Փաստ ինֆո

«Դեռեւս հունիսի 27-ին մենք միջնորդություն ենք ներկայացրել, որպեսզի պրն Քոչարյանի կալանավորումը փոխարինվի գրավով։ Կալանավորված յուրաքանչյուր ոք իրավունք ունի դիմել նման միջնորդությամբ, եւ դատարանը պիտի կիրառի գրավ, եթե չկան օրենքով նախատեսված արգելքներ։ Անցել է 24 օր, եւ դեռ մեր միջնորդությունը չի քննվել, այնինչ Քրեական դատավարության օրենսգրքի 102-րդ հոդվածի 2-րդ կետն ասում է, որ ներկայացված միջնորդությունները պետք է քննվել անմիջապես, դրանց ներկայացնելուց հետո»,- «Փաստինֆո»-ի հաղորդմամբ՝ այս մասին այսօրվա ասուլիսում հայտարարեց Ռոբերտ Քոչարյանի պաշտպան Հայկ Ալումյանը. «Այսինքն՝ օրենքն ասում է մի բան, պրն Քոչարյանի նկատմամբ իրականացվում է բոլորովին ուրիշ բան,եւ հասկանալի չէ. եթե մեր Քրդատն ասում է, որ պետք է քննվեն անմիջապես, այդ ի՞նչ օրենսգրքով է իրականացվում այս դատավարությունը, որ մեզ հայտնի չէ»,-ասաց նա։

Հայկ Ալումյանի խոսքով՝  ՀՔԾ-ն, ԱԱԾ-ն, Դատախազությունը լծված են մի գործի, այն է՝ հավաքել ապացույցներ եւ հիմքեր, որպեսզի Քոչարյանի մեղադրանքը հիմնավոր լինի եւ նա գտնվի կալանքի տակ. «Սակայն այդ դաշտում նրանք վաղուց արդեն տանուլ են տվել, բոլորի համար արդեն պարզ է, որ նրանց մոտ չստացվեց հիմնավորել պրն Քոչարյանի մեղադրանքը, եւ առավել եւս նրան կալանքի տակ պահելու անհրաժեշտությունը։ Եվ տանուլ տալով իրավական դաշտում՝ ՀՀ վարչապետի հետ միասին ստիպված եղան աննախադեպ ակցիա ձեռնարկել՝ փակելով դատարանների մուտքերը եւ ահաբեկել բոլոր դատավորներին»։

Ըստ Ալումյանի՝ այն, որ դատավոր Դավիթ Գրիգորյանի նկատմամբ իրականացվող այս գործողությունները կապված են պրն Քոչարյանի գործի հետ, որեւէ կասկած առաջացնել չի կարող. «Փետրվարին եղել է հաղորդում մի քաղաքացուց, այդ քաղաքացուց ստացել են բացատրություններ, նյութեր, հավանաբար հավաքել են նաեւ բոլոր նյութերը, որոնք այդ հաղորդման հետ կարող են առնչություն ունենալ, եւ այդքանից հետո որոշում է կայացվել քրեական գործի հարուցումը մերժել։ Դրանից հետո Գլխավոր դատախազությունում այդ որոշումը հաստատվել է։ Այդ ի՞նչ տեղի ունեցավ հիմա, Դատախազությանն անհայտ այդ ի՞նչ հանգամանքներ առաջ եկան, որ Դավիթ Գրիգորյանի կողմից պրն Քոչարյանին ազատ արձակեցին, հանկարծ քրեական գործ չհարուցելու մասին որոշումը վերացվեց, եւ փետրվարի հաղորդման հիման վրա Դավիթ Գրիգորյանի նկատմամբ քրեական հետապնդում սկսվեց»։

Պաշտպանի խոսքով՝ բոլոր իրավաբանները գիտեն, որ եթե որոշման բովանդակությունից հասկացվում է, որ անձը կասկածվում է որեւէ հանցագործության կատարման մեջ, ապա այդ պահից սկսած նա փաստացի մեղադրյալ է. «Եվ եթե անձի մոտ կատարվում են խուզարկություններ, որպեսզի փաստաթղթեր ի հայտ բերեն, այդ անձը էլի փաստացի մեղադրյալի կարգվիճակում է հայտնվում։ Եվրոպական կոնվենցիայի 6-րդ հոդվածի իմաստով՝ ինքը հենց համարվում է հանցագործության մեջ մեղադրվող անձ։ Իսկ Դատական օրենսգիրք սահմանադրական օրենքի 51-րդ հոդվածի մեջ ասված է, որ դատավորի նկատմամբ քրեական հետապնդում կարող է իրականացվել միայն ԲԴԽ-ի համաձայնությամբ, այսինքն՝ նախապես ունենալով ԲԴԽ-ի համաձայնությունը։ Դատախազության պարվաբանման մեջ ասվում է՝ մենք իրազեկեցինք ԲԴԽ-ին, այնինչ Դատախազությունը պարտավոր էր ստանալ ԲԴԽ-ի համաձայնությունը»։

Ըստ պաշտպանի՝ այս հարվածը՝ Դավիթ Գրիգորյանին, մեսիջ է բոլոր դատավորներին այն մասին, որ նրանք չհամարձակվեն Քոչարյանի գործով կայացնել որեւէ որոշում պրն Քոչարյանի օգտին, այլապես կհայտնվեն Դավիթ Գրիգորյանի իրավիճակում. «Այս ամենը ոչ միայն կապ ունի պրն Քոչարյանի վերաբերյալ գործի հետ, այ նաեւ ուղղակիորեն բխում է դրանից՝ իր բոլոր հետեւություններով»։

Ալումյանը նշեց, որ այն բանից հետո, երբ իրենք գործի նյութերի կրկնօրինակը ներկայացրին Դավիթ Գրիգորյանին, որպեսզի դա խոչընդոտ չլինի՝ իրենց միջնորդությունները քննելու համար, իրականացվեց  այդ խուզարկությունը, եւ նրա մոտից առգրավվեց ամեն ինչ, ինչ կապված էր Քոչարյանի գործին, այդ թվում եւ իրենց միջնորդությունները։

Ալումյանն ընդգծեց՝ հարձակում կա նաեւ Ս-Դի նկատմամբ. «Դա որոշ ժամանակ փորձ արվեց ներկայացնել որպես ժողովրդի կողմից ինքնաբուխ ցասում, զանազան մարդիկ եկան ՍԴ-ի մոտ, իրենց ցասումն արտահայտեցին, քաշքշեցին եւ վիրավորեցին ՍԴ դատավոր Ալվինա Գյուլումյանին։ Բայց ամեն ինչ,  որ այսօր տեղի է ունենում դատակա համակարգի շուրջ, պայմանավորված է մեկ գործով, եւ դա այդպես չպետք է լինի, մի գործից չպետք է կախված լինեն այդ բոլոր որոշումները»-ասաց պաշտպան Հայկ Ալումյանը։

Աղբյուր` Փաստինֆո