Փաստ ինֆո

Նիկոլ Փաշինյանը խուսափում է պատասխանել՝ Սոչիում և Բրյուսելում կայանալիք Հայաստանի ու Ադրբեջանի ղեկավարների հանդիպման ժամանակ ի՞նչ են ստորագրելու, ի՞նչ են քննարկելու: Այս մասին ասուլիսի ժամանակ հայտարարեց ՀՀ ՊՆ նախկին փոխնախարար Արտակ Զաքարյանը.

«Մի կարճ, պրոզաիկ պատասխան եղավ, որ ինչ-որ հանձնաժողով են ստեղծելու, որպեսզի սկսեն սահմանազատման և սահմանագծման աշխատանքները, և վերջ։ Այդպես չի լինում, սա աշխարհաքաղաքական պրոցես է: Եվ եթե միայն դա է Հայաստանին վերապահված, ուրեմն Հայաստանը՝ ի դեմս կապիտուլյանտի, օգտագործվում է այլ պետությունների շահերի կողմից: Եթե Նիկոլն ասում է, որ մեզանից հասնում է գնալ և ընդամենը հանձնաժողով ստեղծել ու գալ, դա նշանակում է՝ ՀՀ պաշտոնական շրջանակները, պաշտոնական Երևանն այլևս գոյություն չունի»,- ասաց Զաքարյանը և հավելեց, որ հիմա էլ Փաշինյանը փորձում է մեղքը բարդել եռակողմ հանձնաժողովների վրա՝ քողարկելով հանգամանքը, որ Հայաստանը բանակցային գործընթացքում այլևս ասելիք և անելիք չունի:

Բանախոսն, անդրադառնալով Նիկոլ Փաշինյանի հայտարարությանը, թե միլիմետրի ճշտությամբ գիտեն՝ որտեղով է անցնում ՀՀ սահմանները, հարց բարձրացրեց՝ այս դեպքում ի՞նչ բանակցություններ են վարում, ի՞նչ հանձնաժողով է ստեղծվում:

Արտակ Զաքարյանը շեշտեց, որ Հայաստանը հարկադրանքի ներքո չպետք է գնա սահմանազատման և սահմանագծման.

«Պետք է պայման դնել՝ մինչև մեր տարածքները չդեօկուպացվեն, մինչև թշնամու զորքը դուրս չգա մեր տարածքից, ոչ մի միջազգային օրակարգի մեջ չենք մտնելու»,-եզրափակեղ Զաքարյանը։

Աղբյուր` Փաստինֆո