Փաստ ինֆո

Երևանի ընդհանուր իրավասության դատարանը՝ դատավոր Մեսրոպ Մակյանի նախագահությամբ, կքննարկի «Նորքի զինված խմբի» գործով ամբաստանյալ Վահան Շիրխանյանի մասով գործից մաս անջատելու հարցը՝ պայմանավորված նրա առողջական խնդրով։ Այսօր կայացած դատական նիստին այդ հարցը չքննարկվեց՝ ամբաստանյալ Նելլի Մինասյանի բացակայության պատճառով։ Դատարանը հետագայում կարող է քննարկել նաև Նելլի Մինասյանի խափանման միջոցի փոփոխման հարցը, եթե Մինասյանը շարունակի չներկայանալ դատական նիստերին։ 

Նշենք, որ քրեական գործով ամբաստանյալներն են՝ Արթուր Վարդանյանը, Անտոն Թոթոնջյանը, Վահան Շիրխանյանը. Գառնիկ Մարգարյանը, Վլադիմիր Առաքելյանը, Խաչիկ Ավետիսյանը, Ավետիս Բարեյանը, Վաղինակ Ստեփանյանը, Արթուր Եղիազարյանը, Վահագն Սալնազարյանը, Արման Հայրապետյանը, Էդվարդ Ներսիսյանը, Հարություն Սարիբեկյանը, Ասյա Մկրտչյանը, Տիգրան Բոյաջյանը, Գևորգ Ջնդոյանը, Մարինե Կաթանյանը, Նելլի Մինասյանը։

Այսօր կայացած դատական նիստին չէր ներկայացել Վահան Շիրխանյանը, որը կաթված է ստացել և արդեն տևական ժամանակ է գտնվում է բժիշկների հսկողության ներքո և ամբաստանյալ Նելլի Մինասյանի, որը դատարան չի ներկայացել անհարգելի պատճառով։ Ընդ որում՝ դատական նիստը սկսվել է սահմանված ժամից 30 րոպե ուշացումով, քանի որ դատարանը փորձում էր պարզել Մինասյանի բացակայության պատճառները և վերջինիս գտնվելու վայրը։ Հատկանշական է, որ նախորդ դատական նիստերին Մինասյանը ևս չէր ներկայացել, ինչի հիմքով նախագահող դատավորը որոշում էր կայացրել՝ նրա նկատմամբ հարկադրանքի միջոց կիրառելու և դատարան ներկայացնելու համար բերման ենթարկելու մասին։ Դատավոր Մեսրոպ Մակյանը հայտնեց, որ Մինասյանի բնակության վայրով ուղարկել են համապատասխան որոշումը, սակայն մեկ-երկու օր առաջ գրություն է ստացվել, որ Մինասյանը Սյունիքի մարզում նշված հասցեում չի բնակվում, դատարանին է փոխանցվել նրա Երևանի բնակության հասցեն և հեռախոսահամարը։ Հաշվի առնելով այն հանգամանքը, որ ժամանակահատվածը կարճ էր և ծանուցումը չէր կարող հասնել մեկ-երկու օրում, դատարանի հանձնարարությամբ աշխատակազմի աշխատակիցները երեկ կապ են հաստատել Մինասյանի հետ, տեղեկացրել են այսօրվա դատական նիստի մասին, վերջինս պարտավորվել էր ներկայանալ դատական նիստին, սակայն անհայտ պատճառներով չէր ներկայացել, իսկ հեռախոսահամարն էլ անհասանելի դարձել։

«Իհարկե միջոցներ կձեռնարկեք նրան հետագայում հայտնաբերելու համար, բայց խնդրում եմ իմ անունից փոխանցել, որ այս վարքագիծը շարունակելու դեպքում մեկ վայրկյան անգամ չեմ վարանի նրա խափանման միջոցը փոխելու հարցում, որովհետև այս աղջկա վարքագիծը տանում է նրան, որ սկսել է դատական նիստերին չգալ, բերման ենթարկելու հետ կապված արդեն հիմնական բնակության վայրը չենք կարողանում պարզել, անընդհատ փոփոխում է»,- նշեց նախագահող դատավոր Մեսրոպ Մակյանը։

Այսօրվա դատական նիստին դատարանը պետք է քննարկման առարկա դարձներ Վահան Շիրխանյանի առողջական վիճակով պայմանավորված գործից մաս անջատելու հարցը, քանի որ Շիրխանյանը տևական ժամանակ չի կարող մասնակցել նիստերին, իսկ նրա բացակայությամբ պայմանավորված մյուս ամբաստանյալների մասով քննությունը չի շարունակվում։ Այդ հարցն այսօր, սակայն, քննարկման առարկա չդարձվեց՝ ամբաստանյալ Նելլի Մինասյանի բացակայության հիմքով։

Շիրխանյանի պաշտպան Հայկ Ալումյանը հայտնեց, որ Վահան Շիրխանյանի առողջական վիճակում փոփոխություն չկա, դրական դինամիկան դանդաղ է։ Պաշտպանը դատարան ներկայացրեց համապատասխան փաստաթղթեր՝ նրա առողջական վիճակի վերաբերյալ, որը կփոխանցվի դատավարության կողմերին՝ հաջորդ դատական նիստին քրեական գործից Շիրխանյանի մասով մաս անջատելու կամ Շիրխանյանի առողջական վիճակը պարզելու համար փորձաքննություն նշանակելու հարցը քննարկելու համար։

Ինչ վերաբերում է Նելլի Մինասյանի բացակայությանը, դատարանը, նկատի ունենալով, որ Մինասյանը ծանուցվել է հեռախոսազանգի միջոցով, դատարանն այս անգամ չկիրառեց հարկադրանքի միջոց։

Դատական նիստը հետաձգվեց՝ ամբաստանյալի բացակայության հիմքով։

Հիշեցնենք, որ ըստ մեղադրանքի Արթուր Վարդանյանը 2015թ. ապրիլից գտնվելով Հայաստանի Հանրապետության տարածքում, ստեղծել ու ղեկավարել է ՀՀ քաղաքացիներից կազմված հանցավոր համագործակցություն, կազմակերպված խմբի կազմում ապօրինի կերպով ձեռք է բերել,պահել, փոխադրել և կրել մեծ քանակությամբ զենք, ռազմամթերք, պայթուցիկ նյութեր, պայթուցիկ սարքեր` նպատակ ունենալով Հայաստանի Հանրապետությունում իշխանությունը յուրացնել, այսինքն` զավթել` բռնություն գործադրելու կամ բռնություն գործադրելու սպառնալիքով, ինչը ավարտին չի հասցվել նրա կամքից անկախ հանգամանքներում, քանի որ հանցավոր համագործակցության մեջ ներգրավված անձինք բացահայտվել ու 2015թ. նոյեմբերի 25-ին վնասազերծվել են Հայաստանի Հանրապետության ազգային անվտանգության ծառայության աշխատակիցների կողմից: Քրեական գործը դատարանում է գտնվում 2016 թվականի նոյեմբերից։

Հեղինակ՝ Իզաբել Սահակյան

Աղբյուր` Փաստինֆո