Փաստ ինֆո

2015 թ. հունվարի 29 -ին ՀՀ ՊՆ Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության գործով այսօր դատարանում հարցաքննվեց վկա Արշակ Մարտիրոսյանը:

Ավելի վաղ տեղեկացրել էինք, որ վկան կուրսանտ Հայկազ Բարսեղյանի պատիվն ու արժանապատվությունն անպարկեշտ ձևով ստորացնելու մեղադրանքով 2015թ. մայիսի 21-ին Կենտրոն և Նորք Մարաշ վարչական շրջանների ընդհանուր իրավասության դատարանի դատավճռով, դատապարտվել էր 2 ամիս ժամկետով կալանքի, սակայն դատարանը, նախագահող Արշակ Վարդանյանի նախագահությամբ, նրա նկատմամբ նշանակված պատիժը պայմանականորեն չէր կիրառել, և սահմանել էր 1 տարի ժամկետով փորձաշրջան:

Այսպիսով, Երևանի Ավան և Նոր-Նորք վարչական շրջանների ընդհանուր իրավասության դատարանում այսօր վկան հայտնեց, որ ամբաստանյալների հետ նորմալ հարաբերությունների մեջ է գտնվել, իսկ սպանված Հայկազ Բարսեղյանի հետ՝ ավելի ջերմ:

Վկան իր ցուցմունքի սկզբում նշեց, որ դեպքից բավականին ժամանակ է անցել և մանրամասները չի հիշում, սակայն վստահաբար ասաց՝ Հայկազի տեսակը հաշվի առնելով՝ նա իրեն վնաս չէր տա, նա ընկերասեր, հումորով տղա էր:

Թերևս վնաս տալ ասելով՝ վկան նկատի ուներ ինքնասպանություն գործել:

Վկան դժվարությամբ նաև հիշեց իր և Հայկազի միջև տեղի ունեցած կոնֆլիկտի մանրամասները:

Մասնավորապես, 2015թ. հունվարի 28-ին՝ Ա. Սպենդիարյանի անվան օպերայի և բալետի ազգային թատրոնում ՀՀ ԶՈւ կազմավորման տարեդարձի առթիվ կազմակերպված տոնական համերգից հետո, ռազմական ինստիտուտ վերադառնալու ճանապարհին, ավտոբուսում Արշակ Մարտիրոսյանը վիճաբանել է նույն դասակի կուրսանտ Հայկազ Բարսեղյանի հետ, հնչել էին հայհոյանքներ, քաշքշել էր նրան՝ անպարկեշտ ձևով ստորացնելով նրա պատիվն ու արժանապատվությունը:

Վկան հայտնեց, որ ավտոբուսում իրենց մեջ քաշքշուկ չի եղել, խոսակցությունն անավարտ է մնացել՝ հետո շարունակելու պայմանով, իսկ երբ նույն օրը՝ երեկոյան ավելի ուշ, Հայկազը գնացել է իր ննջարան՝ հարցը պարզաբանելու, ինքը խնդրել է մեկ այլ օր խոսակցությունը շարունակել, որին ի պատասխան՝ Հայկազ Բարսեղյանն ասել է՝ «վաղը 90 տոկոսով այստեղ չեմ լինելու»:

Խոսակցությունը չի կայացել, բայց Վաչեն Հայկազին կանչել է, և նա գնացել է:

Թե ինչու է Հայկազը այդպես ասել, վկան դժվարացավ պատասխանել, սակայն նշեց, որ ինքը հասկացել է, որ ինստիտուտում չի լինելու:

Ինչ վերաբերում է սպանության օրվան, ապա վկան հայտնեց, որ այդ օրն առավոտյան վերկացից հետո տեղեկացել է, որ Հայկազը չկա, գնալով նրա ննջարան՝ անկողինը հայտնաբերել է արյան մեջ, որից հետո գնացել են կուրսանտներով Հայկազին փնտրելու և նրան հայտնաբերել են սպորտային հրապարակում պտտաձողից կախված վիճակում. «Ոտքերի ծայրերը գետնին էր կպած»:

Վկայի ցուցմունքներում առկա էական հակասություններով պայմանավորված՝ դատարանը հրապարակեց նրա նախաքննական ցուցմունքը, հակասությունները մասնավորապես վերաբերում էին օպերայի և բալետի ազգային թատրոնից վերադառնալու ճանապարհին ավտոբուսում տեղի ունեցածին, ասել է թե՝ վկային առաջադրված մեղադրանքի ծավալին, իսկ մյուս մասը՝ 4 ամբաստանյալների դիրքին ու պահվածքին:

Մասնավորապես՝ այն, որ լինելով ջոկի հրամանատարներ՝ նրանք որոշակի արտոնություններ են ունեցել մյուս կուրսանտների նկատմամբ, իրենց պահել են ոչ այնքան լավ, չնայած նրան, որ, ըստ վկայի, իր և Հայկազ Բարսեղյանի առումով նրանց չի հաջողվել այդ ամենը:

Բացի այդ, վկան դատարանին հայտնեց, որ Վաչե Սահակյանը հայհոյանքներ է հնչեցրել Հայկազի հասցեին, սակայն Հայկազը նրան գովաբանել է: Դատարանը փորձեց վկայից պարզել՝ արդյոք կուրսանտների մեջ ընդունվա՞ծ է միմյանց հետ հայհոյանքներով խոսել, վկան, սկզբում փորձում էր հիշողության վրա բարդելով, շրջանցել հարցը, բայց քանի որ չհաջողվեց մանևրել, ասաց որ ընդունված չէր, իսկ թե ինչո՞ւ այդ մասին վկան նախաքննության ընթացքում իր ցուցմունքում չէր հայտնել, այստեղ էլ հստակ պատասխան չհնչեց:

Նշենք, որ դատարանը քրեական հետախուզության վարչությունից գրություն էր ստացել գործով վկա Սամվել Սերոբյանի մասին. վերջինս 2017թ. ապրիլի 1-ին սահմանը հատել է:

Ավելի վաղ դատարանը կողմերին տեղեկացրել էր, որ դատարան են ստացվել դիմումներ Սամվել Սերոբյանից և նրա հորից առ այն, որ Սամվել Սերոբյանը, սոցիալական պայմաններից ելնելով, մեկնել է արտագնա աշխատանքի և խնդրել է հիմք ընդունել իր նախաքննական ցուցմունքը:

Դատարանը գրություն էր ստացել նաև այն զորամասի հրամանատարից, որտեղ ծառայել է Սամվել Սերոբյանը: Այդ գրությամբ էլ հայտնվում էր, որ Սերոբյանի ծառայության ժամկետը լրանալու կապակցությամբ նա արձակվել է պահեստազոր:

Հաջորդ դատական նիստը կկայանա հունիսի 26-ին:

Աղբյուր` Փաստինֆո