Փաստ ինֆո

35-ամյա տղամարդը՝ Արմեն Գրիգորյանը, ներողություն է խնդրել բժշկուհուց, որին հարվածել էր՝ «Մուրացան» համալսարանական հիվանդանոցի ընդունարանում։ Բժիշկ Կարինե Թադևոսյանի լիազոր ներկայացուցիչ, փաստաբան Վահագն Ջիվանյանը «Փաստինֆո»-ի հետ զրույցում ասաց, որ Թադևոսյանը հարցաքննվել է, տուժող է ճանաչվել՝ վարույթի շրջանակներում։

Հիշեցնենք, որ նոյեմբերի 15-ին՝ ժամը 20.45-ի սահմաններում՝ «Մուրացան» համալսարանական հիվանդանոցի ընդունարանում 35-ամյա տղամարդը, վիճաբանել էր նույն հիվանդանոցի բժշկուհու հետ, որի ընթացքում բռունցքով հարվածել էր նրա դեմքին, իսկ հաջորդ օրը՝ ժամը 00.35-ի սահմաններում հիվանդանոցի բակում իր ընկերների հետ վիճաբանել է նույն հիվանդանոցի անվտանգության աշխատակցի հետ, որի ընթացքում մի քանի անգամ ձեռքերով հարվածներ են հասցրել վերջինիս՝ պատճառելով մանրմանական վնասվածք։ Նախաձեռնվել է քրեական վարույթ՝ խուլիգանության հատկանիշներով, որի շրջանակներում 35-ամյա տղամարդը ձերբակալվել է։

Փաստաբան Վահագն Ջիվանյանի փոխանցմամբ՝ Կարինե Թադևոսյանը ցուցմունք է տվել միջադեպի հետ կապված, մասնակցել առերեսմանը և տեսանյութի զննությանը։ Մասնավորապես, տղամարդը երեխային բերել էր հետազոտության, դժգոհ լինելով բուժօգնությունից, վիճաբանել է, բժշկուհին միջամտել է՝ փորձելով կարգի հրավիրել, ինչից հետո նրանց միջև է վիճաբանություն եղել, որի ընթացքում 35-ամյա տղամարդը ձեռքով հարվածել է կնոջ դեմքին։

«Ուժեղ հարված էր ստացել բժշկուհին, գլխացավեր ուներ։ Երեկ նշանակվել է դատաբժշկական փորձաքննություն, այսօր ներկայացել է փորձաքննության, որտեղից գործուղել են նյարդաբանի մոտ, քանի որ գլխացավեր ուներ, ենթադրվում է, որ կարող է նաև ուղեղի ցնցում ստանալ»,- նշեց փաստաբանը։

Երեկվա դրությամբ՝ Արմեն Գրիգորյանն ուներ դեռևս ձերբակալվածի կարգավիճակ, ամենայն հավանականությամբ, առերես հարցաքննությունից հետո Գրիգորյանին պետք է մեղադրանք առաջադրվեր, սակայն փաստաբան Ջիվանյանը տեղեկություն չունի՝ արդյոք մեղադրանք արդեն առաջադրվել է, թե ոչ։ Ջիվանյանի փոխանցմամբ՝ Գրիգորյանի և Թադևոսյանի միջև առերեսումից առաջ Գրիգորյանը ներողություն է խնդրել բժշկուհուց՝ ասելով, որ զղջում է կատարվածի համար։

«Բժշկուհուն ասաց, որ զղջում է, ծանր հոգեբանական վիճակի մեջ է եղել՝ անհանգստանալով երեխայի առողջական վիճակի համար, չի տիրապետել իրեն»,- ասաց փաստաբանը։

Զղջման հանգամանքով պայմանավորված կողմերի միջև հնարավոր հաշտեցումը, սակայն, փաստաբանի փոխանցմամբ, վարույթի կարճման հիմք չէ, քանի որ խոսքը հանրային քրեական հետապնդման, այլ ոչ թե՝ բողոքի հիման վրա հետապնդման մասին է և մեղադրանքը խուլիգանության և այլ հոդվածի վերաբերյալ է, ինչը ծանր է։ Նշված դրվագը չի վերաբերում բժշկուհուն, այլ՝ անվտանգության աշխատակցի հետ տեղի ունեցած միջադեպի հետ, ինչից հետո 35-ամյա տղամարդը՝ մի քանի այլ անձանց հետ ծեծի են ենթարկել անվտանգության աշխատակցին։

Բժշկուհու դեմքի արտաքին զննությամբ որևէ վնասվածք չի հայտնաբերվել՝ ոչ քերծվածք, ոչ կապտուկ, ոչ սալջարդ, պարզապես, հարվածը բավականին ուժեղ է եղել, ինչից հետո գլխացավեր կան։ Փաստաբանը հայտնեց, որ, թեև տղամարդը հարվածել էր բժշկուհուն, վերջինս շարունակել էր բուժօգնություն ցուցաբերել երեխային, պատշաճ կերպով հետազոտել։

Իսկ թե ինչ վիճակով էր երեխան տեղափոխվել հիվանդանոց, արդյո՞ք երեխայի վիճակը ծանր էր, փաստաբանը նշեց, որ մանրամասների չի տիրապետում, ձերբակալվածի փոխանցմամբ՝ երեխայի մոտ հաճախակի հազ է եղել։

Հեղինակ՝ Իզաբել Սահակյան

Աղբյուր` Փաստինֆո