Փաստ ինֆո

«Տեսանյութում երևում է, թե ինչ քննչական գործողություն են կատարել, ընթերականերն ընդհանրապես այդ քննչական գործողությանը մոտիկ չեն եկել»,- Վարդան Պետրոսյանի գործով դատական այսօրվա նիստում հայտարարեց Վարդան Պետրոսյանի պաշտպան Նիկոլայ Բաղդասարյանը, ապա հավելեց. «Ընթերական արձանագրությունը քաղմասում է ստորագրել»:

«Դուք վկային տեսել ե՞ք այնտեղ»,- փաստաբանի հայտարարությանն արձագանքեց դատավոր Վաղինակ Մկրտչյանը և հավելեց. «Պաշտպանը վկայություն է տալիս«:

Ամեն ինչ սկսվեց այն բանից հետո, երբ Վարդան Պետրոսյանի նոր պաշտպանը՝ Սամվել Ջաղինյանը, դատարանում հարցրեց, թե արդյոք վկա Գրիգոր Գասպարյանը, ով, իր խոսքով, իր ավտոմեքենայով դեպքի վայր է հասել վթարից հետո և քննիչի առաջարկով ընթերակա է հանդես եկել քննչական գործողության ժամանակ, բջջային հեռախոս ունի: Դատարանն առարկեց հարցի դեմ՝ համարելով այն գործի հետ առնչություն չունեցող:

«Դուք չեք ուզում հայտնել, որպեսզի ամեն ինչ չբացահայտվի: Եթե մենք ունենանք հեռախոսի համարը, րոպե առ րոպե կարող ենք իմանալ, թե վկան այդ պահին որտեղ է գտնվել, դեպքի վայրում, թե քաղմասում»,- դիմելով դատավորին՝ հայտարարեց Նիկոլայ Բաղդասարյանը:

«Քրեական գործը ողողված է վկաների հարցաքննությունների արձանագրություններով, որտեղ բոլորի հեռախոսահամարները գրված են: Մի դեպքում, եթե անձնական տվյալները՝ հեռախոսի համարները, նշված են, և այստեղ որևէ անձնական բնույթի տվյալի հրապարակում տեղի չի ունենա: Մյուս կողմից, եթե վկան կարծում է, որ ինչ-որ կերպ վտանգվում է նրա անձնական տվյալների գաղտնիությունը, օրենքը նախատեսում է դռնփակ դատական նիստ հրավիրել և այդ տվյալը հրապարակել»,- պարզաբանեց փաստաբան Ջաղինյանը՝ հավելելով. «Այնպես որ, հարգելի դատարան, հարցը հանելու Ձեր գործողությունը գնահատում եմ կողմնակալ: Սահմանափակվում է պաշտպանական կողմի իրավունքը»: