Փաստ ինֆո

Շարքային քաղաքացին կշարունակի հավատալ, որ փրկիչ էր երեկ, մինչեւ այն պահը, երբ կլինի հաջորդ պատերազմական գործողությունը։ Անդրադառնալով ԱՄՆ Կոնգրեսի Ներկայացուցիչների պալատի նախագահ Նենսի Փելոսիի այցելությանը եւ դրանից հայ հասարակության որոշ հատվածի շրջանում ձեւավորված ակնկալիքներին, «Փաստինֆո»-ի հետ զրույցում ասաց քաղտեխնոլոգ Կարեն Քոչարյանը։

Նրա դիտարկմամբ՝ Փելոսին երկու խնդիր էր լուծում իր այցելությամբ։

Առաջին խնդիրը, ըստ քաղտեխնոլոգի, նախընտրական շրջանում ԱՄՆ-ի Դեմոկրատական կուսակցության համար ամերիկահայերի ձայների խնդիրն էր եւ հենց դրանով էր պայմանավորված նրա այցելության էմոցիոնալ ֆոնը, այդ թվում, Հայաստանի դեմոկրատիային աջակցելու հայտարարությունը։ Մյուս խնդիրը, Կարեն Քոչարյանի խոսքով, աշխարհաքաղաքական է, որից, բնականաբար, ԱՄՆ-ը փորձելու է օգտվել։

«Վերջին հարյուր տարվա մեջ առաջին անգամ, այնուամենայնիվ, ստեղծվել է մի իրավիճակ, որ հայ հասարակության մի ստվար զանգվածի մոտ շոշափվում են հակառուսական տրամադրություններ՝ ընդ որում, բավականին լուրջ։ Բնական է, որ ԱՄՆ-ի նման երկիրը դա շատ լավ գիտի, որովհետեւ, ի տարբերություն այլ աշխարհաքաղաքական կենտրոնների, եւ հենց նույն Ռուսաստանի, միշտ պուլսի վրա է պահում ձեռքը եւ փափուկ ուժի կողմնակից է, որը Ռուսաստանն այդպես էլ չսովորեց։ Շոշափելով ու հասկանալով, որ սա առիթ է հայ հասարակության մեջ նախաձեռնությունը վերցնել իր ձեռքը, ԱՄՆ-ը հիմա այդ փորձն է կատարում»,- ասաց քաղտեխնոլոգը՝ հավելելով, որ դժվար է ասել, թե դա գործնականում ինչ արդյունք կարող է տալ։

Կարեն Քոչարյանի խոսքով, ամերիկյան աջակցությունը գործնականում տեսել ենք, բայց ոչ Հայաստանում․ «2003-2012 թվականներիին Ամերիկայից ամեն շաբաթ մի օդանավ փող էր իջնում Վրաստան»։

Անդրադառնալով դիտարկմանը, թե Վրաստանի պարագայում Թուրքիայի եւ Ադրբեջանի խնդիր գոյություն չուներ, մինչդեռ Հայաստանի պարագայում այս երկու երկրների հետ ԱՄՆ-ն ունի շահեր, արդյո՞ք հնարավոր է նույնը ակնկալել Հայաստանի դեպքում, Կարեն Քոչարյանն արձագաքեց՝ այնպես չէ, որ այժմ ԱՄՆ-ի եւ Թուրքիայի շահերը ամբողջությամբ համընկնում են։ «Օրինակ,միայն այն փաստը, որ եկող տարի Թուրքիայում ընտրություններ են, կարելի է օգտագործել։ Սկսած 2016 թվականի զինվորական հեղաշրջումից, որի շահառուն հենց Արեւմուտքն էր, վերջինս ձեռք չի քաշել Էրդողանին Գյուլենով փոխարնելու գաղափարից, Գյուլենը մինչեւ հիմա ԱՄՆ-ում է նստած։ Տեսականորեն հնարավոր է, եթե Միացյալ Նահանգները ցանկանան զենք բերել, կարող են, այնպես,ինչպես պատերազմի օրերին Իսրայելից ու Թուրքիայից զենք էր գնում Ադրբեջան, բայց կբերե՞ն, թե ոչ, սա է խնդիրը։ Ես կասկածում եմ, որ կբերեն»,-նշեց Կարեն Քոչարյանը։

Նա անդրադարձավ նաեւ Գաֆեսճյան արվեստի տանը Փելոսիի՝ հակաիրանյան մեսիջին , շեշտելով․ «Չեմ կարծում, թե Նենսի Փելոսին անգիր գիտեր Դերենիկ Դեմիրճյանի «Վարդանանք» վեպը կամ Խանջյանի «Վարդանանք» նկարը կամ ընդհանրապես, Վարդան Մամիկոնյանի մասին հայտնի պատմվածքը, որի մասին Իրանում ոչ ոք չգիտի։ Պարզ է , որ Փելոսիին հատուկ տարել էին այդտեղ եւ դա կազմակերպել էր հայկական կողմը, սա ուղղակի կասկած չի հարուցում»։ Միեւնույն ժամանակ, քաղտեխնոլոգը նկատեց՝ այսօր աշխատում է պահի շահը ։

«Այս պահին այնպես, չէ, որ Միացյալ Նահանգները շատ դեմ են Իրանի եւ տարածաշրջանում ուժային այլ կենտրոնների հակամարտությանը։ Յուրաքանչյուր կոնֆլիկտից միշտ երրորդ կողմն է շահում, որովհետեւ կոնֆլիկտի երկու կողմն էլ թուլանում են»,-ասաց Կարեն Քոչարյանը։

Ինչ վերաբերվում է Փելոսիի այցի պատմական լինելու վերաբերյալ հայտարարություններին, քաղտեխնոլոգը նկատեց ՝ այցը բովանդակային առումով պատմական չէր, այն պատմական կարող է ընկալվել զուտ անձի առումով, որովհետեւ Հայաստան էր եկել ԱՄՆ-ի երրորդ դեմքը։ Իսկ գործող իշխանությունները, ինչպես ամեն բան, տապալեցին նաեւ այդ այցելությունը՝ թարգմանության հետ կապված խայտառակ դրվագով։ «Այս իշխանությունները ոչ մի բանի ունակ չեն, ինչպես իմ լավ ընկեր Վիգեն Հակոբյանն է ասում՝ Նիկոլ Փաշինյանը սկզբում ձախողեց պատերազմը, հետո՝ խաղաղությունը»։

Աղբյուր` Փաստինֆո