Փաստ ինֆո

Մալաթյան Սեբաստի վարչական շրջանների ընդհանուր իրավասության դատարանի դատավճռով պոռնկության նպաստելու մեջ մեղադրվող 38-ամյա Աղունիկ Այվազյանը դատապարտվել է 6 տարի ժամկետով ազատազրկման:

Միևնույն ժամանակ դատարանի դատավճռով Աղունիկ Այվազյանի նկատմամբ ազատազրման ձևով նշանակված պատժին գումարվել է Կենտրոն և Նորք-Մարաշ վարչական շրջանների ընդհանուր իրավասության դատարանի՝ 25.07.2014 թվականի` 12 տարի ժամկետով ազատազրկման ձևով նշանակված պատժի չկրած մասը՝ 6 տարի 6 ամիս ժամկետով ազատազրկումը, և նրա նակատմամբ վերջնական պատիժ է նշանակվել 12 տարի 6 ամիս ժամկետով ազատազրկում:

Այսպիսով, ըստ մեղադրանքի` Աղունիկ Այվազյանը, լինելով կազմակերպված խմբի կազմում, գույքային օգուտ ստանալով, նպաստել է Ա.Պ-ի կողմից պոռնկությամբ զբաղվելուն:

Նրան մեղադրանք էր առաջադրվել ՀՀ քրեական օրենսգրքի 262-րդ հոդվածի 3 -րդ մասով:

Դատաքննությամբ պարզվել է, որ ամբաստանյալ Աղունիկ Այվազյանը մարդու թրաֆիքինգի՝ շահագործման նպատակով մարդկանց հավաքագրելու, տեղափոխելու, փոխանցելու, թաքցնելու, ստանալու, սեռական` պոռնկության շահագործման վիճակի մեջ դնելու և պահելու, ինչպես նաև գույքային օգուտներ ստանալով, պոռնկությամբ զբաղվելուն նպաստելու դիտավորությամբ, միավորվելով Արաբական Միացյալ Էմիրություններում բնակվող Նելլի Ներսիսյանի, վերջինիս միջոցով նաև Ծովիկ Ավետիսյանի, Հասմիկ Առաքելյանի, Ազատուհի Հայրապետյանի, Աշոտ Ներսիսյանի, Սիլվա Հովսեփյանի, Սերինե Սարգսյանի, ոմն Նառայի և քննությամբ դեռևս չպարզված այլ անձանց հետ, ստեղծել են կազմակերպված հանցավոր խումբ և իրենց հանցավոր մտադրությունն իրագործելու նպատակով կատարել են համապատասխան դերաբաշխում, այն է` Նելլի Ներսիսյանը, ղեկավարելով հանցավոր խմբի գործողությունները, անձամբ կատարել է հավաքագրված կանանց Դուբայ տեղափոխելու, մուտքի հրավեր ստանալու հետ կապված ծախսերը, ստացել է նրանց Դուբայ քաղաքում, վերցրել անձնագրերը, Սերինե Սարգսյանի, ոմն Նառայի և չպարզված այլ անձանց հետ կազմակերպել է նրանց սեռական շահագործումը կամ նպաստել պոռնկությամբ զբաղվելուն, իսկ Աղունիկ Այվազյանը, Ծովիկ Ավետիսյանը, Հասմիկ Առաքելյանը և մյուսները կատարել են կանանց հավաքագրման և Դուբայ տեղափոխելուն, փոխանցելուն, թաքցնելուն ուղղված գործողությունները, իսկ Սիլվա Հովսեփյանը ԱՄԷ Դուբայ քաղաքում ստացել է հավաքագրված կանանց:

Մասավորապես, Աղունիկ Այվազյանը, Նելլի Ներսիսյանի կողմից ստեղծված և ղեկավարած հիշյալ խմբի կազմում, ստանձնելով Հայաստանում կանանց հավաքագրման և նրանց ԱՄԷ Դուբայ քաղաք տեղափոխման գործողությունների կատարման դերակատարությունը, 2010 թվականի փետրվարի սկզբներին Երևանում ծանոթացել է Ա. Պ-ի հետ և տեղեկանալով, որ նա Երևանում ընտանիք և զբաղմունք չունի, նրան առաջարկել է Դուբայ քաղաքում զբաղվել մարմնավաճառությամբ:

