Փաստ ինֆո

Արցախը 53-րդ օրն է շրջափակման մեջ է։ Բերձորի միջանցքը՝ Արցախի ժողովրդի կյանքի ճանապարհը փակած ազարբայջան սարքովի պետության սարքովի «բնապահպանները», իրականում՝ այս պետության ղեկավարի գիտությամբ և հանձնարարությամբ են փակել ճանապարհը։

Հիշու՞մ եք՝ փաշինյանական հայտնի միտքը՝ «ԼՂ հարցի ցանկացած լուծում պետք է ընդունելի լինի Ադրբեջանի, ԼՂ-ի և Հայաստանի ժողովուրդների համար»։ Դեռ այն ժամանակ 3 կողմից 2-ի համար պոպուլիզմի գագաթնակետ այս միտքը որպես անհեթեթություն ընկալվեց։ Փաշինյանական տարբերակը բացառապես ազարբայջանի համար էր ընդունելի․ քանի որ ՀՀ վարչապետի աթոռին կառչած անձը Հայաստանում ազարբայջանի լիազոր ներկայացուցիչն է, դեսպանը։

Հայաստանն ու Արցախն ի սկզբանե գիտեին՝ եթե մի բան ազարբայջանի համար լավ է լինելու, այն չի կարող լավ լինել Հայաստանի և Արցախի համար։ Ինչն այսօր տեսնում ենք բոլորս։ Ընդ որում, դա անթաքույց և հրապարակային հայտարարվում է ՀՀ կառավարության նիստերում վարչապետի աթոռին նստած անձի կողմից։ Վերջինս Հայաստանի կառավարությունում պարբերաբար ներկայացնում է ազարբայջանի և՛ մոտակա ու հեռահար ծրագրերը, և՛ նրա նպատակները։

Օրինակ՝ ՀՀ ո՞ր տարածքների նկատմամբ են ալիևյան նկրտումները և մինչև ու՞ր կարող են դրանք հասնել, Արցախից Սյունիք, Գեղարքունիք, Սևան ու Երևա՞ն՝ այդ ամենի մասին աշինյանը հայտնում է հանրությանը, շատ ուղղակի ասում է, որ ալիևի վերջնանպատակը Արցախն ու Հայաստանը զավթելն է, հայերի հանդեպ նոր ցեղասպանությունը։ Ասում է, որ հետո մարդիկ չասեն՝ իրենց մեջքի հետևում ինչ-որ բաներ է ծրագրել։

Եվ գիտե՞ք, որն է հետաքրքիրը։ Այս ամենի մասին հայտարարողը չնչին իսկ չի մտածում, թե ինքն ինչու՞ է ալիևի ծրագրերը ՀՀ կառավարության նիստում հայտարարում՝ իր ծրագրերի փոխարեն։ Ի վերջո, այս մարդը ՀՀ վարչապետի աթոռին նստած ադրբեջանի ծրագրերի մասին է շարունակ խոսում՝ ահաբեկելով հայությանը։ Իսկ միգուցե նա այս քաղաքականությանն է դիմում շատ կոնկրետ նպատակներո՞վ։ ՈՒղղակի ցանկանում է մարդկանց վախեցնել, որ ամեն մեկն իր գլխի ճարը տեսնի՞։ Հո պատահական չէ, որ ՀՀ նախագահի աթոռին բազմածն էլ ՀՀ-ն Էստոնիայի հետ է համեմատում, օրինակներ է բերում․․․ Ի դեպ, այդ երկրի քաղաքացիների զգալի մասի տների դռները փակ են, թողել-հեռացել են։

Իսկ ո՞րն է փաշինյանական պատասխանը Արցախի և Հայաստանի քաղաքացիներին ուղղակի կամ անուղղակի՝ հենց իր միջոցով ահաբեկող ալիևին։ Պարզվում է՝ պատասխան չկա, չունի։ Ինչու՞ չունի։ Պարտվել ենք՝ ասում է, թույլ ենք, բանակ չունենք, զենք չունենք, ՀԱՊԿ-ը չի օգնում, դաշնակիցը չի օգնում, խաղաղապահը․․․

Լավ, հարց է ծագում, իսկ դու ո՞վ ես, ինչի համա՞ր ես, եթե նստել ես ՀՀ վարչապետի աթոռին և ոչ մի խնդիր չես կարողանում լուծել։ Չե՞ս կարողանում՝ հրաժարական տուր, գնա, կգա ուրիշը, նա, ով կարող է լուծել վերը նշված խնդիրները․․․

Ասում է՝ ես ինչու պիտի ժողովրդի կողմից ինձ տրված քվեն ուրիշին տամ։ Ես ՀՀ լեգիտիմ վարչապետն եմ, ինձ ընտրել են, ես ժողովրդի ընտրյալն եմ։ Ո՞ր ժողովրդի։ Էն, որոնց ահաբեկում ես, թե՝ բանակ չունենք, զենք չունենք, թույլ ենք, դաշնակից չունենք։ Էն ժողովրդի, որի զավակին զինվոր ես տանում, բայց զորամաս չունես, չես կահավորում զորամասերը, հենակետերը, իսկ բարձունքները թշնամուն ես հանձնում, որ վերևից թիրախավորի նրանց․․․ վրանների տակ ու գոմանման կացարաններում, ճաղերի հետևում ես նրանց պահում՝ մի քանի դար առաջվա վառարաններով ու․․․ 15 զինվոր միանգամից մեռնում է՝ կասկածելի հանգամանքներում։

Իսկ դու՝ լեգիտիմդ վայելքների մեջ ես, քանի որ դու ի սկզբանե եկար խաբեությամբ և կեղծիքով։ Նախ՝ ասացիր Արցախը Հայաստան է և վերջ, իսկ հիմա ասում ու պնդում ես նույնիսկ, թե՝ Արցախը ադրբեջան է․․․ 2020-ի հուլիսին ՀՀ բանակը տարածաշրջանում ամենաուժեղ բանակն էր, դու՝ այդ բանակի գերագույն գլխավոր հրամանատարը․․․ իսկ նոյեմբերին՝ ոչ այլ ինչ, քան՝ լեգիտիմ կապիտուլյանտ․․․

Հիշեցնենք, որ «ԼՂ հարցի ցանկացած լուծում պետք է ընդունելի լինի Ադրբեջանի, ԼՂ-ի և Հայաստանի ժողովուրդների համար» անհեթեթությունը շարունակություն ունի՝ այն է՝ «մենք ստանձնել ենք պատասխանատվություն մեր ժողովուրդների ապագայի համար, ինչը նշանակում է նաև՝ տարածաշրջանի ապագայի համար»։

Այնպես որ, չզարմանաք, եթե առաջիկա ՀՀ կառավարության նիստի ժամանակ առաջին պլան մղվի տարածաշրջանի ապագան։ Մանավանդ, այստեղ ընդհանրապես պատասխանատվության խնդիր չի կարող լինել։

Աղբյուր` Փաստինֆո