Փաստ ինֆո

Գործ ունենք բացառիկ զավեշտի, ոչ թե՝ քրեական վարույթի հետ։ Այս մասին հրավիրված մամուլի ասուլիսին ասաց ՀՀ երկրորդ նախագահ Ռոբերտ Քոչարյանի որդու՝ Լևոն Քոչարյանի պաշտպան Էրիկ Ալեքսանյանը։

« Լևոն Քոչարյանին մեղադրանք է առաջադրվել այն բանի համար, որ իբրև նա, 2023թ սեպտեմբերի 22-ին խաղաղ ցույցին մասնակցելիս, ոստիկանության ծառայության աշխատակիցները՝ «կարմիրբերետավորները» , իբրև ներկայացրել են օրինական պահանջ՝ ճանապարհը բացելու և, Լևոն Քոչարյանը, հակադրվելով, օրինական պահանջը չկատարելով, ոստիկանության ծառայողների նկատմամբ գործադրել է բռնություն։ Մասնավորապես, ըստ մեղադրանքի, այդ շրջանակներում ոստիկանության մեկ աշխատակցի երկու անգամ ոտքերով հարվածել է վերջինիս ոտքերի հատվածին, այնուհետև, երբ նրան նստեցրել են արդեն ավտոմեքենան, այդ ավտոմեքենայում արդեն գտնվելու ժամանակ Լևոն Քոչարյանն իբրև ևս չի ենթարկվել օրինական պահանջին, նպատակ ունենալով խաթարել ծառայողական գործունեությունը, ևս մեկ ոստիկանության աշխատակցի երկու անգամ հարվածել է կրծքավանդակի և ուսի հատվածին, ինչպես նաև՝ ոստիկանության մեկ այլ աշխատակցի՝ ոտքով հարվածել է ուսին։ Ամբողջ մեղադրանքը սա է։ Այս մեղադրանքը բնորոշ է քրեական օրենսգրքի 452 հոդվածին»,- նշեց փաստաբան Էրիկ Ալեքսանյանը՝ մանրամասնելով, որ գործով կա երկու տուժող և երկու վկա, նրանցից մեկը՝ Հրաչիկ Խաչատրյանն է։ «Ես տեսանյութ կներկայացնեմ և այնտեղ հստակ կերևա, թե ով է Հրաչիկ Խաչատրյանը։ Ըստ մեղադրանքի, Հրաչիկ Խաչատրյանի ոտքերին է հարվածել Լևոն Քոչարյանը մինչև ավտոմեքենա նստեցնելը։ Տեսանյութում դուք կտեսնեք, թե որտեղ է նա գտնվել և արդյո՞ք Քոչարյանը կարող էր հարվածել Հրաչիկ Խաչատրյանին։ Ունենք մի իրավիճակ, որ ես կաշկանդված եմ նախաքննության գաղտնիքով և, բնականաբար, չեմ կարող ասել, թե ոստիկանության աշխատողներն ինչ բնույթի ցուցմունքներ են տվել»։

Փաստաբանը նաև արձանագրեց՝ ոստիկանության ծառայողների ցուցմունքների անարժանահավատությունը, քանի որ դրանք գործով առկա մյուս փաստական տվյալներով դրանք ոչ միայն չեն հաստատվում, այլև՝ հերքվում են։

Աղբյուր` Փաստինֆո