Փաստ ինֆո

Ընդդիմությունն առաջիկայում մեծ թափով վերսկսելու է պայքարը: «Փաստինֆո»-ի հետ զրույցում ՀՀ ԱԺ «Հայաստան» խմբակցության պատգամավոր Ագնեսա Խամոյանը վստահեցրեց, որ չեն սահմանափակվելու ապրիլի 5-ի հանրահավաքով, նոր հանրահավաքներ, բողոքի ակցիաներ կլինեն ինչպես Երևանում, այնպես էլ մարզերում.

«Այս պահին չեմ կարող առաջ ընկնել և հայտարարել, թե որ օրն ինչ է լինելու , բայց վստահեցնում եմ, որ բողոքի ակցիաները շարունակական են լինելու, կլինեն նաև մարզային այցեր»,-ասել է Խամոյանը:

Ինչ վերաբերում է ապրիլի 5-ի ընդդիմության հանրահավաքին՝ Ագնեսա Խամոյանը կարծում է, որ հանրահավաքը իր առջև դրած հիմնական նպատակը կատարել է.

«Մի շարք կարևոր հարցերի պատասխանեց ապրիլի 5-ի հանրահավաքը, հայ ժողովուրդը ցույց տվեց, որ սին են բոլոր այն հայտարարությունները, թե Արցախը հային չի հետաքրքրում, հանրահավաքի ժամանակ հայտարարության տեքստ ընդունվեց, որտեղ սահմանվում են այն կարմիր գծերը, որոնք որևէ իշխանություն անցնել չի կարող։ Ուզում եմ հատուկ ընդգծել, որ սա ընդդիմադիր երկու խմբակցությունների անունից տարածված հայտարարության տեքստ չէր, այլ այն մարդկանց, որոնք ներկա էին հանրահավաքին, նաև նրանց, որոնք ինչ-ինչ պատճառով չէին կարողացել գալ»,-ասել է պատգամավորը:

Նա կարևորեց հատկապես հանրահավաքի մարդաշատությունը.

«Մարդիկ իրենց ներկայությամբ պետք է ցույց տային Հայաստանի իշխանություններին, ինչպես նաև միջազգային հանրությանը, որ այս իշխանությունը չունի նոր զիջումների գնալու մանդատը, հայ ժողովուրդը այդ մանդատն իրենց չի տվել:

Հատկապես վերջին խորհրդարանական ընտրություններից հետո՝ իշխանությունները պնդում են, թե իրենք ունեն մանդատ՝ գնալու այսպես կոչված «խաղաղության համաձայնագրի» կնքմանը, որն անվտանգային նոր խնդիրներ է ստեղծելու Հայաստանի և Արցախի համար, և սպառնում է դառնալ նոր «նոյեմբերի 9-ի փաստաթուղթ», ուստի յուրաքանչյուր քաղաքացու ներկայությունը շատ կարևոր էր, ցույց տալու, որ չունեն այդ մանդատը»,-արձանագրել է պատգամավորը։

Արձագանքելով ընդդիմության հասցեին հաճախ հնչող մեղադրանքներին, որ հանրությունն ամեն անգամ ոտքի է կանգնում, սակայն, որևէ ռեալ գործողություն չտեսնելով, հիասթափվում է, ընդդիմադիր պատգամավորն ասաց.

«Ես ծանոթ եմ այդ ձևակերպումներին, բայց, կարծում եմ, որ մենք կարող ենք հաջողության հասնել միայն համազգային համախմբմամբ, շատ կարևոր է, որ Հանրապետության հրապարակում լինեն ոչ միայն 15-20 հազար քաղաքացի, այլ այդ թիվը շարունակաբար մեծանա և պահանջը դառնա ողջ հայ ժողովրդի պահանջը, այդ դեպքում մենք վստահաբար հաջողության հասնելու ենք, մենք պետք է կարողանանք ամեն հավաք ավելի մարդաշատ դարձնել և ցույց տալ այս իշխանություններին, որ իրենք նոր զիջումների գնալու մանդատ չունեն»:
Հարցին՝ հաշվի առնելով Նիկոլ Փաշինյանի «համառությունը» արդյո՞ք հանրահավաքների միջոցով իշխանափոխության հնարավո՞ր է հասնել, Խամոյանն ասաց՝ համառ պայքար է պետք դրա համար.

«Այն, որ Նիկոլ Փաշինյանը հեշտ հրաժարական չի տալու, դա ընդդիմադիր յուրաքանչյուր քաղաքացի գիտակցում է, դրա համար պետք է լինի համառ պայքար, այն պետք է լինի շարունակական և որ ամենակարևորն է՝ միասնական, միայն այս դեպքում մենք կարող ենք հաջողել»,-նշել է մեր զրուցակիցը:

Աղբյուր` Փաստինֆո