Փաստ ինֆո

ԱԺ «Իմ քայլը» խմբակցությունում տեղի ունեցող գործընթացների, Ամուլսարի խնդրի շուրջ տարակարծությունների մասին «Փաստինֆո»-ն զրուցել է «Իմ քայլը» խմբակցության պատգամավոր Նիկոլայ Բաղդասարյանի հետ։

-Պարոն Բաղդասարյան, համառորեն տեղեկություններ են շրջանառվում, որ Էդգար Առաքելյանը միակ պատգամավորը չէ, որը հրաժարվում է մանդատից։ Նաեւ Ձեր անունն է նշվում այն պատգամավորների շարքում, որոնք՝ հնարավոր է վայր դնեն մանդատը։

-Հայտնի գրողին, երբ հարցնում են, թե լուրեր կան, որ դուք մահացել եք, ի՞նչ կասեք այդ մասին, ասում է՝ լուրերը մի քիչ չափազանցված են։ Այլ պատասխան չունեմ։

- Այդուհանդերձ՝ «Իմ քայլը» խմբակցությունում վերջին շրջանում խմորումներ են. հատկապես Ամուլսարի հարցով տեսակետները բաժանվում են։

-Խմորումն ի՞նչ է, եթե դուք քննարկումները նկատի ունեք, ապա Ազգային ժողովը նրա համար է, որպեսզի մարդիկ ունենան տեսակետներ եւ այդ տեսակետները հայտնելու հնարավորություն ունենան, հակառակ դեպքում դա չէր լինի Ազգային ժողով։

-Ինչպիսի՞ն է Ձեր դիրքրոշումը Ամուլսարի հարցում։

-Ես այն անձանցից եմ, որը, եթե որեւէ հարցի վերաբերյալ մասնագիտական գիտելիքներ չունի, «բայց» չի ասում։ Ես դրա մասնագետը չեմ, մասնագետները տեսակետները հնչեցնում են,ես դրանք լսում եմ։ Ես որոշող մարմին էլ չեմ, ես լսում եմ մասնագետների կարծիքները եւ վարչապետի ելույթը , որը բավականին հետաքրքիր էր եւ այդ հարցով որեւէ օգտակար բան ասել չեմ կարող։

-Այդուհանդերձ, Ամուլսարը այն հարցն է, որը այսպես ասած թեւեր է առաջացրել խմբակցությունում, որոնք, ի դեպ, Փաշինյանը խոստացել էր կտրել։ Ի՞նչ միտում կա -«Իմ քայլը»-ում, հնարավո՞ր է խմբակցությունը պառակտվի։

-Այդ հարցով խմբակցության ղեկավարին դիմեք։ Պառակտում չի կարող լինել, հնարավոր է՝ տեսակետների բախում լինի, բայց խմբակցության հարցով տիկին Մակունցին դիմեք։

-Պարոն Բաղդասարյան, իշխող խմբակցությունում տեսակետները կիսվեցին նաեւ առողջապահության նախարար-բժիշկներ հակասությունների ընթացքում։ Դուք

Ձեր Ֆեյսբուքի էջում նախկին նախարար, ԵՊԲՀ ռեկտոր Արմեն Մուրադյանի լուսանկարը հրապարակեցիք՝ կից գրառմամբ .« ԵՊԲՀ ռեկտոր Արմեն Մուրադյանը նոր Հայաստանի լավագույն կադրերից մեկն է»։ Դա մեսի՞ջ էր Արսեն Թորոսյանին։

-Ես արդեն պատասխանեցի, որ ձեր հարցադրման մեջ առկա հարցերը իրականությանը չեն համապատասխանում։ Այդ թեմայով ես արդեն խոսել եմ, ավելացնելու բան չունեմ։ Այդ մարդու հետ ես տասնյակ լուսանկարներ ունեմ, ես այդ հարցին պատասխանել եմ։

Աղբյուր` Փաստինֆո