Փաստ ինֆո

2015թ. հունվարի 29-ին ՀՀ ՊՆ Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության գործով դատարանում շարունակվում է վկաների հարցաքննությունը:

Այսօր հարցաքննվեց վկա -կուրսանտ Հարություն Մեսրոպյանը, ով գործով ամբաստանյալների հետ նորմալ հարաբերությունների մեջ է գտնվել:
Դեպքի օրը` հունվարի 28-ի լույս 29-ի գիշերը, նա եղել է վերակարգում` օրապահ, սակայն վկան դատարանում դժվարացավ վերհիշել տվյալ օրվա մանրամասները և դատախազի միջնորդությամբ հրապարակվեցին նրա նախաքննական ցուցմունքները:

Վկան նախաքննության ընթացքում հայտնել էր, որ օրապահ լինելու ժամանակ տեսել է, որ Հայկազ Բարսեղյանը ննջարանից դուրս է եկել երեք անգամ. մեկ անգամ ծխելու համար, մյուս անգամ գնացել է ջուր խմելու, իսկ երրորդ անգամ` սանհանգույց, որից հետո վերադարձել ու գնացել է ննջարան:

Ըստ վկայի նախաքննական ցուցմունքի` մարտկոցի հերթապահի հետ Հայկազը դուրս է եկել պատշգամբ ծխելու, դրանից մոտ 10 րոպե անց կրկին Հայկազը դուրս է եկել ննջարանից ջրի շիշը ձեռքին և գնացել է ջուր խմելու, ապա վերադարձել է ննջարան:

Այդ ժամանակ վկան նկատել է, որ Գնել Թևոսյանը և Գևորգ Վարդանյանը գնացել են դեպի պահեստասենյակ, որից հետո Վաչեն է միացնել նրանց, իսկ իրեն էլ ասել են, որ զանգի և կանչի Վարազդատ Սաֆարյանին, ինչը վկան կատարել է. վերջինս ևս միացել է նրանց պահեսասենյակում:

Քիչ անց ննջասենյակից դուրս է եկել Հայկազը ու ըստ վկայի առաջին ցուցմունքի` պահեստարանից Հայկազին կանչել են և նա գնացել է: Նրանց միջև խոսակցություն և վիճաբանություն է սկսվել, որից հետո պահեստարանում գտնվողները հայհոյել են Հայկազին, ապա` վերջինս դուրս է եկել ու գնացել ննջարանան:

Վկան ժամը 01.00 –ին ավարտել է հերթապահությունը և գնացել քնելու: Վերակարգը կրկին ընդունել էժամը 03.00-ին եւ միջանքում տեսել է, որ Ավետիսյան Հովիկը, Արթուրը և Նորիկը դաս են սովորում և սուրճ խմում, ապա Հովիկը և Արթուրը գնացել են, իսկ Նորիկը` մնացել միջանցքում:
Այս ամենից հետո ըստ վկայի` ինքը նկատել է հինգ ստվեր` առջևից աստիճաններով իջել են երեք հոգի, ապա ևս երկուսը:

Վկան բոլորի դեմքերը չի տեսել, այլ միայն Վաչեին:

Քիչ անց մարտկոց է եկել հերթապահ Չոբայանը, ստուգել է ննջարանները, մտել Հայկազենց ննջարան, որտեղ ոչինչ չի հայտնաբերել ու հեռացել է:
Այս ամենից շուրջ 10 րոպե անց վկան նկատել է, որ ինչ որ մեկը աստիճաններն է մաքրում, վկան ասել է, որ աստիճանները մաքուր է ու կարիք չկա մաքրելու, սակայն նա կարծես չի լսել ու շարունակել է մաքրել:

Միևնույն ժամանակ վկան հայտնել է, որ չի տեսել է, թե ով է նա:

Վկան նաեւ հայտնել էր, որ վերակարգը հանձնելուց հետո գնացել է քնելու եւ միայն առավոտյան վերկացին տեսել է, որ իրարանցում է, ստուգել են Հայկազի մահճակալը ու տեսել, որ այն արյունոտ է: Ապա պարզել են, որ Հայկազին գտել են ֆիզհրապարակում` կախված:

Նախաքննական լրացուցիչ ցույցմունքներում վկան հայտնել է, որ ժամը 23.00 –ին վաշտի պահեստասենյակում գտնվողները կերուխում են արել ու Հայկազը մոտեցել է պահեստասենյակի դռանը, կարծես «ականջ դրել», վերջինիս չեն կանչել սենյակում գտնվողները, չեն հայհոյել նրան: Լրացուցիչ ցուցմունքում կուրսանտը նշել էր, որ հայհոյանքեր եղել են, սակայն ոչ անվանական: Ավելին` նաեւ նշել է, որ եթե Հայկազին հայհոյեին, ապա նա կպատասխաներ, քանի որ Հայկազն իր բնույթով վախկոտ չէր:

Վկայի մյուս լրացուցիչ հարցաքննությամբ` 2014 թվականի սեպտեմբերին Գնելի, Վաչեի, Նորիկի, Մովսեսի և Հայկազի փոխհարաբերությունները լարվել են եղել` կապված կուրսանտ Կարեն Բաղրամյանի կողմից իր պարտականությունները կատարելու հետ:

Նախաքննությամբ ձեռքբերված տվյալների համաձայն` Վաչեն, Վարազդատը և Մովսեսը ծեծի են ենթարկել Տիգրան Մանասերյանին: Վկան հայտնել է, որ միջանցքում անձնակազմը շարված է եղել և Տիգրան Մանասերյանի շարժվելու և խոսելու համար Վաչեն նրան դիտողություն է արել, հահյոել, ապա Մովսեսը Տիգրանին տարել է զենքի պահեսարան, որտեղ Վաչեն, Վարազդատ և Մովսես սկսել են ձեռքերով և ոտքերով հարվածել են նրան:

Վկան հայտնել է նաեւ, որ անձամբ տեսել է Տիգրանին ծեծի ենթարկելու պահը, որից հետո նրանց բաժանել են:

Ինչ վերաբերում է ծեծի մեկ այլ դրվագին, ըստ որի` Վաչեն, Մովսեսը և Սամվել Սերոբյանը ծեծել են Ալեքսան Հարությունյանին, ապա վկան հայտնել է, որ ինքը պատշգամբում լսել է ձայներ, ապա նկատել, որ Հարությունի աչքը այտուցված է, այդ ժամանակ միջանցքում տարածված խոսակցություններից հասկացել է, որ Սամվել է հարվածել Ալեքսան Հարությունյանին:

Վկան պնդեց իր նախաքննական ցուցմունքը:

Վկաների հարցաքննությունը կշարունակվի հաջորդ նիստին:

Արխիվային լուսանկարը` Ազատություն ռ/կ-ի:

Աղբյուր` Փաստինֆո