Փաստ ինֆո

Հոգեբան Կարինե Նալչաջյանի գնահատմամբ՝ հնարավոր է գա մի պահ, երբ մարդիկ կարող է այլևս  չդիմանան,  քանի որ, մենք այսօր ընդամենը տանը մնալու, ներսում փակված լինելու հետ չէ, որ գործ ունենք: «Արդեն իսկ մարդիկ կան, որ պոռթկում են, քանի որ  ապրուստի հարցեր  ունեն, շատերը  ծախսում են իրենց խնայողությունները, բայց մինչև ե՞րբ»,- «Փաստինֆո»-ի հետ զրույցում ասել է հոգեբանը:

Նրա խոսքով՝  մեզանում անորոշությունը շատ է, որից էլ տագնապ է առաջանում, տագնապի հոգեվիճակ: Մարդը չգիտի՝ ի՞նչ է իրեն սպասվում առաջիկայում և մոտ ապագայում, այսօր խանութում այսինչ բանը կա, վաղը՝ կարող է չլինել, մարդիկ արդեն ակնհայտ թանկացումներ են տեսնում, այսինքն,  նրանց տագնապները գնալով մեծանում են:

Կ. Նալչաջյանի համոզմամբ՝  «կորոնավիրուսի վարակի հետ կապված այս  չորս պատի մեջ փակվածության շրջանը երեխաների համար էլ շատ ծանր է, նրանք  իրենց կյանքի ակտիվ փուլում են,   դպրոցին զուգահեռ   զանազան՝ սպորտային, մշակութային  խմբակներ են գնում, իսկ հիմա  ՝ կանգնած է նաև նրանց կյանքը, որն իբրև մասնագետ ինձ հուզում է»:

Անդրադառնալով տարբեր մասնագետների՝ կորոնավիրուսի հաղթահարմանն ակտիվ և համատարած ներգրավվածությանը, Կ. Նալչաջյանը բժիշկներից հետո  մանկավարժների կատարած դերն է շեշտում ու  կարևորում. «Այս ընթացքում ամենահերոսական աշխատանքը որ անում են՝ բժիշկներից հետո, ըստ իս, մանկավարժներն են՝ դպրոցական և բուհական,  որ բավական մեծ   ծանրաբեռնվածության տակ են աշխատում,  նրանց մեծ մասը  նոր համակարգերի մեջ են մտնում, դրանց տիրապետում,   որպես բուհական կյանքն իմացող մարդ, ինքս եմ տեսնում՝ ինչ լարվածությամբ  են աշխատում դպրոցներն ու  բուհերը՝ ուսուցիչները, դասախոսները տանը նստած՝ ծրագրեր են յուրացնում, ինֆորմացիա  փոխանակում՝  միայն թե՝ ուսումնական, կրթական  պրոցեսը չկանգնի»:

Աղբյուր` Փաստինֆո