Փաստ ինֆո

ՀՀ վարչապետ Նիկոլ Փաշինյանի ցուցումով գործի հարուցումից հետո Մարդու իրավունքների պաշտպան Արման Թաթոյանը հայտարարել էր, որ վարչապետը գործ հարուցելու ցուցում տալու լիազորություն չունի.  «Քրեական  դատավարությանօրենսգիրքը սահմանում է, թե ով ինչ ցուցումներ կարող է տալ քրեական գործ հարուցելու համար,և դա ոչ թե վարչապետն է, այլ դատախազը»,-ասել էր ՄԻՊ-ը:

Նիկոլ Փաշինյանի ցուցումով քրեական գործ է հարուցվել իր մերձավոր ազգականի նկատմամբ

Սրան ի պատասխան՝ Նիկոլ Փաշինյանը նախ հայտարարեց, թե «Թող քրեական գործ հարուցեն և ինձ տանեն դատեն», ապա ժամեր անց ֆեյսբուքյան գրառմամբ փորձեց պարզաբանել իրավիճակը՝ նշելով, թե ամեն ինչ օրինական է. «Հարգելիներս, ես ցուցում եմ տվել ստացված օպերատիվ տեղեկությանը օրենքով նախատեսված ընթացք տալու մասին, ինչի արդյունքում հարուցվել է քրգործ: Ցուցումը տվել եմ վարչապետին ենթակա մարմնին: Ամեն ինչ կարգին է, ամեն ինչ օրինական է»:
 
Մեկնաբանության համար «Փաստինֆո»-ն դիմեց ՀՀ դատախազություն՝ ճշտելու, թե ի վերջո ով ունի լիազորություն գործ հարուցելու ցուցում տալու եւ ով՝ ոչ: Ի պատասխան մեր հարցին՝ Դատախազության հանրային կապերի բաժնի պետ Արեւիկ Խաչատրյանը տեղեկացրեց. «Քրեական գործ հարուցվում է ՀՀ քրեական դատավարության օրենսգրքով նախատեսված առիթների և հիմքերի առկայության դեպքում՝ դատախազի, քննիչի, հետաքննության մարմինների կողմից:

Քննչական կոմիտեն դեռեւս չի ստացել վարչապետի ցուցումով հարուցված քրգործը

Նույն ՀՀ քրեական դատավարության օրենսգիրքն սահմանում է քրեական դատավարության մասնակիցների շրջանակը, հստակեցնում քրեական վարույթի ընթացքում դատավարական ցուցում տալու իրավասությամբ օժտված սուբյեկտներին: Օրենսդիր և գործադիր իշխանության ղեկավար պաշտոնատար անձինք դրանց թվին չեն պատկանում»:

Խաչատրյանը միաժամանակ նշեց, որ ՀՀ վարչապետը իրավասու է տիրապետել ՀՀ վարչապետին ենթակա մարմնի, տվյալ դեպքում՝ Ազգային անվտանգության ծառայության կողմից ստացված առերևույթ հանցագործության մասին վկայող տվյալներին:
 
Նշենք, որ ՀՀ Սահմանադրության  6-րդ հոդվածը, որն ամրագրում է  օրինականության սկզբունքը, սահմանում է, որ «Պետական և տեղական ինքնակառավարման մարմիններն ու պաշտոնատար անձինք իրավասու են կատարելու միայն այնպիսի գործողություններ, որոնց համար լիազորված են Սահմանադրությամբ կամ օրենքներով»: Իսկ ինչպես ՄԻՊ-ի ու դատախազության արձագանքից է հետեւում` վարչապետը չունի քրգործ հարուցելու ցուցում տալու լիազորություն:

Աղբյուր` Փաստինֆո