Փաստ ինֆո

Կարծում եմ՝ Ադրբեջանի հաջորդ քայլը լինելու է այն, որ ադրբեջանցիները, ովքեր նախկինում բնակվել են Ստեփանակերտի հարակից բնակավայրերում, ասելու են, թե ուզում են վերադառնալ իրենց տները, որտեղ ժամանակին ապրել են: Եթե վաղը նրանք ասեն, թե ուզում ենք վերադառնալ, իբր, իրենց հին բնակավայրերը, ինչպե՞ս են արձագանքելու սրան, ի՞նչ են անելու: «Փաստինֆո»-ի հետ զրույցում ասել է ռազմական փորձագետ Հայկ Նահապետյանը:

Ինչպես հայտնի է՝ ադրբեջանցի կեղծ բնապահպանների խումբն այսօր կրկին սադրանքի է դիմել՝ փակելով Ստեփանակերտ-Գորիս մայրուղին: Արցախը Հայաստանին կապող մայրուղին արդեն շուրջ 10 ժամ է՝ փակ է, ինչի հետևանքով Արցախի 120․000-ից ավելի բնակիչ շրջափակման մեջ է հայտնվել: Նշենք, որ առաջին նման դեպքը եղել էր դեկտեմբերի 3-ին, երբ քաղաքացիական հագուստով մի խումբ ադրբեջանցիներ փակել էին Ստեփանակերտ-Գորիս մայրուղին, որը 3 ժամ անց բացվել էր Արցախի իշխանությունների և ռուս խաղաղապահների բանակցությունների արդյունքում:

Ըստ Հայկ Նահապետյանի՝ Ադրբեջանի նպատակն է արցախահայերի նկատմամբ ճնշում գործադրել, ինչպես նաև ամեն կերպ խոչընդոտներ ստեղծել, որպեսզի Լաչինի միջանցքը բնականոն չգործի.

«Երրորդ՝ փորձում են ռուս խաղաղապահների վրա ճնշում գործադրել: Այսինքն՝ այս մարտահրավերն առաջին հերթին ռուս խաղաղապահներին է ուղղված: Պատահական չէ, որ ռուս խաղաապահ զորախմբի հրամանատար Վոլկովի հետ հանդիպում են պահանջում, կամ Հայաստանում և Ադրբեջանում կոչեր են հնչում Վոլկովի դեմ, այս ամենը մի կենտրոնից կառավարվող պրոցես է»,-ասաց Նահապետյանը:

Նրա դիտարկմամբ՝ Լաչինի միջանցքը այս անգամ էլ կբացվի, բայց նման միջադեպերը պարբերական բնույթ են կրելու: Խնդիրը, ըստ փորձագետի, պետք է լուծեն Հայաստանի և Արցախի քաղաքացիները՝ Սփյուռքի հետ միասին, քանի որ Հայաստանի իշխանությունները վաղուց ձեռքները լվացել են Արցախից, նրանց հետ որևէ հույս կապել պետք չէ:

Հայկ Նահապետյանը դրական է գնահատում արցախցիների բուռն արձագանքը միջադեպին և այսօր Վերածննդի հրապարակում իրականացրած ակցիան.

«Նախորդ դեպքերում ադրբեջանցիների սադրանքները համարժեք արձագանք ստացան Արցախի հայության կողմից, կարծում եմ, այստեղ ոչ այնքան խաղաղապահների, այլ՝ արցախցիների կեցվածքն է ՝ ինչպես են դիմադրելու սադրանքներին, միայն բնակչության համարժեք արձագանքի դեպքում Ադրբեջանը իր սադրանքները կարող է նվազեցնել »,-ասաց Նահապետյանը:

Հարցին՝ հավանական համարո՞ւմ է Լաչինի միջանցքում անցակետի տեղադրումը, ինչի մասին կոմերը պարբերաբար խոսում են՝ Հայկ Նահապետյանն ասաց.

«Չեմ կարծում, որ ռուս խաղապահները իրենց համաձայնությունը կտան դրան:Նոյեմբերի 9-ի եռակողմ համաձայնագրում անցակետի մասին խոսք չկա: Եթե ռուսները համաձայնվեն, կստացվի՝ առաջինն իրենք են խախտում նոյեմբերի 9-ի պայմանավորվածությունը, հակառակ դեպքում միջանցքը կորցնում է իր ստատուսը, այն միջանցք չի լինի, եթե ադրբեջանցիներն այնտեղ անցակետ ունենան »,-ասաց Նահապետյանը:

Աղբյուր` Փաստինֆո