Փաստ ինֆո

Արցախի Ազգային ժողովի 9 հոգանոց պատվիրակության հետ հանդիպումներում ՀՀ իշխող ուժի ներկայացուցիչները վստահեցրել են, որ Արցախի ապագայի հետ կապված որևէ փաստաթուղթ չկա և որ Արցախի ապագան պետք է որոշեն արցախցիները, իսկ ՀՀ իշխանությունները կողջունեն նրանց ցանկացած որոշում։ Այդ մասին «Փաստինֆո»-ի հետ զրույցում ասաց Արցախի ԱԺ «Արդարություն» խմբակցության ղեկավար Դավիթ Գալստյանը, ով նույնպես ընդգրկված էր պատվիրակության կազմում։

«Իշխանական թևի հետ մեր բոլոր հանդիպումներում հարց ենք բարձրացրել, թե Փաշինյանն ինչու է նման հայտարարություն արել և դա արդյո՞ք նշանակում է, որ Արցախն է լինելու այդ ծանր գինը։ Մեզ ասացին, թե այդ հայտարարությունը ճիշտ չի հասկացվել, Արցախի հարցում որևէ փաստաթուղթ չի ստորագրվել, ոչ էլ ստորագրվելու է՝ առանց Արցախի հետ քննարկելու։ Այդուհանդերձ, իմ մտավախությունները չեն վերացել, քանի որ դա ընդամենը բանավոր խոստում էր․ գործնական քայլերով պետք է ապացուցվի այդ ամենը»,-ասաց Գալստյանը։

ՀՀ իշխանությունների պատրաստակամությունը՝ սատար կանգնելու Արցախին, պատգամավորի համոզմամբ, առնվազն ինստիտուցիոնալ սերտ համագործակցությամբ պետք է փաստվի, մինչդեռ Հայաստան-Արցախ հարաբերությունները՝ թե՛ ԱԳ-ների, թե՛ Խորհրդարանների և թե՛ մյուս մարմինների մակարդակով, առնվազն մեկ տարի է՝ ավելի շատ միջազգային գործընկերային հարաբերություններ են հիշեցնում։

«Մենք ասացինք՝ եթե, իրոք, սատար եք կանգնում, ապա նման հարաբերություններն Արցախի ու Հայաստանի միջև, ուղղակի անընդունելի են։ Նրանք ընդունեցին մեր մտահոգությունը, չհակաճառեցին և խոստացան, որ հետայսու ավելի սերտ կլինեն շփումները։ Դրա կարևորությունը շեշտել ենք և՛ ԱԳ նախարարի, և՛ ԱԺ նախագահի, և՛ Վերահափառի հետ հանդիպումներում։ Այս այցով, ի դեպ, մենք ապացուցեցինք, որ Արցախի ապագայի հարցում Արցախի բոլոր ուժերը միասնական են, ու այն կարմիր գծերը, որոնք ամրագրված են նաև ապրիլի 14-ին Արցախի ԱԺ ընդունած հայտարարության մեջ, չպետք է հատվեն՝ անկախ նրանից, թե ՀՀ-ում ով կլինի իշխանության»,-շեշտեց պատգամավորը։

Գալստյանի խոսքով՝ Արցախի ապագայի հարցում ՀՀ ներկա իշխանությունների կողմից կործանարար որոշում ընդունելու մտավախությունն էր, որ Փաշինյանի՝ սեպտեմբերի 14-ին ԱԺ-ում արած հայտարարությունից ժամեր անց Արցախի նախագահին ու խորհրդարանականներին հասցրել է Երևան։
«Որ գիշերով հապճեպ որոշեցինք գալ Երևան, պատճառը Նիկոլ Փաշինյանի Աժ-ում արած հայտարարությունն էր։ Մտավախություն ունեցանք, որ ՀՀ իշխանությունները կարող են գնալ այնպիսի քայլի, որ Արցախի, Հայաստանի ու առհասարակ հայության համար կործանարար կլինի։ Եվ խորհրդարանական բոլոր երեք ուժերի հետ հանդիպումներում էլ ընդգծել ենք, որ այսպես կոչված, «խաղաղության պայմանագիր» լինելու դեպքում, եթե չշեշտվի, որ այդ փաստաթուղթը Արցախի հետ չունի, ապա մեզ համար դա անընդունելի կլինի»,-նշեց Գալստյանը։

Արցախի պատվիրակներին ՀՀ իշխող ուժը վստահեցրել է, որ, այսպես կոչված, «խաղաղության պայմանագրի» տեքստ դեռևս չկա և տեղեկացրել, որ Արցախի հարցի՝ լուծված չլինելու և հետագայում բանակցելու անհրաժեշտության մասին կետ այդ փաստաթղթում ներառելու առաջարկ հայկական կողմը ներկայացրել է, բայց Ադրբեջանը հրաժարվում է ընդունել։

Առանց Արցախի հարցի լուծված չլինելու փաստի արձանագրման, Գալստյանի խոսքով, Ադրբեջանի հետ խաղաղության մասին փաստաթուղթ ստորագրելը անդառնալի հետևանքներ է ունենալու Հայաստանի ու Արցախի համար։ ՀՀ իշխող ուժի ներկայացուցիչներն Արցախի պատվիրակներին, համենայդեպս, վստահեցրել են, թե դա իրենք էլ են գիտակցում, քանի որ արդեն պարզ է, որ Արցախը տալու դեպքում Ադրբեջանն ուզելու է Սյունիքը, հետո Սևանը, հետո՝ Երևանը։

Աղբյուր` Փաստինֆո