Փաստ ինֆո

Ադրբեջանը ցանկացած պատրվակով փորձում է փակել Արցախը սնուցող միակ զարկերակը և հումանիտար աղետ առաջացնել այնտեղ: Չեմ բացառում, որ թշնամին կրկին նման քայլի դիմի և փորձի փակել Լաչինի միջանցքը՝ արդեն ավելի երկար ժամանակով: Իսկ երբ ձյուն գա, պատկերացնու՞մ եք՝ ինչ կկատարվի Արցախում: «Փաստինֆո»-ի հետ զրուցում հայտարարել է ռազմական փորձագետ Հայկ Նահապետյանը՝ անդրադառնալով շաբաթ օրը տեղի ունեցած միջադեպին, երբ ադրբեջանցիները անհեթեթ պատճառաբանությամբ շուրջ 3 ժամ փակել էին Հայաստանը և Արցախը կապող միակ ուղին՝ Լաչինի միջանցքը:

Փորձագետը շեշտում է, որ արցախցիներին շրջափակումով չեն կարող վախեցնել, քանի որ նրանք շատ ավելի վատ պայմաններում էլ են ապրել 90-ականներին, բայց դիմադրել, կռվել և հաղթել են.

«Այնուամենայնիվ, պարտությունից հետո հոգեբանական ազդեցություն թողնում է Ադրբեջանի այս քայլը, իսկ եթե Հայաստանի կառույցները համապատասխան կեցվածք չդրսևորեն, ապա Արցախը մենակ է մնալու Ադրբեջանի դեմ: 90-ականներին որքան էլ Արցախը ծանր վիճակում լիներ, բայց Հայաստանը թև ու թիկունք էր, օգնում էր՝ բարոյապես, կամավորաներով, ինչպես նաև դիվանագիտական հարթակում, իսկ հիմա Արցախը թիկունք չունի »,-ասաց Նահապետյանը:

Զրուցակիցը նաև արձանագրում է, որ Արցախի ղեկավարությունն այդ իրավիճակում համարժեք է գործել և արագ արձագանք է տվել Ադրբեջանի սադրանքին, մինչդեռ Հայաստանը որևէ մակարդակով արձագանք չի տվել, ինչը, ըստ Նահապետյանի, կարող է պատճառ հանդիսանալ, որ միջադեպը կրկնվի՝ ավելի մեծ պարբերականությամբ:

Հայկ Նահապետյանը նաև ուշադրությունէ հրավիրում այն հանգամանքի վրա, որ հերթական սադրանքն իրականացնելիս ադրբեջանական 4 միավոր համատեղ են գործել՝ուժային կառույցները, պետական մարմինները, հասարակական բնապահպանակն կազմակերպությունները և ԶԼՄ-ները.

«Այսինքն ՝ 4 օղակ համատեղ գործողություն են իրականացրել, իսկ թե որքա՞նով է հայկական կողմը համարժեք արձագանքել սրան, եթե լրահոսը նայեք, կնկատեք»,-ասաց Նահապետյանը:

Փորձագետի խոսքով՝ Ադրբեջանն իր այս քայլով նաև ստուգում էր, թե ռուս խաղաղապահները ինչ ակտիվությամբ են արձագանքում իրենց քայլերին և ինչքան ժամանակում են կարողանում խոչընդոտը վերացնել.

«Ադրբեջանի ղեկավարությունը շատ լավ հասկանում է, որ քանի ռուս խաղաղապահներն Արցախում են, Արցախի հարցը լուծված չէ և այնտեղ հայերը կշարունակեն մնալ , ուստի խաղաղապահների վարկաբեկման գործընթաց է սկսել Հայաստանի և Արցախի բնակիչների մոտ »,-ասաց նա:

Այսօր հայտնի դարձավ, որ Ադրբեջանի այս հերթական սադրանքին զուգահեռ՝ դեկտեմբերի 1-ին հայկական կողմը ադրբեջանական կողմին է փոխանցել ենթադրաբար Ղարաբաղյան առաջին պատերազմի 10 զոհերի ոսկրեր և 2 քարտեզ, որտեղ նշված են 4 դիակների գտնվելու հնարավոր վայրեր:

Ըստ Նահապետյանի՝ այն, որ հայկական կողմը դիերի մնացորդներ է փոխանցում, սա մարդասիրական քայլ է, բայց Ադրբեջանը երբեք համարժեք չի արձագանքում դրանց.

«Մեր զինվորների դիերը Ջերմուկի դիրքերում են առ ասյօր և ադրբեջանցիները թույլ չեն տալիս մոտենալ ու դիերը վերցնել, արդյո՞ք մեր այս քայլը համարժեք էր Ադրբեջանին, իհարկե՝ ոչ»,-ասաց Նահապետյանը:

Աղբյուր` Փաստինֆո