Փաստ ինֆո

Իմ տպավորությամբ՝ «միջանցքաբանությունը» Բրյուսելյան հանդիպման ընթացքում հանվել է. Խոսքը գնում է Սյունիքով անցնող ճանապարհների ապաշրջափակման մասին։ Նկատի ունենալով, որ այնտեղ խոսվում է մաքսային և սահմանային ընթացակարգերի մասին, ուստի ենթադրվում է, որ ապաշրջափակվող ճանապարհների դեպքում, ճանապարհները մնալու են տվյալ երկրի իրավասության ներքո, այսինքն՝ միջանցքային տրամաբանություն չկա, սա դրականն է, իսկ բացասականն այն է, որ ընդհանրապես խոսք չեղավ Արցախի ինքնորոշման մասին, իսկ Միշելի հայտարարությունը թե անհրաժեշտ է ապահովել Ղարաբաղի էթնիկ հայ բնակչության իրավունքներին եւ անվտանգությանը, որևէ բան չէր ներկայացնում, որպեսզի ցույց տա, որ անվտանգության հարցին նույնպես անդրադարձել ենք, նման ոչինչ չասող հայտարարություն է արել: «Փաստինֆո»-ի հետ զրույցում հայտարարել է քաղաքական վերլուծաբան Արմեն Բաղդասարյանը՝ ամփոփելով Փաշինյան-Միշել-Ալիև եռակողմ հանդիպման արդյունքները:

Դիտարկմանը, արդյո՞ք Միշելի այս հայտարարությունը չի փաստում, որ հայկական կողմը համաձայնվել է Արցախի կարգավիճակի նշաձողն իջեցնելու հարցում, ինչի մասին խորհրդարանում հայտարարել էր Նիկոլ Փաշինյանը՝ Արմեն Բաղդասարյանն ասաց.
«Հենց դա էլ նշանակում է, կոնկրետ այս դեպքում ԵՄ-ն կամ հավաքական Արևմուտքը մեզ հասկացնում է, որ Արցախի հայ բնակչության հարցում իրենցից ոչ մի ակնկալիք ունենալ պետք չէ, իրենք ընդամենը ինչ-որ մարդասիրական բնույթի հարցեր են բարձրացնելու, բայց՝ ոչ ավելին, անվտանգության ոչ մի երաշխիք իրենք չեն ապահովելու» ,-ասաց Բաղդասարյանը:

Փորձագետի խոսքերով՝ Հայաստանի իշխանությունների պատկերացմամբ՝ գոյություն ունի երկու հարց՝ մեկը Արցախի հարցն է, մյուսն էլ՝ Հայաստանի և Ադրբեջանի միջև հարաբերությունների հարցն է, մեր իշխանությունները Հայաստանի և Ադրբեջանի հարաբերությունների հարցը տեղափոխում են Արևմուտքի տիրույթ, իսկ Արցախի ապագայի և անվտանգության հարցը թողնում են Ռուսական տիրույթում՝ համարելով, որ եթե Ռուսաստանին պետք է, որ Արցախում հայեր ապրեն, ապա թող բարի լինեն, իրենք էլ անվտանգությունն ապահովեն.

«Բոլոր առումներով՝ Հայաստանի իշխանությունները ձեռքերը լվանում են Արցախից, բացի՝ սոցիալ-տնտեսականից, որովհետև միայն այս առումով է, որ Հայաստանն աջակցում է Արցախին, մյուս բոլոր հարցերը թողել են ռուսական տիրույթում»,-ասաց Բաղդասարյանը:
Նկատենք, որ մինչ այս ԵՄ հովանու ներքո կայացած բոլոր եռակողմ հանդիպումներից հետո Նիկոլ Փաշինյանը հեռախոսազրույց էր ունենում ՌԴ նախագահ Պուտինի հետ և տեղեկացնում հանդիպման արդյունքների մասին, սակայն վերջին հանդիպումից հետո նրանց միջև հեռախոսազրույց չի եղել:
Թե ի՞նչ ազդակ է սա, Արմեն Բաղդասարյանը նկատում է.

«Այս անգամ բավարարվել են միայն ԱԳ նախարարների մակարդակով հեռախոսազրույցով, հայկական կողմը կողմն անմիջապես ռուսական կողմին տեղյակ է պահել պայմանավորվածությունների, կամ դա եղել է ռուսական կողմի նախաձեռնությունը»,-ասաց նա:

Հանդիպումից հետո մի շարք միջազգային կազմակերպություններ հանդիպման մասին գնահատականներով են հանդես եկել՝ հիմնականում աջակցելով խաղաղության պայմանագրի շուրջ բանակցություններին:

Իսկ թե ինչպե՞ս է գնահատում միջազգային հանրության արձագանքը՝ բրյուսելյան հանդիպումից հետո,զրուցակիցը նկատում է՝միջազգային հանրության արձագանքը նորմալ է, եթե վերաբերում է Հայաստանի և Ադրբեջանի միջև հարաբերությունների կարգավորմանը, բայց քանի որ այդ հարաբերությունները չեն կարող կարգավորվել առանց Արցախի կարգավիճակի վերաբերյալ հստակ պատկերացումների, իսկ միջազգային արձագանքները դրան չեն անդրադառնում, ապա այդ արձագանքները թերի են:

Աղբյուր` Փաստինֆո