Փաստ ինֆո

Սյունիքի մարզի ընդհանուր իրավասության դատարանի դատավոր Բորիս Բախշիյանի վերաբերյալ քրեական գործի շրջանակներում ԱԱԾ-ում հարցաքննվել է նաև Նիկոլ Փաշինյանի աջակից Նվեր Մկրտչյանի փաստաբան Յուրա Ավայանը, թեև օրենքով արգելվում է փաստաբանին որպես վկա հարցաքննել այն հանգամանքների վերաբերյալ, որոնք նրան հայտնի են դարձել իրավաբանական օգնություն ցույց տալու կամ իրեն դիմելու կապակցությամբ:

Ինչպես արդեն տեղեկացրել ենք՝ դատավոր Բորիս Բախշիյանի նկատմամբ քրեական հետապնդում իրականացվում է Նիկոլ Փաշինյանի աջակից Նվեր Մկրտչյանին կալանավորելու որոշում կայացնելու համար, ըստ նախաքննական մարմնի վարկածի, Մկրտչյանի կալանավորումն ակնհայտ ապօրինի է, մինչդեռ, ամբաստանյալն ինքը չէր ներկայացել դատական նիստին՝ դրսևորելով ոչ պատշաճ վարքագիծ։ Բացի այդ՝ վարույթն իրականացնող մարմինը որպես ծանր հետևանք է դիտարկում այն հանգամանքը, որ ամբաստանյալ Մկրտչյանի կալանավորումից հետո «Գորիս» ՔԿՀ-ում իբրև ազդեցություն է գործադրվել վերջինիս նկատմամբ, ինչով հարկադրել են փոխել ցուցմունքը։

Իսկ թե ինչ կապ ունի դատավոր Բախշիյանի կայացրած որոշումը՝ ՔԿՀ-ում Մկրտչյանի նկատմամբ հնարավոր ազդեցության հետ՝ դատավորի պաշտպան Արսեն Սարդարյանը նկատեց՝ այդ երևույթներն իրարից անկախ են, դատավորի գործողությունները պայմանավորված են եղել Նվեր Մկրտչյանի պաշտպանի գրությամբ, որում ուղղակիորեն նշվել է, որ Մկրտչյանը հրաժարվում է դատական նիստին ներկայանալ։

«Այսինքն, գործ ունենք ոչ թե զուտ առանց հարգելի պատճառի նիստին չներկայանալու երևույթի հետ, այլ՝ ուղղակի հրաժարվելու ինստիտուտի հետ և դա է պատճառը, որ դատավորը դա ընդունել է որպես ստորագրությունը՝ չհեռանալու մասին խափանման միջոցի կարգի ուղղակի խախտում և, ղեկավարվելով Քրեական դատավարության համապատասխան հոդվածներով, հետագա պատշաճ վարքագիծն ապահովելու համար կալանքի է վերցրել։ Պատրանք ստեղծելն անթույլատրելի է, այդ դեպքում պետք է նաև պաշտպան Ավայանին մեղադրանք առաջադրել, որովհետև հետագայում պարզվել է, որ Ավայանն է մոլորության մեջ գցել Նվեր Մկրտչյանին»,- «Փաստինֆո»-ի հարցին ի պատասխան ասաց փաստաբան Արսեն Սարդարյանը՝ հավելելով, որ որոշակի տվյալներ կան, որ «Գորիս» ՔԿՀ-ում հայտնվելուց հետո Նվեր Մկրտչյանով հետաքրքրվել են առերևույթ հանցավոր ենթամշակույթ ունեցող անձինք։ Դա տեղի է ունեցել կալանավորումից 3-4 օր անց, հետևաբար, ողջամտորեն արդեն 4 օր ՔԿՀ-ում մնալուց հետո քրեական հեղինակությունները կիմանային։

Բացի այդ՝ ՔԿՀ-ում պետք է ապահովվի անձանց անվտանգությունը, փաստաբանը հիշեցրեց անգամ ձևավորված պրակտիկան, որ կալանավորման հիմքերից բացի նշվում էր նաև անձի անվտանգությունն ապահովելու անհրաժեշտության մասին, որովհետև պետության հատուկ վերահսկողության ներքո խիստ մեկուսացված պայմաններում անձը պահվում է։

