Փաստ ինֆո

Խաղաղ ակցիայի մասնակցած 13-ամյա տղան ներկայացրել է ոստիկանների կողմից իրեն բերման ենթարկելու ոդիսականը, ընդ որում՝ ծիծաղելով պատմելով ոստիկանների ապօրինություններ մասին։

«Երեխեք ջան, ուզում եմ ձեզ էսօր պատմել մի խնդալու պատմության մասին։ Ուրեմն, դուրս ենք գալիս բժշկական համալսարանից, փակում ենք Աբովյան փողոցը, վառում ենք ծխերն ու նստում ենք փողոցի մեջտեղում։ Այդ պահին մեզ են մոտենում կարմիր բերետավորները, դուրս են գալիս ավտոբուսների մեջից ու բերման են ենթարկում ինձ ու իմ ընկերներին»,-պատմում է անչափահաս տղան՝ տեսանյութում։

Վերջինս հավելում է՝ ծիծաղելին այստեղ այն փաստն էր, որ ինքն անչափահաս է և, ըստ գործող օրենքի, չի կարող բերման ենթարկվել. «Իմ ընկերներն էլ էին գոռում՝ ինչի՞ եք իրան բերման ենթարկում, ինքն անչափահաս է, բայց նրանք ուշադրություն չէին դարձնում ընկերներիս բղավոցներին։ Ինձ բռնեցին՝ ոտքերից, մեջքիցս քարշ տալով շպրտեցին ոստիկանական մեքենայի մեջ։ Ես պատկերացնում էի, որ Նիկոլն այդքան վախկոտ է, բայց որ նա, նույնիսկ, 13 տարեկան տղայից կվախենա, ուղեղիս մեջ չէր տեղավորվում»,- ասում է պատանին։

Մյուս ցույցերին կուզենայի իմ փոքր քույրս ու եղբայրս էլ գան, ասում է տղան և հավելում.«Նրանք 4 և 5 տարեկան են, ու պատկերացնում եմ՝ եթե այդ անգամ մի ավտոբուս ոստիկան էին խառնվել, ապա այս անգամ՝ մի ամբողջ ոստիկանական բաժանմունք կխառնվի, որովհետև Նիկոլը, նույնիսկ, նրանցից կվախենա… Չգիտեմ, սենց ահավոր խնդալու բան է եղել էսօր»,- պատմում է խաղաղ ցույցերին մասնակցած պատանին։

Աղբյուր` Փաստինֆո