Փաստ ինֆո

Ալիևը երբեք չի կարող անտեսել ԵԱՀԿ Մինսկի խմբի համանախագահ երկրների կարծիքը՝ անկախ իր հայտարարություններից:

Այս երկրներն իրենց քաղաքական շահերն ունեն, ուստի իրենց միջնորդական ներկայությունը պարտադիր է: Ցանկացած կողմ, որը հայտարարում է, թե ԵԱՀԿ Մինսկի խումբ գոյություն չունի, իր դեմ է տրամադրում միաժամանակ երեք երկրների, ինչն էլ հետագայում իր հետևանքներն է ունենում: «Փաստինֆո»-ի հետ զրույցում նման դիտարկում է արել անվտանգության հարցերով փորձագետ Արմեն Մանվելյանը:

Ադրբեջանի նախագահը թեև առիթը բաց չի թողնում հայտարարելու, թե ԵԱՀԿ Մինսկի խումբ այլևս գոյություն չունի, քանի որ ինքը ԼՂ հարցը լուծել է ուժով, բայց մյուս կողմից էլ նա երեկ հանդիպել է ԵԱՀԿ Մինսկի խմբի ԱՄՆ համանախագահ Ֆիլիպ Ռիքերին:
Ըստ էության՝ իր այս քայլով Ալիևը հաստատում է Մինսկի խմբի ձևաչափի գոյության փաստը:

Փորձագետ Արմեն Մանվելյանի խոսքով՝ անկախ Ալիևի հայտարարություններից՝ ԵԱՀԿ Մինսկի խմբի անդամ երկրները շարունակում են հայ-ադրբեջանական հարաբերությունների կարգավորման գործընթացի մասնակիցներ լինել, քանի որ նրանց շահերն անտեսել որևէ երկիր չի կարող.

«Պատերազմում հաղթանակից հետո և Հայաստանի իշխանությունների կողմից խայտառակ կապիտուլացիայի ստորագրումից հետո՝ Ալիևը որոշակի էյֆորիայի մեջ է, իրեն թվում է՝ բոլոր հարցերը լուծել է, ինչն իրականությանը չի համապատասխանում»,-ասաց նա՝ հավելելով, որ Ալիևի այս հայտարարություննն ուղղված է իր ներքին լսարանին.

«Ընդհանրապես, Ալիևի ասածների 90%-ը ներքին լսարանին է ուղղված, սա միանշանակ է, քանի որ նա ռեյտինգի պահպանման խնդիր ունի: Ինքը մի կողմից հայտարարում է, թե ԼՂ հարցը լուծել է, մյուս կողմից էլ պարզ է դառնում, որ խնդրի լուծմանը չի կարողանում հասնել, և ոչ թե այն պատճառով, որ ՀՀ իշխանությունները դիմադրում են, այլ այն պատճառով, որ լուրջ երկրներ են խառնված այս գործընթացի մեջ, ռուս խաղաղապահներ են կանգնած Արցախում: Սա էլ Ադրբեջանի հասարակության մոտ դժգոհություն է առաջացնում, քանի որ ահռելի թվով զոհեր են տվել, հիմա էլ պարզվում է , որ հարցը լուծված չի»,-ասաց Մանվելյանը:

Որքան էլ ՀՀ իշխանությունները պնդեն, թե Ադրբեջանի հետ խաղաղության պայմանագրի կնքումն այս պահին խնդրի միակ լուծումն է, այնուամենայնից, հասարակության մեծ մասը դեմ է այս քաղաքականությանը:

Սրա մասին են վկայում նաև «GALLUP »-ի հերթական հարցման արդյունքները, ըստ որի՝այաստանի իշխանությունների խաղաղության օրակարգին սատարում է բնակչության միայն 14 %-ը, իսկ բնակչության գերակշիռ մասը՝ մոտ 60 %-ը, գտնում է, որ պետք է զինվել ու արձագանքել Ադրբեջանի սադրանքներին:
Արմեն Մանվելյանի մեկնաբանությամբ՝ հասարակությունը, հատկապես սեպտեմբերի սահմանային բախումից հետո, համոզվեց, որ անգամ եթե փաստաթուղթ ստորագրվի Ադրբեջանի հետ, դա որևէ երաշխիք չի լինելու ո՛չ սահմանամերձ բնակավայրերի բնաչության, ո՛չ էլ ՀՀ տարածքի անվտանգության համար.

«Ընդդիմության ակցիաները դրական էին գոնե այն առումով, որ մարդիկ գոնե հասկացել են՝ այսպես կոչված խաղաղության օրակարգը իրականության մեջ նոր կապիտուլյացիայի օրակարգ է, խաղաղության անվան տակ մեզ տանում են քաղաքական և ռազմական կապիտուլացիայի: Սա Նիկոլ Փաշինյանը թաքցնում է «խաղաղության օրակարգ» անվան տակ: Լավ է, որ բնակչության մեծ մասը դեմ է «խաղաղության» անվան տակ կապիտուլյացիայի ստորագրմանը»,-ասաց Մանվելյանը:

Աղբյուր` Փաստինֆո