Փաստ ինֆո

Ազատ գյուղի տարածքում տեղակայված ինժեներասակրավորային վաշտի կացարանում հրդեհի հետևանքով զոհված 15 զինծառայողների ծնողները պահանջում են ՊՆ-ից պարզաբանել, թե ով է տեղափոխել զինծառայողների աճյունները դիահերձարան, քանի որ դեպքի վայրը խախտված է եղել՝ մինչև իրավապահների դեպքի վայր մեկնելը, զոհված զինծառայողներից յուրաքանչյուրը որտեղ և ինչ դիրքով է եղել։ Տուժողների ներկայացուցիչ, փաստաբան Նորայր Նորիկյանը հրավիրված մամուլի ասուլիսում հիշեցրեց դեպքի վայրում զինծառայողների մարմինների հայտնաբերման վերաբերյալ հակասական մեկնաբանությունները, նախ ներկայացրեց ՆԳՆ փրկարար ծառայության պաշտոնատար անձի՝գնդապետ Սարոյանի հայտարարությունը, համաձայն որի՝ զինծառայողներից 14-ը հայտնաբերվել էին մահճակալին, նախնական տվյալներով՝ ծխահարված էին, ապա դրան հաջորդած՝ դատախազի պարզաբանումը, համաձայն որի՝ գնդապետը ցուցմունքով հերքել է հայտարարությունը՝ նշելով, որ իրեն էին այդպես ասել։ Հակասություններով և դեպքի վայրի փաստացի խախտմամբ պայմանավորված՝ Նորիկյանը պարզաբանումներ էր պահանջել ինչպես ՆԳՆ ՓԾ պաշտոնյայից, այնպես էլ՝ ՊՆ-ից։

ՆԳՆ պաշտոնյան որոշակի պարզաբանումներ ներկայացրել է, ՊՆ-ից, սակայն, առ այս պահը որևէ տեղեկություն չի տրամադրվել, ըստ այդմ, տուժող կոմղը հետամուտ է լինելու ՊՆ-ին ուղղված հարցերը վարույթն իրականացնող մարմնից ստանալու հարցում։ Մասնավորապես, ՊՆ նախարարին հարցադրում է առաջադրվել, թե ՊՆ կամ ԳՇ որ իրավասու պաշտոնյայի կողմից է ընդունվել համապատասխան որոշում՝ Գեղարքունիքի մարզի Ազատ գյուղի տարածքում այդ ենթադրյալ տունը որպես զինվորական կացարան հատկացնելու և անձնակազմին բնակեցնելու համար, արդյոք որոշումը կայացնելու պահին և դրանից հետո նշված տարածքը համապատասխանել է ՀՀ օրենսդրությամբ սահմանված չափորոշիչներին, եթե ոչ, ապա ինչ մասնագիտական եզրակացության հիման վրա են նման որոշում կայացրել, ՊՆ կամ ԳՇ որևէ բարձրաստիճան պաշտոնյաներ այցելել են զինվորական կացարան, երբևէ վերադասության կարգով զեկուցվել է կացարանի պայմանների և դրանց բարելավման անհրաժեշտության մասին, արդյո՞ք տարածքը համապատասխանեցված է եղել հակահրդեհային համակարգով, արդյոք ծառայողական քննություն իրականացվել է ։ Բացի այդ, դեպքի վայրում ՊՆ կամ ԳՇ կոնկրետ որ ստորաբաժանումներն են մասնակցել հրդեհաշիջման աշխատանքներին, արդյոք տեսանկարահանում իրականացվել է՝ զինծառայողների դիերի և այլն, արդյոք կազմվել է հրդեհի մասին ակտ, ում հրամանով է դիակները տեղափոխվել դիահերձարան։ Տուժող կողմը պարզաբանումներ է պահանջում նաև ՀՀ զինվորական դատախազությունից՝ դեպքի վայրի խախտման, դիերի տեղափոխման, դիակների վայրի և տեղափոխման լուսանկարահանման և տեսանկարահանման մասին, ով է փոխանցել տեղեկությունները գնդապետ Սարոյանին, ինչու նրա կողքը նստած դատախազն այդ պահին չի հերքել տեղեկությունները, երբ է նա հարցաքննվել, ինչու է գործը 5-րդ կայազորային վարչությունից տեղափոխվել ԶՔԳՎ, անվստահություն եղել է արդյոք, թե ոչ։

Տուժող կողմը նաև հետաքրքրվում է՝ արդյո՞ք գործով հարցաքննվել է ՀՀ վարչապետը՝ պարզելու, թե վերջինս ինչպես է տեղեկացել դեպքի մանրամասների մասին և կառավարության նիստին հանդես եկել հայտարարությամբ՝ շրջանառության մեջ դնելով հայտնի վարկածը։ Բացի այդ, Նորիկյանն արձանագրեց նաև Փաշինյանի հայտարարությունների և դասակի հրամանատարի՝ լեյտենանտի, հայտարարությունների փաստական տվյալների միջև հակասությունները, մասնավորապես, լեյտենանտը հերքել էր տարածքում բենզինի առկայությունը։

«Կա՛մ լեյտենանտն է ստախոսությամբ զբաղված, կա՛մ վարչապետն է սխալ տեղեկություններ հրապարակել»,- նշեց Նորիկյանը։
Զինդատախազությունից ծնողները կփորձեն պարզել՝ արդյո՞ք դիվերսիայի, հակառակորդի ներթափանցման փորձ եղել է, թե ոչ, ողջ մնացած զինծառայողներն այդ օրը որտեղ են եղել, արդյո՞ք իսկապես դեպքի վայրում են եղել, թե ոչ։

Աղբյուր` Փաստինֆո