Փաստ ինֆո

ՀՀ ՊՆ Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության մեղադրանքով ամբաստանվող Նորիկ Սահակյանի պաշտպան Հովիկ Արսենյանի նկատմամբ Ավան և Նոր-Նորք վարչական շրջանների ընդհանուր իրավասության դատարանը սանկցիա է կիրառել՝ դիմելով Փաստաբանների պալատին՝ նրան պատասխանատվության ենթարկելու համար:

Մասնավորապես, մայիսի 29-ի դատական նիստում վկա Նորիկ Օհանյանի հարցաքննության ընթացքում փաստաբանը, առանց նախագահող դատավոր Դավիթ Հարությունյանի թույլտվության, նստած տեղից հայտարարություններ է արել:

Փաստաբանի նման պահվածքն առաջին անգամը չէր. նախկինում ևս նույն քրեական գործի շրջանակներում մի քանի անգամ դատական սանկցիաներ են կիրառվել նրա նկատմամբ՝ սակայն նախազգուշացման կարգով:

Նշված օրը դատարանը պարզաբանել էր փաստաբանին, որ նման վարքագիծը հերթական անգամ որակվում է որպես անհարգալից վերաբերմունք՝ դատարանի նկատմամբ և որ այդպիսով խոչընդոտում է դատական նիստը։ Դատարանի պարզաբանն ի պատասխան փաստաբանը շարունակել է նույն վարքագիծը և հայտարարել, որ ինքը միշտ անհարգալից է:

Նախագահողը փորձել է ճշտել պաշտպանի խոսքերը, իսկ վերջինս էլ ոչ միայն վերահաստատել է ասածը՝ այլև հավելել. «մինչև դատարան չունենանք՝ միշտ էլ անհարգալից եմ»:

Այսպիսով, ՀՀ քրեական դատավարության օրենսգրքի 314.1-րդ հոդվածի 1-ին մասի համաձայն` Դատարան ներկայանալուց չարամտորեն խուսափելու կամ դատավարական իրավունքներից անբարեխղճորեն օգտվելու կամ դատավարական պարտականություններն անհարգելի չկատարելու կամ ոչ պատշաճ կատարելու, դատավորի օրինական կարգադրությունները չկատարելու, դատական նիստի բնականոն ընթացքը խոչընդոտելու կամ նիստի կարգը խախտող այլ գործողություն կատարելու միջոցով դատարանի նկատմամբ անհարգալից վերաբերմունք դրսևորելու դեպքում դատարանն իրավունք ունի քրեական դատավարությանը մասնակցող անձանց և դատական նիստին ներկա գտնվող այլ անձանց նկատմամբ կիրառելու հետևյալ սանկցիաները.

4) պատասխանատվության ենթարկելու վերաբերյալ դիմումով համապատասխանաբար գլխավոր դատախազին կամ Փաստաբանների պալատ դիմելը:

Նույն հոդվածի 2-րդ մասի համաձայն` սանկցիան պետք է համաչափ լինի արարքի ծանրությանը և նպատակ հետապնդի ապահովելու դատարանի գործունեության բնականոն ընթացքը:

Նախազգուշացումը և նիստերի դահլիճից հեռացնելը կիրառվում են նույն դատական նիստում կայացվող դատարանի արձանագրային որոշմամբ:

Հիշյալ հոդվածի 7-րդ մասի համաձայն` գործի քննությանը մասնակցող դատախազի և գործի քննությանը, որպես կողմի ներկայացուցիչ կամ պաշտպան, մասնակցող փաստաբանի նկատմամբ կարող են կիրառվել սույն հոդվածի առաջին մասի 1-ին և 4-րդ կետերով նախատեսված սանկցիաները: Գլխավոր դատախազին կամ Փաստաբանական պալատ դիմելը իրականացվում է նույն դատական նիստում կայացվող դատարանի առանձին որոշմամբ:

Սույն քրեական գործի դատական քննության ժամանակ դատավարության մասնակից փաստաբան Հ.Արսենյանը դատական նիստում արել է հայտարարություններ՝մասնավորապես. « հա, ես միշտ էլ անհարգալից եմ», «հա, մինչև դատարան չունենանք, միշտ էլ անհարգալից եմ»:

Ինչպես տեղեկանում ենք դատական տեղեկատվական համակարգից ՝ Դատարանը նշված արտահայտությունները գնահատել է ոչ հարիր ՀՀ փաստաբանների պալատի փաստաբանի համար և գտել, որ դրանք ոչ միայն հակասում են, այլև խախտում են փաստաբանի վարքագծի կանոնագրքի համապատասխան դրույթները, և Դատարանի նկատմամբ դրսևորված նման անհարգալից վերաբերմունքին ավելի մեղմ՝ նախազգուշացմամբ արձագանքելը չի կարող ծառայել դատական սանկցիա կիրառելու նպատակներին:

Միևնույն ժամանակ Դատարանը հարկ է համարել նշել, որ սույն որոշման կայացման համար որևէ էական նշանակություն չունի, թե պաշտպանը նման արտահայտությունները թույլ է տվել դատական նիստը նախագահողի (Դատարանի), հասցեին անձամբ, թե «դատարան» բառը օգտագործել է այլ իմաստով:

Էական ու կանխորոշող չէ, սակայն հարկ է նշել, որ տվյալ պաշտպանը երբևէ Դատարանի նկատմամբ ինքնաբացարկի միջնորդություն չի ներկայացրել:

Դատարանը գտել է նաև, որ անկախ փաստաբանի դրսևորած վարքագծի շարժառիթներից, պատասխանատվության ենթարկելու վերաբերյալ ՀՀ փաստաբանների պալատ դիմում ներկայացնելն անհարժեշտ է, քանի որ նման արտահայտությունները կարող են, թե խաթարել դատարանների, թե փաստաբանների հեղինակությունը. նման արտահայտությունները դատական նիստերում հնչեցնելն անթույլատրելի է:

Նշենք, որ «Փաստինֆո»-ի թղթակիցը Փաստաբանների պալատի մամլո խոսնակ Ծովինար Խաչատրյանից տեղեկացավ, որ դատարանի դիմումը դեռևս չեն ստացել:

Լուսանկարը՝ «Առավոտ»-ի

Աղբյուր` Փաստինֆո