ իշխանական խմբակցությունը ներկայացնող պատգամավորները։ Քաղտեխնոլոգի գնահատմամբ՝ այնպես չէ, որ նշված հայտարարություններով Հայաստանի իշխանությունները հերքել են, թե փուլային տարբերակի փաստաթղթի առկայությունը։ Արտաքին գործերի նախարարությունը Լավրովի խոսքերը փորձեց հերքել, բայց այնպես հերքեց, որ ավելի շուտ դա նման էր չհերքելուն:

«Կարևոր չէ, թե պատգամավորներն ինչ են ասում, կարևոր է, թե վարչապետն ինչ պետք է ասի: Պատգամավորների մոտ դրսևորվում է իշխանություններին քծնելու իրենց ամենօրյա վարքագիծը, որովհետև իրենց թվում է, որ եթե արտաքին գործերի նախարարությունն ասել է, որ նման փաստաթուղթ չկա, ապա բոլորը պարտադիր պետք է ասեն, որ որևէ փաստաթուղթ գոյություն չունի: Սա կարող է լինել կամ վարչապետի կարգադրությամբ, կամ էլ ցանկանում են կրկնել արտգործնախարարի խոսքերն ու ներկայացնել, թե հերոսներ են, արծիվներ են, չեն խաբում: Նրանցից շատերն ամեն ինչի մասին իմանում են ամենավերջում»,-շեշտեց մեր զրուցակիցը:

Բադալյանի գնահատմամբ, իշխանություններն այս թեման մոռացության չեն կարող մատնել, որովհետև խոսքը հեռավոր գյուղի ջրամատակարարման հարցի մասին չէ, որը միայն այդ գյուղին բնակիչներին կհետաքրքրի ու մյուսները մոռանան այդ խնդրի մասին, խոսքը Արցախի հարցի մասին է, որն արդեն 30 տարի կապված է Հայաստանի հետ:

Հարցին, արդյոք Լավրովի այս հայտարարությունները վկայում են հայ-ռուսական հարաբերություններում առկա լարվածության մասին՝ բանախոսը պատասխանեց, որ ոչ մի երկրի հետ էլ Հայաստանի արտաքին հարաբերությունները հստակ չեն։ Ըստ նրա՝ 2018թ-ին իշխանության գլուխ եկած նոր ուժը պետք է ներկայացներ արտաքին քաղաքականության իր հայեցակարգը, որպեսզի նշվեր, թե ինչպիսին է Հայաստանի դերը լինելու տարիներ անց, ինչպիսին պետք է լինեն հայ-ռուսական հարաբերությունները, հայ-ամերիկյան հարաբերությունները, հայ-թուրքական, հայ-իրանական, հայ-վրացական և բազմաթիվ այլ երկրների հետ հարաբերությունները, սակայն ակներև է, որ արտաքին քաղաքականության հայեցակարգ որպես այդպիսին չկա:

«Եթե արտաքին քաղաքականության հայեցակարգ չկա, ապա, բնականաբար, չենք կարող ասել, թե ինչպիսին պետք է լինեն հայ-ռուսական հարաբերությունները: Դրանք այս պահի դրությամբ անորոշ իրավիճակում են, նման իրավիճակում են նաև Հայաստանի արտաքին հարաբերությունները բոլոր այլ երկրների հետ, այնպես չէ, որ հայ-ռուսական հարաբերություններում անորոշություն է, իսկ մյուս երկրների հետ հարաբերութուններում հստակեցում կա»,-ամփոփելով խոսքն ասաց քաղտեխնոլոգը:

Հեղինակ՝ Սոնա Գեւորգյան

Աղբյուր` Փաստինֆո