Փաստ ինֆո

Փաստաբան Գայանե Գալոյանը իրեն առաջադրված մեղադրանքի վերաբերյալ դիրքորոշումը չի փոխել, մեղադրանքը չի ընդունում, ավելին, կարծում է, որ մեղադրանքն առնչվում է այլ հանգամանքների հետ:

Այդ մասին «Փաստինֆո»-ի թղթակցի հետ զրույցում ասաց նրա պաշտպան Մնացական Ղազարյանը, չմանրամասնելով, թե ինչ հանգամանքներ նկատի ունի իր պաշտպանյալը:
Միևնույն ժամանակ պաշտպանը նաև ասաց, որ Գալոյանը ցուցմունք չի տվել և հրաժարվում է ցուցմունք տալուց:

Մեր այն հարցին, թե օրերս նախապատրաստվում էր փաստաբանի մասնակցությամբ քննչական գործողություն իրականացնել՝ իրականացվե՞լ է, պաշտպանը հայտնեց, որ դեռ չի իրականացվել, սակայն նախատեսվում էր առերեսում կատարել:

Հիշեցնենք, որ Գայանե Գալոյանը կալանավորվել է Հատուկ քննչական ծառայությունում քննվող կաշառքի գործի շրջանակներում և մինչև կալանավորման որոշումը, ըստ պաշտպանի, Գալոյանի ինքնազգացողությունը վատացել է, դատարան է հրավիրվել շտապօգնություն և դեղորայքի միջոցով փորձ է արվել բարձր զարկերակային ճնշումը կարգավորել, սակայն նա հոսպիտալացվել է շաքարախտի պատճառով և գտնվում էր Երևանի հիվանդանոցներից մեկի ինտենսիվ թերապիայի բաժանմունքում:

Գայանե Գալոյանին մեղադրանք է առաջադրվել ՀՀ քրեական օրենսգրքի 38-311-րդ հոդվածի 4-րդ մասի 2-րդ կետով և նա գտնվում է «Աբովյան» քրեակատարողական հիմնարկում:

Աղբյուր` Փաստինֆո