Փաստ ինֆո

Ազգային ժողովի ՀՀԿ խմբակցության պատգամավոր, պաշտպանության և անվտանգության հարցերի մշտական հանձնաժողովի նախագահ Կորյուն Նահապետյանը անհանգստացնող է համարում Արցախում տեղի ունեցող իրադարձությունները:

«Ես հույս ունեմ, որ կլինի այնպիսի լուծում, որը կբխի Արցախի ժողովրդի անվտանգության շահերից, որը կարծում եմ՝ չափազանց կարևոր է»,- «Արմենպրես»-ի փոխանցմամբ՝ խորհրդարանում լրագրողների հետ զրույցում ասաց Նահապետյանը:

Հարցին՝ ինչի՞ արդյունք է Արցախում հասունացած բողոքը, Նահապետյանը պատասխանեց. «Որքանով տեղյակ եմ՝ բողոքն առաջացել է կոնկրետ միջադեպի հետ կապված, և այդ միջադեպի մասով որոշակի արձագանքներ են եղել: Հուսանք, որ իրականում կունենանք այնպիսի կարգավորում, որը որևէ վտանգ չի ստեղծի Արցախի ժողովրդի և պետության անվտանգության համար»,- ասաց պատգամավորը:

Հարցին՝ Արցախում բողոքի ելած քաղաքացիները պահանջում են ուժային կառույցների հրաժարականը, որքանո՞վ դա կարող է սպառնալ Արցախի անվտանգությանը, Նահապետյանը պատասխանեց. «Կարծում եմ, որ կարող է ստեղծվել»,- ասաց նա:

Անդրադառնալով հարցին, թե որո՞նք են ռիսկերը, որ կարող են անվտանգության համար սպառնալիք ստեղծել, պատգամավորը պատասխանեց, որ հիմնական ռիսկն անկայունությունն է, որից օգտվելու հնարավորություն կարող է ունենալ Ադրբեջանը:

Նահապետյանը նաև կարծիք հայտնեց, որ Արցախում ստեղծված իրավիճակին որոշակի գնահատականներ պետք է հնչեն նաև Հայաստանի իշխանությունների կողմից:

Ոստիկանության Ստեփանակերտի քաղաքային վարչության հերթապահ մաս հունիսի 1-ին ժամը 19:25-ին ահազանգ է ստացվել այն մասին, որ Ստեփանակերտ քաղաքի Բաղրամյան 2բ շենքի դիմաց վիճաբանություն է տեղի ունենում: Դեպքի վայր մեկնած օպերատիվ խումբը պարզել է, որ նույն օրը ժամը 19:15-ի սահմաններում նշված վայրում վիճաբանություն է առաջացել մի կողմից նույն քաղաքի բնակիչներ՝ 1981թ. ծնված Դ. Հ-ի, 1983թ. ծնված Ա.Ա-ի, իսկ մյուս կողմից 1985թ. ծնված Մ.Մ-ի (ԱԱԾ ծառայող) միջև, որի ընթացքում կողմերը փոխադարձ հարվածներ են հասցրել միմյանց՝ պատճառելով մարմնական վնասվածքներ: ԱՀ ոստիկանության ՔՀՎ ծառայողների հետ համատեղ ձեռնարկված միջոցառումներով, վիճաբանությանը մասնակցելու կասկածանքով, ոստիկանության Ստեփանակերտի քաղաքային վարչություն բերման է ենթարկվել 15 քաղաքացի:

Նշանակվել է դատաբժշկական փորձաքննություն: Նախապատրաստվում են նյութեր ԱՀ գլխավոր դատախազության հատուկ քննչական բաժին ուղարկելու համար: Արցախի Հանրապետության Նախագահ Բակո Սահակյանը հունիսի 2-ին ընդունել է Ստեփանակերտում ընթացող բողոքի ակցիայի մի խումբ ներկայացուցիչների։ Քննարկվել են նախօրեին մայրաքաղաքում տեղի ունեցած միջադեպին վերաբերող մի շարք հարցեր։ Երկրի ղեկավարը ներկաներին հավաստիացրել է, որ իրականացվելու է մանրակրկիտ ու անաչառ հետաքննություն, եւ մեղավորները պատասխանատվություն են կրելու օրենքով սահմանված կարգով։ Արցախի Հանրապետության Ազգային ժողովում ստեղծվել է հանրային հնչեղություն ստացած հարցերի ուսումնասիրման քննիչ հանձնաժողով։

Աղբյուր` Փաստինֆո