Փաստ ինֆո

44-օրյա պատերազմից օրեր առաջ՝ սեպտեմբերի 25-ին զորամասի վարչակազմը բերվել է ուժեղացված ռեժիմի։ Կուտակումներ են եղել։ Այս մասին մարտադաշտն ինքնակամ լքելու մեջ մեղադրվող Իշխան Վահանյանի գործով դատական նիստին հայտարարեց վկա Վիգեն Ծատրյանը, որը ծառայել է նշված զորամասում որպես կապի պետ։

«Փաստինֆո»-ի թղթակցի հաղորդմամբ՝ Երևանի ընդհանուր իրավասության դատարանում՝ դատավորբ Ջոն Հայրապետյանի նախագահությամբ, գումարտակի հրամանատար Իշխան Վահանյանի գործով դատական նիստի ընթացքում կապի պետ Ծատրյանը վկայի կարգավիճակով հարցաքննության ընթացքում հայտնեց, որ պատերազմից առաջ մեծ կուտակումներ են եղել, թեև նշեց, որ Ապրիլյան քառօրյա պատերազմի, դրան նախորդող տարիներին ևս կուտակումներ են եղել՝ կրակոցներով, զորավարժությունների ժամանակ ևս եղել են նման կուտակումներ, հետևաբար, չէին կարող ասել՝ պատերազմ կլինի։ Կուտակումների մասին կապավորները զեկուցել են դիվիզիային, նրանք էլ՝ վերադասին։ Վկան հայտնեց, որ ինքը կապի մեջ էր՝ Վարդերեսյանի, ապա՝ կապի դասակի հրամանատար Մուրադյանի հետ, Իշխան Վահանյանի հետ կապ չի հաստատել։

Նշենք, որ Հովհաննես Մուրադյանը կապի դասակի հրամանատարն էր, որը, ըստ քրեական գործի, նահանջի ընթացքում գնացել է սխալ ուղղությամբ, որն արդեն հակառակորդի տիրապետության տակ էր։ Նրա փոխանցմամբ՝ եղել է երկու կապի միջոց՝ գումարտակի հրամանատարի մոտ, մեկը՝ շտաբի պետի մոտ։ Երրորդ կապի միջոցի հետ ինքը երբեք կապ չի հաստատել։ Կապի միջոցները, ըստ վկայի, կարող էին նաև չաշխատել՝ հեռավորության վրա։ Թեև գործով անցնող բոլոր վկաները պնդում էին, որ Խուռհատ սարից նահանջ չեն կարողացել կազմակերպել, զորքը ցաքուցրիվ է եղել, որովհետև կապի միջոց չի եղել, Ծատրյանը վստահեցրեց՝ կապի միջոց բոլորն ունեցել են։ Նախագահողի հարցին՝ եթե Մուրադյանը Խուռհատ սարում զոհվեր, կապի դասակի այլ զինվորներ կկարողանայի՞ն շտաբի պետի հետ կապ հաստատել՝ վկան դրական պատասխանեց՝ նշելով, որ թեև ուսումնական գումարտակ էր, բայց Մուրադյանի անձնակազմը կարող էր։ Իսկ թե երկու ամսվա շարքային զինծառայողի ձեռքում հայտնվեր կապի միջոցը՝ Ծատրյանը նշեց, որ, եթե չէր տիրապետում միջոցին, այն հաճախականությամբ, որը միացվար էր, կարող էր կապ հաստատել։ Ընդ որում, թեև վկան պնդեց, որ բոլորի մոտ ռադիոկապ եղել է, պարզվեց, որ գումարտակի հրամանատարի բացակայության պայմաններում զինծառայողները չեն կարող կապ հաստատել այլ սպայի հետ։ Խուռհատ սարի վրա զինծառայողները հնարավորություն օբյեկտիվորեն չէին կարող կապ հաստատելու այլ անձի հետ՝ բացի Վահանյանից։ Վկան պարզաբանեց, եթե զինծառայողներն իմանային, թե կոնկրետ որ հաճախականության վրա են այլ սպաների ռադիոընդունիչները, կարող էին կապ հաստատել։ Խոսքը 200 հաճախականության մասին է, որից օգտագործվում է միայն 15-ը։ Նախագահողի դիտարկմանը՝ բոլոր ցուցմունքների համաձայն՝ մինչև բանակի հրամանատարություն՝ հրամայել են, որ Խուռհատ սարը պահեն, արդյոք դա չի ենթադրում, որ պետք է ուժեղացված կապ լիներ տվյալ գումարտակի հետ, Ծատրյանը նշեց՝ մինչև հոկտեմբերի 10-ը հուսալի կապը եղել է, կապի խափանումը խուճապից է եղել, վկան նաև չբացառեց, որ հակառակորդը կարող էր ճնշել՝ խափանումներ կատարելով։

Հիշեցնենք, որ Իշխան Վահանյանին մեղադրանք է առաջադրվել ՀՀ քրեական օրենսգրքի 356-րդ հոդվածի (հրամանը չկատարելը) 3-րդ մասով և 380-րդ հոդվածի (մարտադաշտն ինքնակամ լքելը կամ զենքով գործելուց հրաժարվելը) 1-ին մասով: Նրա նկատմամբ որպես խափանման միջոց էր ընտրվել կալանավորումը։ Ըստ ՔԿ-ի՝ Վահանյանը, Ադրբեջանի Հանրապետության կողմից Արցախի Հանրապետության դեմ սանձազերծված ագրեսիվ պատերազմի և 2020թ. սեպտեմբերի 27-ին հայտարարված ռազմական դրության ժամանակ զբաղեցնելով ԱՀ պաշտպանության բանակի զորամասերից մեկի ուսումնական գումարտակի հրամանատարի պաշտոնը, հանդիսանալով իր ենթակա անձնակազմի պետը, մարտական գործողությունների ընթացքում չի կատարել իր անմիջական պետի հրամանը, ինչպես նաև ինքնակամ լքել է մարտադաշտը, որի արդյունքում զորամասի ուսումնական գումարտակի անձնակազմից զոհվել, տարբեր աստիճանի մարմնական վնասվածքներ են ստացել և գերեվարվել պարտադիր ժամկետային զինծառայողներ՝ այդ կերպ առաջացնելով ծանր հետևանքներ: Նշենք, որ այս գործով անցնող միակ մեղադրյալը Իշխան Վահանյանն է։ Քրեական գործն ի սկզբանե մակագրվել էր Սյունիքի մարզի ընդհանուր իրավասության դատարանի դատավոր Լ․ Սեփխանյանին, սակայն հետագայում գործի ընդդատությունը փոխվել է՝ պայմանավորված միջադեպով։ Գործն այժմ Երևանի ընդհանուր իրավասության դատարանի դատավոր Ջոն Հայրապետյանի վարույթում է։

Հեղինակ՝ Իզաբել Սահակյան

Աղբյուր` Փաստինֆո