Փաստ ինֆո

Շուրջ 486 հազար աբոնենտների փոխանցվել է իրենց գազի և էլեկտրաէներգիայի վճարները: Այս մասին մամուլի ասուլիսին ասել է ՀՀ վարչապետի օգնական Նաիրի Սարգսյանը:

Նրա խոսքով՝ քաղաքացիները հնարավոր է, որ տեղեկացված չլինենք, քանի որ չեն ծանուցվում: Սարգսյանը նշեց, որ քաղաքացիները կարող են իմանալ՝ տեսնելով իրենց հաշիվների քաղվածքները, փոխանցումները կատարված են;

«Նրանք, ովքեր արդեն վճարել էին իրենց սպառած էլեկտրաէներգիայի և գազի համար, աջակցության գումարը նստել է իրենց անձնական հաշիվների վրա՝ որպես կանխավճար հաջորդ ամիսների սպառման համար»,- ասաց Սարգսյանը:

Անդրադառնալով աջակցության 9-ր միջոցառմանը՝ Սարգսյանն ասաց, որ անձը կարող է մի քանի դիմում ներկայացնել կամ մեկ դիմումով ներկայացնել իր մի քանի երեխաների տվյալները: Սարգսյանը նաև տեղեկացրեց, որ այս պահին ծրագրավորողներն աշխատում են՝ համակարգը պարզեցնելու համար, որպեսզի քաղաքացիները ստիպված չլինեն ներկայացնել իրենց բոլոր երեխաների տվյալները, ծննդյան վկայականի համարները և հանրային ծառայության համարանիշը, որովհետև շատ են դեպքերը, երբ մուտքագրման ժամանակ քաղաքացիները սխալներ են անում:

«Հույս ունեմ մինչև շաբաթվա վերջ կունենանք նոր գործիքը և ծնողը կմուտքագրի միայն իր տվյալները և ինքնաշխատ եղանակով իր բոլոր երեխաների տվյալները կլրացվեն»,- ասաց Սարգսյանը:

Վարչապետի օգնականը նաև նշեց, որ շահառուների ցուցակները պարբերաբար հրապարակում են՝ Սոցիալական ապահովության ծառայության և ՀՀ աշխատանքի և սոցիալական հարցերի նախարարության կայքէջերում:

Նրա խոսքով՝ չեն լինում դեպքեր, երբ անձն աշխատելիս չլինի և համակարգը ցույց տա, որ աշխատանք ունի:

«Նմանատիպ դեպքերն ուսումնասիրել ենք և պարզել ենք, որ նշված ամսաթվերի դրությամբ նա եղել է աշխատող և ազատվել է աշխատանքից: Այդ ժամանակահատվածը ֆիքսվել է և նա չի կարողացել օգտվել 9-րդ ծրագրից»,- ասաց Սարգսյանը:

Հարցին, թե ինչու են քաղաքացիները և անհատ ձեռնարկատերերը դրամական աջակցությունը ստանում 68 հազար դրամից ցածր, Սարգսյանը պատասխանեց, որ բոլոր այն աշխատողները, որոնք աշխատել են ոչ լիարժեք դրույքով կամ աշխատել են միայն հունվար կամ փետրվար ամսին, հնարավոր է, որ նրանց գումարն ավելի ցածր լինի, քան նվազագույն ամսեկան աշխատավարձը:

«Հաշվարկի կարգը հետևյալն է՝ մենք տուժած ոլորտի վարձու աշխատողի հունվար և փետրվար ամիսների աշխատավարձը բաժանում ենք երկուսի և, եթե դա ավելի ցածր է, քան նվազագույն ամսեկան աշխատավարձըմ նա ստանում է այդ չափով աջակցություն: Շատ հնարավոր է, որ քաղաքացին աշխատանքի է անցել փետրվար ամսվա կեսին և աշխատավարձը եղել է 30.000 դրամի չափով, ապա աջակցությունը կլինի 45.000 դրամ, քանի որ կբաժանվի նաև հունվար ամսվա 0 դրամի հետ»,- ասաց Սարգսյանը:

Վերջինս նշեց, որ 8-րդ ծրագրի շրջանակներում 78783 քաղաքացու տրամադրվել է աջակցություն՝ 5 մլրդ 456 մլն դրամի չափով և այսօրվանից ծրագրում ավելացվել է նաև տուժող այլ ոլորտների ցանկերը, որոնք են՝ ցամաքային մարդատար տրանսպորտի ծառայությունը, սպորտի բնագավառում գործունեությունը, նախադպրոցական կրթությունը և զվարճությունների և հանգստի ծառայությունները: Նրա խոսքով՝ նշված 4 ոլորտներում ևս 8000 տնտեսվարող սուբյեկտների ցանկն ավելացվել է և այսօրվանից նրանք կարող են դիմել և ստանալ իրենց տրամադրվող աջակցությունը:

«Շատ տնտեսվարող սուբյեկտներ իրենց տնտեսական գործունեության դասակարգիչը սխալ են նշել, ինչի պատճառով չեն հայտնվել մեր տուժած ոլորտների ցանկում: Կոչ ենք անում ուղղել իրենց հարկային հաշվետվությունները»,- նշեց Սարգսյանը՝ հավելելով, որ ուղղումները կուսումնասիրվեն ՊԵԿ-ի կողմից և իրենց աշխատողները ևս կկարողանան օգտվել ծրագրերից:

Աղբյուր` Փաստինֆո