Փաստ ինֆո

«Այսպես շարունակվել, այլևս, չի կարող, պետք է ինչ- որ հանգուցալուծում լինի և՝ հնարավորիս արագ։ Հակառակ պարագայում, ես լուրջ մտահոգություն ունեմ՝ հնարավոր ներքաղաքական բախումների վտանգավոր հեռանկարով, որովհետև օրական հարյուրներով մարդիկ են կալանավորում, չեն էլ նայում՝ մտավորական, ծեր, պատերազմի մասնակից, հաշմանդամ, պատգամավոր և այլն»,- «Փաստինֆո»-ի հետ զրույցում ասել է գրող, դրամատուրգ Գուրգեն Խանջյանը՝ ընդգծելով, որ այսպես շարունակվել այլևս չի կարող

Վերջինս նկատում է՝ ոստիկանական ուժերն այնքան կուրորեն են հարձակվում ժողովրդի վրա, կարծես, ոխերիմ թշնամիների վրա հարձակվեն. «Ոստիկաններ, ձեր մի փոր հացը, որի համար դուք հարձակվում և խոշտանգում եք ձեր հայրենակիցներին, շուտով վերջանալու է, իսկ դուք Երևանի փողոցներում թուրքի կոշիկ մաքրող եք աշխատելու, մի ժամանակ այդպիսի մասնագիտություն է եղել։ Խորհուրդ կտամ հույս չդնել և չտարվել վտանգավոր պատրանքներով, թե շուտով թուրքերի հետ սահմանները կբացվեն և դուք, նրանց հետ առևտուր անելով, ավելի լավ կապրեք։ Դուք կոտրած տաշտակների առաջ եք հայտնվելու։ Բոլորդ ծառայելու եք թուրքին՝ ձեր քաղաքի կենտրոնում։ Մենք բոլորս կդառնանք թուրքին սպասարկող, ինչպես որ Աջարիայում է, ախր աչքներիդ առաջ է, նայեք և կտեսնեք…»,- ասում է դրամատուրգը։

Անդրադառնալով ստեղծագործական հարցերին, Գուրգեն Խանջյանը նշում է՝ գրական նոր ստեղծագործության վրա է աշխատում, որ հայ մնալու և հայի տեսակը պահպանելու մասին է։ Ստեղծագործությունը սկսել է դեռևս հայտնի համավարակից առաջ։ Հետո, վրա հասավ կորոնավարակը, այնուհետև՝ պատերազմը, որոնք, անշուշտ, ներգրավվել են ստեղծագործության մեջ, սակայն, արդեն այսօր, ըստ վերջինիս, ստեղծագործելու և գրականության մասին մտածելու ժամանակը չէ. «Եթե մենք կորցնենք մեր հայրենիքը, էլ ո՞ւմ համար են լինելու իմ ստեղծագործությունները…»,- ասում է գրող, դրամատուրգը։

Մանրամասները՝ տեսանյութում

Աղբյուր` Փաստինֆո