Վերջինս համաձայնել է Աղունիկ Այվազյանի առաջարկին՝ մեկնել Դուբայ և այնտեղ զբաղվել մարմնավաճառությամբ: Ա. Պ-ի համաձայնությունն ստանալուց հետո Աղունիկ Այվազյանը նրա Դուբայ մեկնելու համար մուտքի հրավեր ստանալաու նպատակով, անձնագրի պատճենն էլեկտրոնային փոստի միջոցով ուղարկել է Դուբայ, հանցավոր խմբի ղեկավար Նելլի Ներսիսյանին, որը կազմակերպել է Ամալյա Պետրոսյանի Դուբայի մուտքի հրավերը և այն նույն եղանակով ուղարկել Աղունիկ Այվազյանին: Դրանից հետո, 2010 թվականի փետրվարի 04-ին, Աղունիկ Այվազյանը ՀՀ պետական սահմանը հատելով, անձի տեղափոխումը կազմակերպելու միջոցով, Ա. Պ-ին տաքսի ավտոմեքենայով տեղափոխել է Վրաստանի Թբիլիսի քաղաք, որտեղ Նելլի Ներսիսյանի կողմից ուղարկված՝ Ա. Պ-ի ճանապարհածախսի գումարով գնել է Թբիլիսի-Դուբայ չվերթի տոմս և նրան ճանապարհել Դուբայ:

Ա. Պ-ի կողմից պոռնկությամբ զբաղվելուն նպաստելուն ուղղված՝ նկարագրված գործողությունների դիմաց Աղունիկ Այվազյանը Նելլի Ներսիսյանից, որպես գույքային օգուտ, ստացել է շուրջ 200 ԱՄՆ դոլար գումար:

Արդեն Դուբայում, Նելլի Ներսիսյանը կազմակերպված խմբի այլ անդամների հետ, Ամալյա Պետրոսյանի համար հաճախորդներ և պոռնկությամբ զբաղվելու անհրաժեշտ այլ պայմաններ ապահովելու միջոցով, մինչև 2015 թվականի գարնան ամիսները նպաստել է վերջինիս կողմից պոռնկությամբ զբաղվելուն և ստացել այդ կերպ նրա վաստակած գումարների մի մասը:
Իսկ 2015 թվականի հոկտեմբերին Ա. Պ-ը վերադարձել է Հայաստան և բնակվել հանցավոր խմբի անդամներից ոմն Նառայի կողմից վարձակալած բնակարանում:

Կազմակերպված խմբի կազմում, բացի Ա. Պ-ից, այլ կանանց թրաֆիքինգի ենթարկելու նպատակով ՀՀ-ում հավաքագրելու և ԱՄԷ Դուբայ քաղաք տեղափոխելու համար Աղունիկ Այվազյանը Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի՝ 2013 թվականի մայիսի 2-ի, 2014 թվականի հուլիսի 25-ի օրինական ուժի մեջ մտած դատավճիռներով մեղավոր է ճանաչվել ՀՀ քրեական օրենսգրքի 132-րդ հոդվածի 3-րդ մասի 1-ին կետով և դատապարտվել 12 տարվա ազատազրկման:

Այսպիսով, Աղունիկ Այվազյանը ՀՀ քրեական օրենսգրքի 262-րդ հոդվածի 3-րդ մասով առաջադրված մեղադրանքում իրեն մեղավոր է ճանաչել և հայտնեց, որ 2001 թվականից ճանաչել է Նելլի Ներսիսյանին, ով նույն ժամանակվանից Դուբայում կազմակերպել է տարբեր կանանց մարմնավաճառությունը: Նելլիի առաջարկով ինքը համաձայնել է Հայաստանում աղջիկներ գտնել և ուղարկել Դուբայ, որտեղ նրանք, Նելլիի ղեկավարմամբ, պետք է զբաղվեին մարմնավաճառությամբ:

