Փաստ ինֆո

Վարդենիսում ընդդիմադիր «Ահարոն Խաչատրյան» և «Միասնական Վարդենիս» խմբակցությունները մարտի 16-ին ավագանու արտահերթ նիստ գումարելու նախաձեռնությամբ են հանդես եկել: Արտահերթ նիստի օրակարգում լինելու է համայնքապետի ընտրության հարցը: «Փաստինֆո»-ին այս մասին հայտնեց Գեղամասար համայնքի ղեկավար Հակոբ Ավետյանը:

Մեզ հետ զրույցում Հակոբ Ավետյանը մանրամասնեց, որ եթե անգամ իշխող «Քաղաքացիական պայմանագիր» խմբակցությունը չներկայանա նիստին, միևնույնն է՝ ընդդիմության ձայները բավարար են արտահերթ նիստ գումարելու և համայնքապետ ընտրելու համար.

«Դիմել ենք համայնքապետարանի աշխատակազմին, որ մարտի 16-ին՝ ժամը 11-ին արտահերթ նիստ գումարվի՝ համայնքապետի ընտրության օրակարգով:Խոստացել են, պետք է թողնեն, որ ընտրությունները նորմալ անցնեն: Եթե իրավապահ մարմինները չխոչընդոտեն , պետք է, որ ամեն ինչ նորմալ ընթանա, համայնքապետ ընտրվի: Առանց ՔՊ-ի էլ ընդդիմությունը կարող է քվորում ապահովել, նիստ գումարել ու համայնքապետ ընտրել»,-ասաց Ավետյանը:

Հիշեցնենք, որ դեկտեմբերի 5-ի ՏԻՄ ընտրություններից մինչ օրս Վարդենիսը համայնքապետ չունի, թեեւ ընդդիմությունն այստեղ ունի մեծամասնություն. «Քաղաքացիական պայմանագիր»-ը ստացել էր 13 մանդատ, «Ահարոն Խաչատրյան» դաշինքը՝ 10, «Միասնական Վարդենիս»-ը՝ 4 մանդատ։ Ընդդիմադիր ուժերն ընտրություններից հետո կոալիցիա կազմելու հուշագիր էին ստորագրել, եւ մանդատների քանակն արդեն բավարարում էր համայնքապետ ընտրելու համար, սակայն ՔՊ-ն տապալում է համայնքի կառավարումը։

Վարդենիսի ավագանու դեկտեմբերի 30-ի նիստում ընդդիմադիր «Ահարոն Խաչատրյան» և «Միասնական Վարդենիս» խմբակցությունները համայնքապետ էին ընտրել Ահարոն Խաչատրյանին, իսկ ՔՊ-ն շտապեց դիմել դատարան՝պահանջելով չեղյալ համարել ավագանու անդրանիկ նիստը, որի ժամանակ համայնքապետ էր ընտրվել ընդդիմության թեկնածուն: Դատարանը մասնակի բավարարել էր ՔՊ-ի հայցը՝ անվավեր ճանաչելով Վարդենիս համայնքի ղեկավար ընտրելու որոշումը, իսկ ընտրությունների արդյունքները թողել անփոփոխ։

Աղբյուր` Փաստինֆո