Փաստ ինֆո

Վարչապետ Նիկոլ Փաշինյանը նկատել է, որ իրեն լուրջ չեն ընդունում, թեեւ համաշխարհային հեղափոխություն է արել։ Դրանից նա կոմպլեքսավորվում է ու որոշեց ցույց տալ, որ ինքը ծաղրանքի ենթակա անձ չէ։ «Փաստինֆո»-ի հետ զրույցում ասաց քաղտեխնոլոգ Արմեն Բադալյանը՝ անդրադառնալով վարչապետի ապրիլի 19-ի ֆեյսբուքյան ուղիղ եթերին։

Հիշեցնենք, որ վարչապետն իրեն ուղղված քննադատությունների մասին՝ նշելով, թե այսօր հիասթափված են մարդիկ, ովքեր սպասում էին, որ «փայ» պետք է ստանան, չպիտի կորցնեն իրենց «փայը», ապա հայտարարել, որ պետական համակարգը Սերժի մնացորդներից պետք է մաքրվի ։

Վարչապետը նաեւ թիրախավորել էր լրատվամիջոցներին՝ նշելով. «Լրատվական դաշտն ինչպե՞ս ա կառավարվել: Լրատվամիջոցների 99%-ը և լրագրողների 70%-ը իշխանությունից կոնկրետ փող ա ստացել: Տենց ա կառավարվել: Հիմա չի ստանում էդ փողը, և ամբողջ լրատվական դաշտը կատաղած ա, որ իրանք փող էին ստանում, հիմա չեն ստանում»:

Քաղտեխնոլոգը կարծում է, որ այս պիտակավորումները ծաղրի պատասխանն են, քանի որ նկատել է, որ ուղերձի փորձերի կադրերում որոշակի ծաղրանք կա իր անձի նկատմամբ ու որոշել է ցույց տալ, որ ինքը ծաղրանքի ենթակա մարդ չէ, համաշխարհային հեղափոխություն է արել։ «Դրանից կոմպլեքսավորվում է ու սկսում է ավելի խիստ խոսել, այսինքն` ընդամենը այս կերպ հոգեբանության հետ կապված խնդիրներ էր լուծում»,-ասաց քաղտեխնոլոգը:

Բանախոսի կարծիքով՝ հանրության շրջանում նկատվող հիասթափության պատճառը, ըստ Փաշինյանի, ոչ թե իր վատ աշխատանքն է, այլ ուղղակի կան չար, չարակամ մարդիկ, որ «փայ» չեն ստացել, դրա համար մարդկանց գումար են տալիս, լրատվամիջոցներն էլ փողով հոդվածներ են տպում, ու այդպիսով արհեստականորեն հիասթափություն են ստեղծում՝ իր վարկանիշն իջեցնելու համար:

Նա շեշտեց, որ ՀՀ վարչապետ Նիկոլ Փաշինյանը կարծիքով (կամ էլ այդպես է ներկայացնում), ինքը գերազանց է աշխատում, անսխալական է, իր թիմն ամբողջովին լավն է, բայց չարակամներ կան, որոնք անընդհատ իր դեմ սաբոտաժ են անում, պատվիրված հոդվածներ են գրում:

«Այսինքն՝ ինքը պատկերացում ունի, որ լիովին ճիշտ է, իսկ մյուսները՝ սխալ են: Սա իր անսխալականության սինդրոմի մասին է խոսում»,-ասաց քաղտեխնոլոգը՝ նշելով, որ հայտնի ուղերձի տեխնիկական փորձերի կադրերի «արտահոսքից» հետո երեկվա ուղիղ եթերով Փաշինյանը փորձել է ցույց տալ, որ ինքն այդքան էլ ծաղրանքի ենթակա գործիչ չէ, իրականում շատ խիստ գործիչ է ու կարող է «սամասուդ անել», սակայն իրեն նման բան թույլ չի տալիս: «Ուղիղ եթերի միակ նպատակը հրապարակված կադրերի արդյունքում ստեղծված աղմուկը ծածկելն էր, և այս ուղիղ եթերը նախկինում հնչեցրած իր ելույթներից բովանդակությամբ ոչնչով չէր տարբերվում»:

Բադալյանը չի կարծում, որ այս մեթոդը կարող է ազդեցություն ունենալ հանրության վրա, քանի որ հեղափոխական էյֆորիան շատ վաղուց ավարտվել է Հայաստանում:

«Երբ անցյալ տարի Աբովյանի քաղաքապետի ընտրությունների ժամանակ՝ չնայած վարչապետի քարոզներին, հաղթեց Աբովյանի քաղաքապետը, որը մրցակից թեկնածուն էր, այդ ժամանակ արդեն իսկ հեղափոխական էյֆորիան ավարտվել էր: Իհարկե, դեռ մարդիկ կան, որ գնում են վարչապետի հետևից»,-ասաց քաղտեխնոլոգը:

Նա շեշտեց, որ այս կերպ Փաշինյանն իր կողմնակիցների մոտ ամրապնդում է իր կերպարը հատկապես «սամասուդ անել» կամ այլ նման բառերի օգտագործմամբ, քանի որ այս բառապաշարը «պողոսների» մի մասին դուր է գալիս:

«Պողոսների մոտ է որ ինքը վարկանիշ ունի, պողոսներից դուրս վարկանիշ չունի, իսկ երեկվա ելույթով ոչ ավելացավ ոչ էլ պակասեց իր վարկանիշը»,-ասաց Բադալյանը:

Հեղինակ՝ Սոնա Գեւորգյան

Աղբյուր` Փաստինֆո