«Տրամաբանությունը բռնության է ենթարկվում, երբ դատախազը փորձում է պատրանք ստեղծել, որ տարել են ՔԿՀ՝ ճնշելու համար։ Այս միտքն ընկալելի չէ իրավաբանի համար, սա հասարակության լայն զանգվածներին մանիպուլյացիայի ենթարկելու ուղղակի գործիք է»,- նշեց Սարդարյանը։

Պարզվում է նաև, որ քրեական գործով հարցաքննվել է նաև փաստաբան Յուրա Ավայանը, ինչը Սարդարյանի գնահատմամբ, նույնպես խնդիր է, որովհետև Ավայանը՝ որպես փաստաբան խախտել է նաև քրեական դատավարության պահանջները, որ չի կարող իր վստահորդի վերաբերյալ հարցաքննվել։ Բացի այդ՝ վերջինիս ցուցմունքներում փաստաբան Արսեն Սարդարյանը միտում է նկատում, ըստ նրա՝ Ավայանը փորձել է ինչ-որ գույներ ավելացնել։

«Օրինակ, ասում է՝ երբ Նվեր Մկրտչյանն ինձ ասեց՝ գրավ միջնորդենք, ասեցի՝ բայց խի գրավ միջնորդենք, իմաստ ունի՞, նոր է կալանավորել, հետո, երբ գրավ կիրառվեց, այնպես զարմացա։ Փորձում է գույներ տալ այն պայմաններում, որ դատախազն է տվել հանցագործության մասին հաղորդումը։ Հաջորդ դատական նիստին՝ դեկտեմբերի 17-ին նոր փաստական տվյալ է ձեռք բերվել, փաստաթուղթ՝ Նվեր Մկրտչյանի ստորագրությամբ, որ իր պաշտպանն իրեն մոլորեցրել է, միջոցներ է պետք ձեռնարկել։ Դրանից հետո դատավորը հարցադրումներ է տվել, համոզվել, որ պաշտպանն է մոլորեցրել, ոչ թե՝ ինքն է հրաժարվել»,- նշեց Սարդարյանը՝ հավելելով, որ պետք չէ «նեղվածություն»-ը դարձնել գունավոր ցուցմունք, օրենքին հակառակ ցուցմունք տալ, անթույլատրելի է։

Քրեական գործով հարցաքննվել են նաև դատավոր Բորիս Բախշիյանի աշխատակազմի աշխատակիցները՝ դատավորի օգնականը և գործավարը։

Հիշեցնենք, որ Սյունիքի մարզի ընդհանուր իրավասության դատարանի դատավոր (լիազորությունները կասեցված են) Բորիս Բախշիյանի նկատմամբ քրեական հետապնդում է իրականացվում՝ Մանվել Փարամազյանի դեմ ցուցմունք տված Նիկոլ Փաշինյանի աջակցին կալանավորելու համար, թեև ամբաստանյալն ինքն էր դրսևորել ոչ պատշաճ վարքագիծ՝ չներկայանալով դատական նիստերին։ Ընդ որում՝ դատախազությունը չի բողոքարկել տվյալ որոշումը և առանց բողոքարկման՝ դատական ակտը կայացնելուց ամիսներ անց դատավորի նկատմամբ քրեական հետապնդում է նախաձեռնել։ Դատավորին մեղադրանք է առաջադրվել ՀՀ քրեական օրենսգրքի 348-րդ հոդվածի 3-րդ մասով՝ անձին ապօրինի կալանավորելու հատկանիշներով, որն առաջացրել է ծանր հետևանք։ Քրեական գործի շրջանակներում ԱԱԾ-ն միջնորդություն է ներկայացրել դատարան՝ դատավորի նկատմամբ կալանավորումը որպես խափանման միջոց ընտրելու մասին, որը փետրվարի 7-ին դատավոր Դավիթ Արղամանյանի կողմից բավարարվել է։

Հեղինակ՝ Իզաբել Սահակյան

Աղբյուր` Փաստինֆո