Փաստ ինֆո

2015 թ. հունվարի 29 -ին ՀՀ ՊՆ Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության գործով այսօր դատական նիստը հետաձգվեց. ամբաստանյալ Վարազդատ Սաֆարյանը նախ հայտարարեց, որ հրաժարվում է իր պաշտպան Ինգա Ավագյանից, ապա նաև՝ փաստաբան Հովհաննես Սարգսյանից:

Պաշտպանից հրաժարվելու պատճառների մասին ամբաստանյալը չցանկացավ բարձրաձայնել, սակայն նշեց որ ֆինանսական չէ և որ այսուհետ ցանկանում է ինքնուրույն իրականացնել իր պաշտպանությունը:

Նշենք, որ պաշտպան Ինգա Ավագյանը չէր ներկայացել դատական նիստին, դատարանի աշխատակազմը պաշտպանի հետ հեռախոսակապի միջոցով պարզել էր, որ պաշտպանի՝ նիստին չներկայանալու պատճառն այն, որ նա այդ պահին այլ նիստի է մասնակցում:

Սաֆարյանի պաշտպանությունը միևնույն ժամանակ իրականացնում է փաստաբան Հովհաննես Սարգսյանը, սակայն վերջինս դատական նիստերին չի ներկայանում, ամբաստանյալը հայտարարեց, որ այս պաշտպանից ևս հրաժարվում է:

Իսկ նախաքննության ընթացքում Վարազդատ Սաֆարյանի պաշտպանությունը իրականացրել է փաստաբան Շահբազյանը, սակայն նա էլ վերջին անգամ դատարան է ներկայացել 2016թ. հոկտեմբերի 31-ին, իսկ այս տարի մարտի 20-ին դատարանը որոշում է կայացրել՝ փաստաբան Ինգա Ավագյանին գործին ներգրավվելու մասին:

Դատարանը ամբաստանյալին պարզաբանեց, թե որ դեպքում կարող է նա հրաժարվել իր պաշտպանից, և միևնույն ժամանակ նշեց, որ այս պահին փաստաբաններ Ինգա Ավագյանին և Հովհաննես Սարգսյանին չի կարող գործի վարույթից հեռացնել, միևնույն ժամանակ նրանց բացակայությունն անհարգելի համարվեց:

Ինչ վերաբերում է պաշտպան Շահբազյանին, ապա ամբաստանյալը ցանկություն հայտնեց, որպեսզի նա իրականացնի իր պաշտպանությունը, փաստաբանն էլ դատարանի հետ հեռախոսազրույցի ընթացքում հայտնել էր, որ մյուս դատական նիստին կներկայանա:

Ուստիև՝ այս պայմաններում դատական նիստը հետաձգվեց և նշանակվեց հուլիսի 17-ին:

Աղբյուր` Փաստինֆո