Փաստ ինֆո

Իշխանության ներսում կան խնդիրներ, «Պեգասուսը» չէ, որ պետք է այդ մասին ասի։ Այն պահից սկսած, երբ յուրաքանչյուր իշխանություն՝ անկախ իշխանության ձեւից, որակից եւ մարդկանցից, ունենում է կիսելու բան, այդ պահից սկսած իշխանության մեջ խնդիրներ են սկսվում։ Խոսքը իշխանական, ֆինանսական , ադմինիստրատիվ եւ այլ ռեսուրսների մասին է,-«Փաստինֆո»-ի հետ զրույցում կարծիք հայտնեց քաղտեխնոլոգ Կարեն Քոչարյանը՝ անդրադառնալով այն հարցին, թե արդյո՞ք տեղեկությունները, որ իշխանությունները կրկին գործի են դրել գաղտնալսման գործիքը ոչ միայն ընդդիմադիրների, այլեւ յուրայինների շրջանում, խոսում է այն մասին, որ Փաշինյանը վախեցած է եւ իշխանության ներսում լուրջ խնդիրներ կան։

Քաղտեխնոկոգի խոսքով, գաղտնալսման պրակտիկան բոլոր Հայաստաններում է կիրառվել, բայց քանի որ այս իշխանությունը ոչ մի բան չի կարողանում պրոֆեսիոնալ անել, դա էլ չի կարողացել եւ ինֆորմացիան դուրս է եկել։

Հիշեցնենք, որ տեղեկատվական անվտանգության փորձագետները ահազանգել էին, որ Հայաստանի մի շարք քաղաքացիները ստացել են Apple-ից նամակ, որ իրենք դարձել են պետական հաքերների հարձակման զոհ։ Խոսքը մոտ 10 մարդու մասին է, որոնց թվում կան լրագրողներ, բարձրաստիճան պաշտոնյաներ, ընդդիմադիր հայտնի գործիչներ։ Մասնագետները դժվարացել էին նշել, թե խոսքը Հայաստանի հատուկ ծառայությունների, թե Ադրբեջանի ու Թուրքիայի մասին է, բայց փաստ է, որ Pegasus- ը միայն պետական կառույցներին է վաճառվում։ Ավելի վաղ մամուլը գրել էր, որ Նիկոլ Փաշինյանի իշխանությունը 7 մլն դոլար արժողությամբ Pegasus համակարգ է ձեռք բերել եւ դրանով գաղտնալսում է անցանկալիներին։

Վերջին օրերին մամուլը նաեւ գրել էր , որ Փաշինյանը, մրցակից տեսնելով Սուրեն Պապիկյանի մեջ, առիթ է փնտրում նրանից ազատվելու համար՝ նկատի ունենալով ՔՊ-ի ներսում նրա բարձ վարկանիշը

Արդյո՞ք քաղտեխնոլոգի նշած՝ «կիսելու բանը» կարող է նաեւ վարչապետի աթոռը լինել, Կարեն Քոչարյանն ասաց՝ դա չի պնդում, բայց եւ բացառել չի կարող։

Հարցին, արդյո՞ք թիմի ներսում Փաշինյանը մրցակիցներ ունի, քաղտեխնոլոգն արձագանքեց․ «Եթե մենք ռեալ խոսենք, ապա իր թիմի ներսում չկա որեւէ մեկը այն պարզ պատճառով , որ իր թիմում փողոցից եկած տղաներ եւ աղջիկներ են եւ որեւէ մեկը որեւէ փորձ չունի՝ ի տարբերություն, այնուամենայնից, Նիկոլ Փաշինյանի, բայց ինչպես ասում են՝ ախորժակը ուտելիս է բացվում , եւ չի բացառվում, որ թիմի ներսում այդ խնդիրները արդեն բարձրանում են եւ բարձրանում են՝ ոչ միայն իրենց կամքով։ Չեմ բացառում, որ այդ ամենը կարող է լինել նաեւ գեոքաղաքական տարբեր կենտրոնների ներկայացուցիչների խաղերի հետեւանքով»։

Քոչարյանը շեշտում է՝ մենք տեսնում ենք, որ Փաշինյանը գերի է ընկել իր իսկ խոստումներին եւ արտաքին վեկտորների հետ պրոբլեմներ ունի, ուստի բացառված չէ, որ տարբեր կենտրոններում տարբեր որոշումներ են կայացվում։ Հարցին, արդյո՞ք սա նշանակում է, որ տվյալ կենտրոններում կարող է Փաշինյանին փոխելու ցանկություն լինել, Կարեն Քոչարյանն արձագանքեց․«Իհարկե, եւ այդ դեպքում արդեն , մարդիկ են պետք, ում վրա, որ պետք է դրվի այդ կոնը։ Չեմ բացառում, որ դրանցից մեկը Սուրեն Պապիկյանն է կամ Ալեն Սիմոնյանը, երրորդը, օրինակ Արփի Դավոյանը․․․ Հասկանում եք, որ ես հիմա հենց էնպես անուններ եմ տալիս, բայց, որ նման պրոցես կարող է գնալ, չեմ պնդում , բայց գրեթե համոզված եմ»։

Քաղտեխնոլոգի խոսքով՝ նման դիտարկում է անում ՝ ելնելով նաեւ վերջին շրջանում Փաշինյանի հռետորաբանության փոփոխությունից եւ արած հայտարարություններից։

«Մարդը ամիսներ շարունակ ասում էր, որ մինչեւ տարվա վերջը ստորագրելու է, այսպես կոչված, խաղաղության պայմանագիրը, մեկ էլ՝ ցըմփ, ինչպես ինքն էր ասում, փորձում է պատասխանել Ալիեւին»։

Փաշինյանի հռետորաբանության փոփոխությունը Քոչարյանը չի պայմանավորում Հայաստանի ներսում հնարավոր խնդիրներվ, ըստ մասնագետի, Փաշինյանը հասկանում է, որ իր գործողությունների հետեւանքները կարող է դրսում չմարսել, ինչը նրա համար շատ ավելի վտանգավոր է։

«Օրինակ, Ռուսաստանի եւ Իրանի կամ հակառակ ուղղությամբ ստորագրելու դեպքում ՝ ԱՄՆ-ի, ԵՄ-ի կողմից, որովհետեւ այդ երկու փաստաթղթերն այնքան են իրար հակասում, որ դրանցից յուրաքանչյուրի ստորագրումը մյուս կողմի մոտ պրոբլեմներ է բերելու»,-նկատում է քաղտեխնոլոը։

Ինչ վերաբերում է հարցին, թե կհաջողվի՞ արդյոք Փաշինյանին շարունակել խաղալ երկու լարի վրա, Կարեն Քոչարյանն արձագանքեց․«Կարծեւմ եմ՝ դա երկար չի կարող տեւել»։

Աղբյուր` Փաստինֆո