Փաստ ինֆո

«Ցորի» զորամասի զոհված զինծառայողների հարազատների ներկայացրած հանցագործության մասին հաղորդումը քննության առարկա կդարձվի՝ ԶՈՒ ՊՆ ռազմական վերահսկողական ծառայության նախկին պետ Մովսես Հակոբյանի հայտարարությունների հիման վրա հարուցված քրեական գործի շրջանակներում։ Այս մասին «Փաստինֆո»-ի հետ զրույցում հայտնեցին ՀՀ գլխավոր դատախազությունից։ 

Հիշեցնենք, որ Ցորի զորամասի՝ 44-օրյա պատերազմում զոհված և անհետ կորած զինծառայողների ծնողներն ապրիլի 18-ին հանցագործության մասին հաղորդում են ներկայացրել ՀՀ գլխավոր դատախազություն առ այն, որ Նիկոլ Փաշինյանն է սպանել իրենց որդիներին։ Ծնողները հիմք են ընդունել Նիկոլ Փաշինյանի Ազգային ժողովում հնչեցրած հայտարարությունը՝ «Կարող էինք կանխել պատերազմը, որի արդյունքում կունենայինք նույն վիճակը՝ իհարկե, առանց զոհերի» հայտարարությունը։

ՀՀ գլխավոր դատախազությունից «Փաստինֆո»-ի հետ զրույցում հայտնեցին, որ ՊԲ N զորամասի Դ-20 հրետանային դիվիզիոնի զոհված զինծառայողների հարազատների կողմից ՀՀ գլխավոր դատախազին հասցեագրված հաղորդումն ուղարկվել է ՀՀ հակակոռուպցիոն կոմիտե, այնտեղ ՀՀ քրեական օրենսգրքի 308-րդ հոդվածի 2-րդ մասի հատկանիշներով հարուցված և քննվող քրեական գործին կցելու և համատեղ քննության առարկա դարձնելու նպատակով:

«Երեկ ՀՀ գլխավոր դատախազությունում կայացել է զոհված զինծառայողների հարազատների ընդունելություն և վերոնշյալի վերաբերյալ նրանք տեղեկացված են»,- հայտնեցին դատախազությունից։

Նշենք, որ Հակակոռուպցիոն կոմիտեում քննվում է Մովսես Հակոբյանի մամուլի ասուլիսի հիման վրա հարուցված քրեական գործը՝ ՀՀ քրեական օրենսգրքի 308-րդ հոդվածի 2-րդ մասի հատկանիշներով՝ պաշտոնեական լիազորությունների չարաշահումը, որն անզգուշությամբ առաջացրել է ծանր հետևանքներ: Մամուլի ասուլիսի ընթացքում Մովսես Հակոբյանը հանդես է եկել մի շարք սենսացիոն հայտարարություններով` նշելով, որ այս պատերազմի պարտության հիմնական պատճառը վատ կառավարումն է եղել։

Ըստ նրա՝ 2018թ մայիսից հետո պատերազմող երկրում իրականացվել է զինված ուժերի օպտիմալացում, որի արդյունքում կրճատվել է բանակի մարտավարական հինգ գունդ: Բացի այդ` պատերազմի երրորդ օրը վարչապետը կանգնեցրել է բանակի լրահամալրումը և զորահավաք չի եղել: Անցած 1,5 տարվա ընթացքում Մովսես Հակոբյանի հայտարարությունները չեն հերքվել, ավելին` հաստատվել է, որ իսկապես նրա հայտնած տեղեկությունները համապատասխանում են իրականությանը, քանի որ Մ.Հակոբյանին մեղադրանք է առաջադրվել պետական գաղտնիք հանդիսացող տվյալները հրապարակելու համար, սակայն պատերազմի ընթացքում կառավարումը տապալած, բանակի լրահամալրումը կանգնեցրած Նիկոլ Փաշինյանին մեղադրանք առաջադրելու համարձակություն այս նույն հակակոռուպցիոն կոմիտեն չի ունեցել՝ իր հերթին կատարելով պաշտոնեական մեկ այլ ծանր հանցագործություն՝ ուղղված արդարադատության դեմ։

Աղբյուր` Փաստինֆո