Փաստ ինֆո

Թուրքիայի ակտիվացումը տարածաշրջանում անհանգստացնող է: Պանթուրքիզմի գաղափարախոսությունը, որը կարծես թե մեռյալ գաղափար էր արդեն դարձել, նորից դրան կենդանություն է տրվում Թուրքիայի կողմից՝ նրա վերադարձով տարածաշրջան: «Փաստինֆո»-ի հետ զրույցում ասաց ՀՀ ԳԱԱ պատմության ինստիտուտի տնօրեն, պատմաբան Աշոտ Մելքոնյանը՝ հավելելով, որ սրան ի պատասխան, հայկական կողմը փորձում է հարմարվել նոր իրավիճակին.

«Ցանկացած կայսրություն, հատկապես՝ արևելյան, ժամանակ առ ժամանակ փորձում է վերադառնալ Սպարտայի ժամանակներին և ծավալապաշտական նկրտումներ է բերում օրակարգ, նույնը մենք հիմա տեսնում ենք Թուրքիայի պարագայում: Ես կարծում եմ, որ ի վերջո այդ քաղաքականությունը կարող է հանգեցնել տարածաշրջանի բազմաթիվ ուժերի հակազդեցության»,-ասաց Մելքոնյանը:

Պատմաբանի գնահատմամբ՝ Թուրքիայի նկրտումների արդյունքում Հայաստանը տնտեսական կախվածության մեջ կլինի Թուրքիայից, ինչպես նաև կփոփոխվի Հայաստանի ժողովրդագրական կազմը՝ ի վնաս հայ ժողովրդի

«Ինչպես գիտեք, թուրքական ծագմամբ բնակչություն այսօր Հայաստանում չկա, Արցախյան շարժման բովում Հայաստանը էթնիկապես մաքրվել էր, իսկ հիմա տնտեսական զարգացման և ճանապարհների բացվելու արդյունքում այստեղ կարող են նորից թուրքեր հայտնվել, ինչը մենք տեսել ենք Վրաստանի պարագայում»,-ասաց Մելքոնյանը:
Պատմաբանը միևնույն ժամանակ նկատեց, որ հայկական կողմից որևէ լուրջ հակազդեցություն չի նկատել Թուրքիայի նկրտումներին, բացի որոշ հայտարարություններից.

«Կարծում եմ Հայաստանի ղեկավարությունը պետք է հստակ հայտարարի, որ Թուրքիայի նման նկրտումները ամենևին չեն ողջունվում Հայաստանի ղեկավարության կողմից, որովհետև դրանք միակողմանի հարվածելու են Հայաստանի շահերին»,-ասաց Աշոտ Մելքոնյանը:
Հիշեցնենք, որ վերջերս Կառավարության նիստի ժամանակ Նիկոլ Փաշինյանը հայտարարել էր, թե Թուրքիայի կողմից դրական ազդակներ կան և հայկական կողմը պետք է գնահատի այդ ազդակները:
Թե ի՞նչ ազդակների մասին է խոսքը՝ հարցին ի պատասխան Ա.Մելքոնյանը նշեց, որ հավանաբար հայկական կողմի հետ որոշակի համաձայնություն է ձեռք բերվել միջանցքի և ճանապարհների ապաշրջափակման հարցում, ինչին ի պատասխան Թուրքիան կարող է դրական ազդակներ տալ.

«Չեմ կարող հստակ ասել՝ խոսքն ինչ մասին է, բայց երբ Թուրքիան և Ադրբեջանն իրենց ծրագրերն առաջ են մղում, մասնավորապես՝ Նախիջևանի միջանցքի հետ կապված, բնականաբար, դրության տերը դառնալով, կարող է և դրական ազդակներ հնչեցնել, որոնք մեզ համար չեն կարող համարվել դրական, եթե խոսքը դրա մասին է, որ միջանցքի հետ կապված համաձայնություն է ձեռք բերվել, դրան համապատասխան Թուրքիան կարող է դրական ազդակներ հնչեցնել, բայց այդ ազդակները, իմ կարծիքով, մեզ համար դրական չեն: Կարծում եմ խոսքը նաև ճանապարհները ապաշրջափակման մասին է, որը ևս մեզ համար նպաստավոր չէ»,-ասաց Աշոտ Մելքոնյանը:

Աղբյուր` Փաստինֆո