Փաստ ինֆո

Որպես քաղաքական գործչի և երկրի ղեկավարի հայտարարություններ` Փաշինյանի հայտարարությունները մեկ անգամ չէ, որ ցույց են տվել, որ առհասարակ ոչ դիվանագիտական էթիկայի հետ առնչություն ունեն, ոչ էլ պատասխանատվության զգացման հետ՝ բառի ամենուղիղ իմաստով, - «Փաստինֆո»-ի հետ զրույցում արձանագրեց քաղաքագետ Արա Պողոսյանը։

Հիշեցնենք, որ Նիկոլ Փաշինյանը մայիսի 22-ին ԱԺ ամբիոնից հայտարարեց, թե 44- օրյա պատերազմի ժամանակ ՀԱՊԿ անդամ երկրներից առնվազն երկուսը իմիտացիա են արել, որ մեզ են աջակցել, բայց ակնհայտորեն Ադրբեջանին են օգնել մեր դեմ պատերազմ նախապատրաստելուն։

Այս հայտարարությանը բավական արագ արձագանքել էր ՌԴ ԱԳՆ խոսնակ Մարիա Զախարովան՝ նշելով, որ անուններ հնչեցնելը տրամաբանական կլինի, եթե խոսքը նման լուրջ հայտարարությունների մասին է, սակայն Նիկոլ Փաշինյանի խոսնակը հայտարարել է, որ Փաշինյանի խոսքերին ոչինչ չունի ավելացնելու։ Իսկ այսօր էլ՝ մայիսի 24-ին, հայտնի դարձավ, որ ՌԴ-ն Մոսկվա է կանչել Հայաստանում իր դեսպանին՝ խորհրդակցությունների համար։

Քաղաքագետ Արա Պողոսյանի կարծիքով՝ գործ ունենք պատասխանատվությունից փախչող, անպատասխանատու հայտարարությաններ անող մարդու հետ, որի արդյունքը միջազգային հարաբերություններում ՀՀ համար սկանդալների կենտրոնում հայտնվելն է։ Ինչ վերաբերում է իր ակնարկներին,ապա դրանք ակնհայտ է, թե որ պետություններին են ուղղված։

«Ինքը, որպես երկրի ղեկավար, նախ պետք է ունենա պատասխանատովություն, պետք է իմանա երբ և ինչ հայտարարություններ կարելի է անել։ Լինելով ՀԱՊԿ անդամ պետություն՝ նախ պարտավոր էր այդ հարաբերությունները պարզել կազմակերպության ներսում , երբ դա հնարավոր չլիներ, ապա միայն դրանից հետո խոսեր բացահայտ, հրապարակային, պայմանական ասված, դիվանագիտական կրակոցների լեզվով։ Ինչը, ցավոք սրտի, մենք տեսնում ենք, որ ոչ միայն չի արվում, այլև փորձում է նման վարկաբեկող հայտարարություններով ցույց տալ, թե դիրքավոված է հակառուսականության դաշտում և միևնույն ժամանակ ցույց է տալիս իբրև թե որպես Հայասատանի ներկայացուցիչ համաձայն չէ այն քաղաքականության հետ, որը վարվում է ՀԱՊԿ կողմից»,- նշել է քաղաքագետը։

Մեր զրուցակցի արձանագրմամբ, ակնհայտ է, որ ՀԱՊԿ անդամ պետությունների միջև չկան ընդհանուր շահեր, ինչի մասին ինքը եւս բազմիցս խոսել է, բայց մի բան է, երբ սրա մասին խոսվում է մասնագիտական դաշտում, մեկ այլ բան, երբ խոսվում է երկրի պետության ղեկավարի շուրթերով , այն էլ՝ առանց պատասխանատվության գիտակցման, առանց հաշվի առնելու դրա դիվանագիտական հետևանքները։

Ա.Պողոսյանի կարծիքով՝ Ադրբեջանի հետ հարաբերությունները ՀԱՊԿ անդամ- պետությունների միջև նաև ՀՀ արտաքին քաղաքականության հետևանք են եղել ու շարունակում են լինել, երբ Ադրբեջանը կարողանում է և ի վիճակի է Հայաստանի դաշնակիցների հետ շատ ավելի ջերմ հարաբերություններ ունենալ։

«Սրանք փոխշաղկապված գործընթացներ են , որոնք երկրի ղեկավարն առնվազն պետք է հասկանա և առնվազն այդ հայտարարության մեջ կոնկրետ իր դերը տեսներ։ Տեսներ, թե որն է Հայաստանի Հանրապետության բացթողումը, դիվանագիտական սխալը, որի հետևանքով Հայասատանի դաշնակիցները կարող են ենթադրելիորեն ավելի ջերմ լինել այն պետության հետ, որը դաշնակցի թշնամի պետությունն է։ Ինչ վերաբերում է պատերազմի ժամանակ Ադրբեջանի օգտին մասնակցությանը, ապա այստեղ ամեն ինչ պետք է չափազանց հիմնավորված լինի, երբ դա բացահայտ երկրի ղեկավարի շուրթերից հնչող հայտարարություն է , ուղղակի մասնակցության մասին ես չգիտեմ, արդյո՞ք նման տվյալ կա։Եթե չկա , ակնհայտ է, որ սա մանիպուլատիվ խառնակաչկան հայտարարություն է», - ասաց քաղաքագետը։

Աղբյուր` Փաստինֆո