Իր կողմից Հայաստանում հավաքագրված և Դուբայ ուղարկված յուրաքանչյուր կնոջ համար Նելլին իրեն գումար է խոստացել: Դրանից հետո՝ մինչև իր ձերբակալվելը՝ 2010 թվականի հունիս ամիսը, ինքը բազմաթիվ կանանց Հայաստանից ուղարկել է Դուբայ՝ Նելլի Ներսիսյանի մոտ, որտեղ նրանք զբաղվել են մարմնավաճառությամբ: Իր կողմից Դուբայ ուղարկված յուրաքանչյուր կնոջ համար Նելլին բանկային կամ այլ անձանց միջոցով՝ առձեռն իրեն է փոխանցել մինչև 300-500 ԱՄՆ դոլար: 2010 թվականի ձմռանը ծանոթացել է Ա. Պ-ի հետ, որին առաջարկել է մեկնել Դուբայ՝ Նելլի Ներսիսյանի մոտ մարմնավաճառությամբ զբաղվելու` նա համաձայնել է:

Իսկ երբ Ա-ին ճանապարհել է Դուբայ Նելլին իրեն փոխանցել է 100-200 ԱՄՆ դոլար գումար, սակայն Ա.Պետրոսյանին Դուբայ ճանապարհելուց հետո նրա վերաբերյալ որևէ տեղեկություն չի ունեցել և նրան չի հանդիպել:

Աղունիկ Այվազյանը հայտարարել է, որ զղջում է կատարածի համար:

Իսկ տուժող Ա-ն ցուցմունքներ տալով հայտնել է, որ`Երևանում աշխատանք և ընտանիք չունենալու մասին Աղունիկին տեղեկացերլ է վերջինս էլ առաջարկել է մեկնել Դուբայ, այնտեղ Նելլի Ներսիսյանի ղեկավարությամբ զբաղվել մարմնավաճառությամբ և այդ կերպ գումար վաստակել:

Տուժողը հայտնել է, որ ինքն այդ առաջարկը ընդունել է, որից հետո Աղունիկը գտնել է ինքնաթիռի տոմս և կազմակերպել իր Դուբայ տեղափոխման հարցը:

Օդանավակայանում տուժողին դիմավորել է Նելլին, Նառայի հետ միասին, ապա տեղափոխել իրենց բնակարան, իսկ մոտ երկու ամիս անց ինքը սկսել է զբաղվել մարմնավաճառությամբ:
Սկզբնական շրջանում, շուրջ երկու տարի ինքը մարմնավաճառությամբ զբաղվել է Նելլիի աղջիկների միջոցով, ովքեր իրեն օգնել են գտնել հաճախորդներ, պայմանավորվել նրանց հետ մատուցվելիք սեռական ծառայության և գումարի վերաբերյալ, նրանցից վերցրել են գումարները և փոխանցել Նելլիին:

Սակայն Դուբայում շուրջ հինգ տարի մարմնավաճառությամբ զբաղվելուց հետո, տուժողը այնտեղից մեկնել է Դոնի Ռոստով, որտեղից էլ 2015 թվականի հոկտեմբերին վերադարձել է Հայաստան:

Իսկ երբ Հայաստան է վերադարձել Նառան, ում նաև Էլեն են անվանել, իր համար բնակարան է վարձակալել Վանաձոր քաղաքում, որտեղ էլ ապրել է տուժողը, բնակարանի վարձավճարի և ամսական անհրաժեշտ իր այլ ծախսերի գումարները բանկային փոխանցման միջոցով տուժողի խոսքով իրեն ուղարկել է Նառան կամ Նելլին՝ բնակարանատիրոջ միջոցով, քանի որ ինքն անձնագիր չի ունեցել:

Այսպես, դատարանը, որպես Աղունիկ Այվազյանի պատասխանատվությունն ու պատիժը մեղմացնող հանգամանք է գնահատել անկեղծորեն զղջալը, իսկ պատասխանատվությունն ու պատիժը ծանրացնող հանգամանք` հանցագործությունների ռեցիդիվը։

Աղբյուր` Փաստինֆո