Փաստ ինֆո

Այն, ինչ հիմա կատարվում է Ստեփանակերտի Վերածննդի հրապարակում, «Հանուն Արցախի պաշտպանության» շարժման հետ որևէ առնչություն չունի. հակառակը՝ այն հասարակության մի հատվածին մոլորության մեջ է գցում՝ առաջ քաշվող կեղծ օրակարգերով ու քաղաքական պահանջներով։ Այդ մասին «Փաստինֆո»-ի հետ զրույցում ասաց «Հանուն Արցախի պաշտպանության» շարժման համակարգող խմբի անդամ, Արցախի ԱԺ պատգամավոր Մետաքսե Հակոբյանը։

«Միակ պահանջը, որ դրված է «Հանուն Արցախի պաշտպանության» շարժման հիմքում, ժողովրդական լայն համախմբումն է։ Շարժման պահանջն իշխանությունների հեռացումը չէ, դա քաղաքական պահանջ է։ Այ, երբ իշխանությունները չկատարեն հիմնական պահանջը, այդ ժամանակ միայն կդրվի նաև նրանց հեռացման պահանջը։ Ստեղծված իրավիճակից դուրս գալու միակ ուղին ժողովրդական լայն համախմբումն է, ուրիշ տարբերակ, ցավոք, չկա։ Որքան էլ քաղաքական գործիչները՝ թեկուզ ընդդիմադիր, փորձեն դուրս բերել Հայաստանն ու Արցախը այս վիճակից, չի ստացվելու։ Փորձն արդեն ցույց է տվել դա։ Առավելագույնը, որ կարող են նրանք անել, ընդամենը աղետաբեր քայլերի, գործողությունների ընթացքը դանդաղեցնելն է, բայց կանխել դրանք հնարավոր կլինի, երբ ազգը համախմբվի»,-պնդեց Մետաքսե Հակոբյանը։

Մեր զրուցակցի պնդմամբ՝ քանի դեռ չկան անհատներ, որոնց շուրջ ժողովուրդը կհամախմբվի, միայն գաղափարի շուրջ է հնարավոր դա անել, ինչի համար էլ շարժմանը միացող քաղաքական գործիչները պարտադիր է, որ իրենց կուսակցական շահը թողնեն իրենց գրասենյակներում, որևէ պարագայում չխառնեն ընդհանուր գաղափարին։ Նրա համոզմամբ՝ հայանպաստ որոշումների՝ այդ թվում Արցախի ժողովրդի ինքնորոշման իրավունքի անսակարկելի միջազգային հանրությանը լսելի դարձնելու միակ տարբերակը ժողովրդական պայքարն է.

«Միջազգային հանրությունը չի լսում ժողովրդի պահանջը. քաղաքական ուժերի կողմից ասվածը չի կարող ունենալ այն արդյունքը, ինչ ժողովրդական շարժումը։ Պետք է լինի ժողովրդական լայն համախմբում։ Այլ տարբերակ չենք տեսնում։ Եկեք խոստովանենք, որ անհատական գործունեությամբ չենք կարող որևէ բան փոխել այս իրավիճակում, մի բան էլ՝ հասարակության պառակտումն ավելի է խորանում։ Այնպես որ, հիմա առաջնորդներ պետք չէ փնտրել։ Երբ շարժումը բավականին մեծ թափ հավաքի, առաջնորդներն իրենք իրենց ի հայտ կգան»։

Ըստ Հակոբյանի՝ «Հանուն Արցախի պաշտպանության» շարժումը արդեն իսկ թափ է հավաքել և համակարգող խումբն արդեն 60 անդամ ունի, որոնց անունները շուտով կհրապարկվեն, որպեսզի տարբեր բնակավայրերում ապրող և ստեղծված իրավիճակով մտահոգ մարդիկ կարողանան կապվել, քննարկել անելիքները խորհրդի՝ համեմատաբար մոտ գտնվող անդամի հետ։

«Մենք նախատեսել էինք սեպտեմբերի 16-ից քննարկումներ անցկացնել նաև ՀՀ-ի մեր հայրենակիցների հետ, բայց ադրբեջանական վերջին ռազմական ագրեսիայով պայմանավորված, հետաձգեցինք։ Ամեն դեպքում, հանդիպումները հասարակության տարբեր խմբերի հետ շարունակում ենք և փորձում մարդկանց զերծ պահել կեղծ օրակարգերից, հնարավորինս ճիշտ ու հասկանալի ներկայացնել իրական սպառնալիքները»։

Սեպտեմբերի 14-ին Վերածննդի հրապարակում տեղի ունեցած ինքնաբուխ հավաքը, Մետաքսե Հակոբյանի խոսքով, ԱԺ-ում Նիկոլ Փաշինյանի հնչեցրած վտանգավոր հայտարարությունների արձագանքն էր և համախմբելու մասին կոչեր հնչեցնողները հիմնականում «Հանուն Արցախի պաշտպանության» շարժմանը միացածներն էին։

Երբ սեպտեմբերի 3-ին հայտարարեցինք «Հանուն Արցախի պաշտպանության շարժման» պաշտոնական մեկնարկի մասին, մի շարք մարդիկ անմիջապես հրապարակ եկան ու սկսեցին մարդկանց շեղել իրական օրակարգից, մոլորեցնել։ Այդտեղ գործող հիմնական ուժը «Վաղվա Արցախ» կուսակցությունն է, նրանց պահանջն էլ իշխանության մեջ փոփոխություններ անելն է, բայց ուշագրավն այն է, որ ոչ Նիկոլ Փաշինյանի, ոչ էլ Արայիկ Հարությունյանին ուղղված որևէ քննադատություն նրանք չեն հնչեցնում, այլ քաղաքական պահանջներ են ներկայացնում, թե իրենք ինչ կանեն, եթե իշխանության լինել։ Ավելին, երբ սեպտեմբերի 14-ի ինքնաբուխ հանրահավաքի ժամանակ «Հանուն Արցախի պաշտպանության շարժման» անդամներից փորձեցին հրապարակայնորեն գնահատականներ տալ Փաշինյանի ելույթին, նրանք թույլ չտվեցին։ Քանի որ Ստեփանակերտում միակ մեծ հրապարակը Վերածննդի հրապարակն է, ինքնաբուխ փողոց դուրս եկած մարդիկ՝ այդ թվում մեր շարժման անդամները, հենց Վերածննդի հրապարակ էին գնացել»,-նշեց Հակոբյանը։

Հիշեցնենք, որ սեպտեմբերի 14-ի երեկոյան՝ ՀՀ վարչապետի ԱԺ-ում ունեցած հայտնի ելույթից անմիջապես հետո, որտեղ նա հայտարարեց, որ Ադրբեջանը հրաժարվում է Հայաստանի հետ քննարկել Արցախի կարգավիճակի հարցը, որ իր համար կարմիր գիծը Խորհրդային Հայաստանի տարածքն է եւ որ իր վրա պատասխանատվություն է վերցրել՝ գնալու ծանր որոշումների, տասնյակ հազարավոր մարդիկ փողոց էին դուրս եկել ինչպես Հայաստնում, այնպես էլ ՝ Արցախում։

Աղբյուր` Փաստինֆո