Փաստ ինֆո

ՍԴ-ն կարճել է Վճռաբեկ դատարանի՝ լիազորությունները դադարեցված դատավոր Սուրեն Անտոնյանի դիմումի հիման վրա գործը։

Հիշեցնենք, որ դատավոր Սուրեն Անտոնյանի լիազորությունները ԲԴԽ-ն դադարեցրել է 2023թ հունվարի 26-ին՝ 2015թ․ կայացված ՄԻԵԴ վճռի հիման վրա՝ 15 տարի առաջ իբրև թույլ տրված ենթադրյալ խախտման համար։ Հատկանշական է, որ ԲԴԽ-ում հենց գործի քննության ընթացքում դատավորի ներկայացուցիչը բարձրաձայնել էր ՄԻԵԴ վճիռների հիման վրա դատավորների նկատմամբ վարույթների հարուցման, 15 տարվա վաղեմությամբ և անձի կարգավիճակը վատթարացնող կարգավորմանը հետադարձ ուժ տալու սահմանադրականության հարցը, այդուհանդերձ, ԲԴԽ-ն խնդիր չի տեսել և չի կասեցրել վարույթը։

Այժմ դատավորն իր խախտված իրավունքները վերականգնելու համար դիմել է ՄԻԵԴ, որտեղ նրա դ իմումը քննվում է առաջնահերթության կարգով, ինչպես նաև՝ ՍԴ ներկայացված դիմումով վիճարկում է ՄԻԵԴ վճիռների հիման վրա դատավորների նկատմամբ կարգապահական վարույթների հարուցման կարգավորումները։ Սուրեն Անտոնյանը, մասնավորապես, ՍԴ ներկայացված դիմումով խնդրում է՝ «ՀՀ դատական օրենսգիրք» Սահմանադրական օրենքի» 146-րդ հոդվածի 1-ին մասի 4-րդ կետը ինչպես ինքնին, այնպես էլ իրավակիրառ պրակտիկայում տրված մեկնաբանությամբ, ինչպես նաև «ՀՀ դատական օրենսգիրք» սահմանադրական օրենքի 142-րդ հոդվածի 1-ին մասի 1-ին կետը, 142-րդ հոդվածի 6-րդ մասի 1-ին կետը և 144-րդ հոդվածի 1.1-րդ մասը՝ իրավակիրառ պրակտիկայում տրված մեկնաբանությամբ, ճանաչել Սահմանադրության 5-րդ, 73-րդ և 79-րդ հոդվածներին հակասող և անվավեր»։ Դիմումի քննությունը տևական ժամանակ ձգձգվում էր, նախ՝ կասեցվել էր, ապա՝ փոփոխվել էր զեկուցող դատավորը, ինչպես նաև՝ քննության կարգը։ Մասնավորապես, ի սկզբանե զեկուցող էր նշանակվել Արթուր Վաղարշյանը, սակայն հետագայում որոշում է կայացվել զեկուցող նշանակել Էդգար Շաթիրյանին։

Երկարատև ձգձգումներից հետո, ի վերջո, ՍԴ-ն քննեց դիմումը՝ բանավոր ընթացակարգով, որի ընթացքում դատավորի ներկայացուցիչը՝ դռնբաց նիստում՝ ի ցույց դրեց բոլոր հիմնավորումներն առ այն, որ վիճարկվող դրույթը հակասահմանադրական է։ Այդուհանդերձ, ՍԴ-ն աշխատակարգային որոշմամբ՝ որոշեց կարճել վարույթը։

Հեղինակ՝ Իզաբել Սահակյան

Աղբյուր` Փաստինֆո