Փաստ ինֆո

Երկու կամ ավելի անձանց օգտագործելով պոռնկությամբ զբաղվելուն նպաստելու մեջ մեղադրվող 25-ամյա երիտասարդ Սահակ Դավթյանը Մալաթիա-Սեբաստիա վարչական շրջանների ընդհանուր իրավասության դատարանի դատավճռով դատապարտվեց 3 տարի ժամկետով ազատազրկման:

Ըստ մեղադրանքի՝ Սահակ Դավթյանը 2015թ. սեպտեմբերին վարձակալել է Երևանի Սեբաստիա 22 շենքի նկուղային հարկում գտնվող թիվ 103 տարածքը այնտեղ կատարել վերակառուցման աշխատանքներ խոհանոցում կառուցել լոգախցիկ և 2015թ. սեպտեմբերից 2016թ. փետրվարն ընկած ժամանակահատվածում այդ շինությունը գործարկել է որպես «Ջիանի» մերսման սրահ:

Այնուհետև Ս.Դավթյանը որպես մերսող աշխատանքի է ընդունել Ա.Զախարյանին, Մ.Հարությունյանին և Լ.Գրիգորյանին, ովքեր սահմանված գնացուցակի համաձայն կատարել են հաճախորդների սեռական կրքերի բավարարման ուղղված սեքսուալ բնույթի գործողություններ, իսկ մատուցված ծառայությունների դիմաց հաճախորդներից ստացած վարձատրությունը կիսվել են Ս.Դավթյանի հետ:

Սահակ Դավթյանին մեղադրանք է առաջադրվել ՀՀ քրեական օրենսգրքի 262-րդ հոդվածի 2-րդ մասի 5-րդ կետով և նրա նկատմամբ որպես խափանման միջոց է ընտրվել չհեռանալու մասին ստորագրությունը:

Դատալեքս տեղեկատվական համակարգից տեղեկանում ենք, որ դատաքննությամբ պարզվել է, որ Դավթյանը վարձակալված տարածքը ստեղծել է անհրաժեշտ հարմարություններ սեքսուալ բնույթի գործողություններով զուգորդված մերսման ծառայություններ մատուցելու համար` սենյակներից մեկում կառուցել է լոգախցիկ, մյուս սենյակները կահավորել է մերսման համար անհրաժեշտ ներքնակներով, ձեռք է բերել մերսման համար նախատեսված յուղեր և գործարկել »Ջիանի» մերսման սրահը:

Այդ ամենից հետո 2015 թ. հոկտեմբերից սկսած Դավթյանը որպես մերսող աշխատանքի է ընդունել 3 աղջիկների՝ Մ. Հարությունյանին, Ա. Զախարյանին և Լ. Գրիգորյանին, որոնք սահմանված գնացուցակի համաձայն 10 000-ից մինչև 30 000 ՀՀ դրամ վարձատրության դիմաց հաճախորդներին առաջարկել են «ռելաքս», «սպորտային», «էրո» և «վիպ» տեսակի մերսումներ:

Մերսումները զուգորդվել են հաճախորդների սեռական կարիքների բավարարմանն ուղղված սեքսուալ բնույթի գործողություններով, իսկ հաճախորդներից ստացած վարձատրությունը աղջիկները հավասարապես բաժանել են Սահակ Դավթյանի հետ:

Առաջադրված մեղադրանքում Սահակ Դավթյանն իրեն մեղավոր չի ճանաչել և ցուցմունքներ տալով հայտնել է, թե գրանցվել է որպես անհատ ձեռնարկատեր և որոշել է բացել մերսման սրահ:

Մերսուհիներ գտնելու նպատակով համացանցում տեղադրել է հայտարարություն, որին առաջինն արձագանքել է Լիլիթ անունով մի աղջիկ, որը հայտնել է, որ նախկինում աշխատել է մերսման սրահում և կարող է իր ծանոթներից ևս աշխատողներ հրավիրել: Այնուհետև Լիլիթից և մյուս աշխատակիցներից` մերսուհիներից տեղեկացել է թե ինչպիսի սակագներ են գործում նմանատիպ մերսման սրահներում և ինչ տեսակի մերսումներ են առաջարկվում հաճախորդներին:

Ինքը նախկինում մերսման սրահ չի ունեցել և ձեռնարկատիրական այդ ոլորտն իրեն անծանոթ է եղել, այդ իսկ պատճառով հիմք է ընդունել մերսուհիների ներկայացված տեղեկությունները և վերջիններիս հետ զրուցելուց հետո որոշվել են մերսման տեսակները և կազմվել մատուցվող ծառայությունների գնացուցակը:

Սրահում առաջարկվել են չորս տեսակի մերսումներ` «ռելաքս», «սպորտային». «էրո» և «վիպ»: «Ռելաքս» տեսակի մերսումը կատարելու ժամանակ մերսուհու հագին եղել է հագուստ, «սպորտային» տեսակի մերսման ժամանակ` կարճ շորտեր և շապիկ, «Էրո» տեսակի մերսման ժամանակ` միայն «ստրինգ» տեսակի ներքնավարտիք, իսկ «Վիպ» տեսակի մերսումն իրենից ներկայացրել է մերսման վերը նշված տեսակների ամբողջականություն:

Ինքը այդ սրահում օրվա ընթացքում գտնվել է ընդհամենը մեկ երկու ժամ, սակայն նախապես մերսուհիներին զգուշացրել է, որ նրանք հաճախորդների հետ սեռական հարաբերություններ չունենան:

Դատարանը գտել է, որ ամբաստանյալի ցուցմունքներն արժանահավատ չեն և դրանք նպատակ են հանցավոր արարքը հիմնավորվել է քրեական գործի նախաքննությամբ և դատաքննությամբ ձեռք բերված ապացույցներով, մերսուհիների ինչպես նաև և մերսման սրահ այցելած հաճախորդ տղամարդկանց ցուցմունքներով:

Այսպիսով, Սահակ Դավթյանը դատապարտվել է 3 տարվա ազատազրկման և դատավճռով նրա նկատմամբ ընտրված խափանման միջոցը` չհեռանալու մասին ստորագրությունը փոփոխել է կալանքով և նրա արգելանքի է վերցվել դատական նիստերի դահլիճից:

Աղբյուր` Փաստինֆո