Փաստ ինֆո

Ես ճի՞շտ եմ հասկանում, Դուք ընդունո՞ւմ եք, որ նորմը հակասահմանադրական է։ «Փաստինֆո»-ի թղթակցի հաղորդմամբ՝ կորոնավիրուսի դեմ պարտադիր պատվաստման կամ սեփական միջոցներով թեստ հանձնելու մասին ՀՀ առողջապահության նախարարի հրամանի սահմանադրականության հարցի քննության ժամանակ այս մասին հայտարարեց ՍԴ դատավոր Հրայր Թովմասյանը՝ դիմելով ԱԺ ներկայացուցիչ Մերի Մոսինյանին։

Ինչպես արդեն տեղեկացրել ենք՝ ՍԴ-ն նշված հրամանի սահմանադրականության հարցը բարձրացրել է ԱԺ «Հայաստան» խմբակցությունը։ Զեկուցող դատավոր է Էդգար Շաթիրյանը։

ԱԺ ներկայացուցիչ Մերի Մոսինյանը ներկայացրեց դիմումի վերաբերյալ պատասխանը, ինչից հետո ՍԴ դատավոր Հրայր Թովմասյանը Մոսինյանից հետաքրքրվեց, թե ինչպե՞ս է վերջինս ընկալում նորմը, որով սահմանվում է անձանց շրջանակ, որոնք չեն ենթարկվել նախնական պարբերական բժշկական զննության, ինչպես նաև՝ եթե ախտորոշվել է կառավարության կողմից սահմանված հիվանդություններից մեկը, ապա տեսչական մարմնի համապատասխան տարածքային ստորաբաժանման մարմնի որոշմամբ՝ մինչև սահմանված կարգով բժշկական զննության ենթարկվելը կամ առողջանալը, թույլ չեն տալիս աշխատել։

«Ուզում եմ, որ ռեալ իրականությունում Դուք պարզաբանեք, թե տեսչական մարմինը 500.000 մարդու պարագայում ինչպե՞ս է որոշումը կայացնում։ Մարդը գնաց աշխատանքի, թեստը չունի, ի՞նչ է լինում դրանից հետո, տեսչական մարմնում քանի մարդ կա, ով է տեղեկացնում, ինչպես է որոշումը կայացվում, ապա՝ այն փոխանցվում, ինչպես է որոշումը կայացվում, որ անձին թույլ չտան գնա աշխատանքի»,- նշեց Թովմասյանը՝ դիմելով Մոսինյանին, ինչին ի պատասխան վերջինս նշեց, որ նորմը չի վերաբերում բոլոր աշխատողներին, դա առանձին մասնագիտությունների հետ կապված պարտադիր բժշկական զննության պահանջն է։

ԱԺ ներկայացուցչի պատասխանը զարմացրեց Հրայր Թովմասյանին. «Դու՞ք ասացիք, որ սա չի վերաբերում բոլորին, այլ՝ վերաբերում է միայն առանձին խմբերին, մինչդեռ ռեալ իրականությունում մենք տեսնում ենք, որ նախարարի հրամանը վերաբերում է բոլոր աշխատողներին։ Ես ճի՞շտ եմ հասկանում, որ նախարարի համար նման պարտավորություն սահմանելու օրենսդրական հիմքը չկար՞։ Դուք դա՞ եք արձանագրում, ընդունու՞մ եք, որ նորմը հակասահմանադրական է»։

Շարունակելով հարցադրումները՝ Թովմասյանն ընդգծեց, որ եթե տվյալ հոդվածը վերաբերում է բացառապես աշխատակիցներին, արդյո՞ք կարող ենք արձանագրել, որ համաճարակի պայմաններում միայն աշխատողներով սահմանափակվելը չի կարող արդյունավետ լինել, որովհետև ամբողջ շղթան չփակելու դեպքում, օրինակ՝ 350.000 դպրոցական և ուսանող, վարակը տարածվելու է, ինչին ի պատասխան Մոսինյանը կարճ պատասխանեց՝ «Այո»։

ՍԴ դատավոր Արևիկ Պետրոսյանն էլ նկատեց՝ ըստ ՍԴ ներկայացված փաստաթղթի՝ Մոսինյանին որպես ԱԺ ներկայացուցիչ լիազորագիր տրվել է երեկ, ուստի, դատավորը հետաքրքրվեց՝ արդյո՞ք Մոսինյանն ավելի վաղ ծանոթացել էր գործի նյութերին, թե միայն երեկ է հասցրել ծանոթանալ, ինչին ի պատասխան ԱԺ ներկայացուցիչն ասաց, որ նյութերին ծանոթացել է երեկ՝ մինչև ուշ գիշեր։

Հեղինակ՝ Իզաբել Սահակյան

Աղբյուր` Փաստինֆո