Փաստ ինֆո

Արմավիրի մարզի Ջրառատ գյուղում լարված իրավիճակը պահպանվում է և, ըստ ամենայնի, այս վիճակը հանդարտեցնելու նպատակով անհրաժեշտ են զսպման կոշտ մեթոդներ:

«Փաստինֆո»-ի տեղեկություններով՝ Երանոսյաններ և Մելիքյաններ բախումը քաղաքական կամ գաղափարական չեն. դրանք անձնավորված են և սկիզբ են առել դեռևս նախորդ ՏԻՄ ընտրություններից:

Փետրվարի 14-ին էլ Ջրառատում տեղի ունեցած դեպքերն էլ շարունակությունն են փետրվարի 12-ի դեպքերի, երբ հայտնի դարձավ, որ ՀՀԿ ներկայացուցիչ Սամվել Գալստյանի կողմից սպառնալիքներ է հնչեցվել գյուղի բնակիչների հասցեին, հնչել է մեկ կրակոց:

Այս մասին ՕՐՕ-ն հաղորդագրություն տարածեց՝  ներկայացնելով տեղի ունեցածը՝ որպես զինված հարձակում դաշինքի համակիրների վրա:

Ապա հայտնի դարձավ, որ Լեռնիկ Երանոսյանը, ով ոստիկանության ներքին զորքերի գնդապետ է, ծեծի հետևանքով ստացած վնասվածքներով հայտնվել է հիվանդանոցում:

Նշենք, որ ՕՐՕ-ի համակիրներ Մելիքյանների ազգականների մեջ կան սպորտով զբաղվողներ, ովքեր և Երանոսյանի «հախից» փորձել էին գալ բռունցքներով, և որպեսզի Երանոսյանը հանդարտեցնի իրավիճակը և նրանց «ձեռքից պրծնի», իր անձնական «Մակարով» տեսակի ատրճանակից օդ է կրակել։

Այս դեպքից ընդամենը երկու օր անց Ջրառատում հաջորդ բախումը գրանցվեց. կողմերի ընտանիքիների կրտսեր անդամները միմյանց հասցեին հայհոյանքներ են հնչեցրել, ծագել է վիճաբանություն և ծեծկռտուք, ինչից հետո էլ 3 անձ, տարբեր աստիճանի վնասվածքներով, հայտնվեցին հիվանդանոցում. ոտքի շրջանում հրազենային վիրավորում է ստացել Հակոբ Մելքոնյանը, վերջինիս հորեղբայրը, ով  վիրավորում է ստացել դանակահարության հետևանքով, իսկ հորեղբոր անչափահաս որդին վիրավորում է ստացել ծեծի հետևանքով:

Եվ քանի որ Մելիքյանները ՕՐՕ-ի համակիրներ են, ՕՐՕ-ն այս ամենը ներկայացնում է այնպես իբրև հալածյալի կարգավիճակում է հայտնվել, թեև լարվածությունը ոչ թե գաղափարական է, այլ՝ անձնական։ Պարզվում է, որ Հակոբ Մելքոնյնաը նախկինում հավակնել է գյուղապետ ընտրվել, բայց հաղթել է Երանոսյանի ազգականը՝ Սամվել Գալստյանը, և տարաձայնություններն սկսել են խորանալ։

Մեր տեղեկություններով՝ գործի շրջանակներում նախօրեին ձերբակալված Տիգրան Սարգսյանը գյուղապետ Սամվել Գալստյանի տեղակալն է:

Նշենք նաև, որ այս ընթացքում վարույթն իրականացնող մարմնի կողմից բազմաթիվ քննչական գործողություններ են կատարվել, խուզարկվել են ինչպես տուժողների, այնպես էլ՝ գործող գյուղապետի, վեջրինիս եղբոր ու նաև ձերբակալված տեղակալի, տուժած երեք անձանց տները:

Ակնհայտ է, որ Ջրառատում լարվածությունը պահպանվում է, և հաշվեհարդարի վտանգ է օդում կախված, քանի որ իրավապահներին դիմելու և նրանց միջոցով խնդիրը լուծելու փոխարեն՝ Մելիքյանները «գողական են գնում», հրաժարվում են ցուցմունքներ տալուց:

Աղբյուր` Փաստինֆո