Փաստ ինֆո

Հայերենի ակադեմիական ուսուցումը մասնագիտական մակարդակում անհրաժեշտություն է։ Եթե պարտադիր բաղադրիչը հանվի, շատ կարճ ժամանակահատվածում լեզուն կօտարվի։ «Փաստինֆո»-ի հետ զրույցում այս կարծիքն արտահայտեց կրթության փորձագետ, Գավառի պետական համալսարանի դասախոս Արմինե Դավթյանը։

Վերջինս, անդրադառնալով բուհական ծրագրերում «Հայոց լեզու», «Հայ գրականություն» և «Հայոց պատմություն» առարկաները ոչ պարտադիր դարձնելուն, նկատեց, որ ուսանողն առաջին կուրսում պետք է տիրապետի հայերենին, այլ հարց է, թե ինչպես է այն դասավանդվում և մասնագետներն ինչպես են աշխատում բուհական ծրագրին համապատասխանեցնելու ուղղությամբ. «Երեխան դպրոցում չի անցնում ինժեներական հասկացությունների տերմինալոգիա, մանկավարժական, հոգեբանական, քիմիական տերմինալոգիաները երեխան չի կարող դպրոցում հայերենով յուրացնել այն մակարդակի, ինչ պետք է բուհում յուրացնի»,-ասաց փորձագետը։

Նրա կարծիքով ուսանողների բողոքը հիմնականում որակին է վերաբերում, ուրեմն բուհի խնդիրը պետք է լինի կարգավորել դասավանդման որակը, բարձրացնել հաղորդակցման որակը, զարգացնել հետազոտական լեզուն, ինչպես նաև ուսանողների մասնագիտական, թարգմանչական կարողությունները զարգացնելով՝ գրքերի թարգմանություններ իրականացնել։

Հարցին՝ արդյոք համաձայն է այն համեմատությանը, որ Օքսֆորդում էլ անգլերենը պարտադիր չէ, փորձագետը նկատեց՝ մենք չենք կարող համեմատվել այլ մշակույթների հետ. «Պետք չէ համեմատվել Անգլիայի, Ամերիկայի, Եվրոպայի հետ։ Օրինակ նույն Ամերիկան ազգ, մշակույթի պահպանության խնդիր չունի։ Եթե այդ խնդիրը հանենք մեր պետական քաղաքականության կոնտեքստից, որ մենք հայապահպանության խնդիր չունենք, դա ուրիշ բան։ Գլոբալիզացիայի մակարդակի մեջ ձուլվենք այլ ազգերի և ոչնչանանք։ Բայց եթե գնահատում ենք մեր ազգային ինքնությունը և ցանկանում ենք այն պահպանել և զարգացնել, ապա չենք կարող համեմատվել այդ երկրների հետ»,-նշեց փորձագետը՝ ընդգծելով, Անգլիան, Եվրոպան մեզ պարտադրում են անգլերեն սովորել միջազգային աշխատաշուկայում մեր տեղը զբաղեցնելու համար, մենք էլ, սակայն, պետք է ապահովենք մեր ներքին շուկան, որի համար լեզուն պետք է մասնագիտական որակ ապահովի։

Արմինե Դավթյանը հույս ունի, որ նախարարությունը նախագիծը քննարկման է դրել և հաշվի կառնի հանրության կարծիքները. «Որքանով տեղյակ եմ շատ բուհեր են ներկայացրել իրենց առաջարկները։ Գավառի պետական համալսարանում խորքային ուսումնասիրություն է արվել և ռեկտորը 50 կետով անհամաձայնություն է հայտնել։ Այստեղ արդեն հարց է՝ նախարարությունն ինչ դիրքորոշում է ընդունում այդ առաջարկներն ընդունելու կամ չընդունելու հարցում»,-հավելեց Արմինե Դավթյանը։

Արմինե Դավթյանը չկարողացավ ասել՝ Գավառի պետական համալսարանի ուսանողները կմիանան դասադուլին, թե ոչ, քանի որ նման խոսակցություն չի եղել, բայց ընդգծեց՝ եթե խնդիրը հասնի նրան, որ դա պարտադրանքի մակարդակով մատուցվի, գուցեև միանան. «Կարծում եմ մեկ այլ խնդիր էլ կա, որ շատերը չեն միանում։ Քանի որ դաշնակցությունն է կանգնած այս շարժման հիմքում, շատերը չեն միանում՝ չցանկանալով հնին հետադարձ հնարավորություն տալ և այս շարժումը վերածել քաղաքական պայքարի։ Հայապահպանության հարցում շատերն իսկապես խնդիրներ, խոչընդոտներ են տեսնում և խելամիտ մարդիկ ամեն դեպքում բարձրաձայնում են։ Եթե կրիտիկական կետի հասնի, գուցե շատերը միանան»,-նշեց Արմինե Դավթյանը՝ ընդգծելով, որ սա քաղաքական մասշտաբի խնդիր դարձնելը խոչընդոտ է հանդիսանում շատերի միացման համար։

Հեղինակ՝ Հասմիկ Կոշկարյան

Աղբյուր` Փաստինֆո