Փաստ ինֆո

Նիկոլ Փաշինյանի կողմից առերևույթ պետական դավաճանություն կատարելու փաստի առթիվ հանցագործության մասին հաղորդում ներկայացնելուց հետո փաստաբան, «Հոկտեմբերի 27»-ի գործով նախկին դատախազ Հակոբ Մարտիրոսյանի որդուն, որը քննիչ էր, ստիպել են աշխատանքից ազատվել։ Այս մասին դատախազության անգործության դեմ ներկայացված բողոքի քննության ընթացքում ասաց փաստաբան Հակոբ Մարտիրոսյանը։

Ինչպես արդեն տեղեկացրել ենք՝ Հակոբ Մարտիրոսյանը դեռևս հունիս ամսին հանցագործության մասին հաղորդում էր ներկայացրել՝ պահանջելով քրեական գործ հարուցել Նիկոլ Փաշինյանի կողմից կատարված առերևույթ պետական դավաճանության փաստի առթիվ։

Ներկայացված հանցագործության մասին հաղորդմամբ Հակոբ Մարտիրոսյանը ներկայացրել է փաստական հանգամանքներ, որոնք առերևույթ վկայում են Նիկոլ Փաշինյանի կողմից թշնամի պետությանն օգուտ տալու մասին՝ ի վնաս ՀՀ-ի։

Ներկայացված հանցագործության մասին հաղորդումն առանձին քննության առարկա չի դարձվել, մասնավորապես, դատախազությունը հաղորդումը «մասնատել» է և մի մասով ուղարկել է ԱԱԾ քննչական դեպարտամենտ՝ Շուշիի անկման և Արցախի հարավային ուղղությամբ կատարված իրադարձությունների վերաբերյալ քրեական գործի, իսկ մի մասով՝ ՀՔԾ-ում քննվող՝ Մովսես Հակոբյանի կողմից ասուլիսում արված հայտարարությունների առթիվ հարուցված քրեական գործի շրջանակներում։

Դատախազության կողմից հաղորդմանը պատշաճ կարգով ընթացք չտալու հանգամանքը դիտարկվել է որպես անգործություն և դատախազության անգործության դեմ փաստաբանը բողոք է ներկայացրել դատարան։

«Փաստինֆո»-ի հաղորդմամբ՝ Երևանի ընդհանուր իրավասության դատարանում՝ դատավոր Կարեն Ֆարխոյանի նախագահությամբ, մեկնարկել է փաստաբանի կողմից ներկայացված հանցագործության մասին հաղորդման քննությունը, որին ներկա է նաև «Հայաստան» դաշինքի անդամ, ՀՅԴ ԳՄ անդամ Արծվիկ Մինասյանը։ Հանցագործության մասին հաղորդումը ներկայացվել է Արծվիկ Մինասյանի հետ համատեղ։

Փաստաբան Հակոբ Մարտիրոսյանը նշեց, որ ներկայացված հանցագործության մասին հաղորդումն առ այսօր չի քննվել, ապա ներկայացնելով բողոքի նախապատմությունը և հանցագործության մասին հաղորդման կարճ բովանդակությունն ընդգծեց, որ. «2020թ սեպտեմբերի 27-ից մինչև 2020թ նոյեմբերի 9-ն ընկած ժամանակահատվածում ՀՀ վարչապետի պաշտոնը զբաղեցրած անձը՝ Նիկոլ Փաշինյանը, ուղղակի դիտավորությամբ կատարել է արարքներ, որով օգնել է Ադրբեջանի Հանրապետությանը, որ վերջինիս կողմից Արցախի Հանրապետության դեմ իրականացված թշնամական գործունեության արդյունքում Ադրբեջանի վերահսկողության ներքո վերադառնա հայկական ԶՈՒ-երի կողմից նախկինում ազատագրված Արցախի տարածքային ամբողջականության մաս կազմած տարածքներ, այդ թվում՝ Հադրութի շրջանը և Շուշի քաղաքը, ինչը պաշտոնապես ամրագրվել է 2020թ նոյեմբերի 9-ին Ադրբեջանի Հանրապետության և ՌԴ նախագահների և ՀՀ վարչապետ Նիկոլ Փաշինյանի ստորագրած հայտարարությամբ։

Այսինքն՝ Նիկոլ Փաշինյանն առերևույթ կատարել է առանձնապես ծանր հանցագործություն՝ պետական դավաճանություն։ Բացի այդ՝ Նիկոլ Փաշինյանը, ՀՀ Սահմանադրությամբ և օրենսդրությամբ լիազորված չլինելով առանց ՀՀ ԱԺ վավերացման և առանց ՍԴ եզրակացության կնքելու միջազգային պայմանագիր, ստորագրել է Միջազգային պայմանագրերի իրավունքի մասին ՄԱԿ կոնվենցիայով և Միջազգային պայմանագրերի մասին օրենքով՝ որպես միջազգային պայմանագիր գնահատվող հայտարարություն»։

«Եթե միջազգային համաձայնագիր է, ապա այն պարտադիր կարգով պետք է ստանա ՍԴ եզրակացությունը, որից հետո պետք է ԱԺ համապատասխան ընթացակարգն անցներ, ինչը չի կատարվել։ Այս խնդիրները շղարշով ներկայացնելու պատճառաբանությունից ելնելով և հայ հանրությանը մոլորության մեջ գցելու միտումով ներկայացնում է որպես թուղթ։ Ասում է՝ դա համաձայնագիր չէ։ Այս պայմանագիրն այս ճանապարհով շրջանցելու արդյունքում ունեցել ենք այն, ինչ ունենք այսօր։

Ավելին՝ համապատասխան պայմանագրի արդյունքում, ԶԼՄ-ների համաձայն՝ այս դեպքից հետո ունեցել ենք 66 զոհ։ Ընդամենը երկու օր առաջ սահմանին ունեցանք երեք զոհ և վիրավորներ, կարծես թե, այդպես էլ պետք է լինի, կարծես թե սովորական երևույթ է դարձել հանրության մեջ։ Ի վերջո՝ սրա համար ո՞վ պետք է պատասխան տա։ Դրա համար էլ միջազգային պայմանագիրը ներկայացվում է որպես թուղթ։ Դե եթե թուղթ է, ուրեմն, ըստ հեղինակի, նման կարծիք արտահայտողի  տրամաբանությամբ՝ ուրեմն նշանակում է, որ այս զոհերն էլ հենց այսպես էն էլի»,-նշեց Մարտիրոսյանը՝ ընդգծելով, որ Նիկոլ Փաշինյանն առերևույթ կատարել է հանցագործություն՝ ՀՀ ՔՕ 309-րդ հոդվածով նախատեսված։

Հակոբ Մարտիրոսյանն ընդգծեց, որ հանցագործության մասին հաղորդում ներկայացնելը պայմանավորված չէ որևէ քաղաքական ուժի հետ համագործակցությամբ, դա անձնական դիրքորոշում է, իսկ Արծվիկ Մինասյանի հետ համագործակցությունը պայմանավորված է եղել ընդհանուր աշխարհայացքով, ուստի, որևէ մեկը թող փորձ չկատարի բողոքի բովանդակությունը քաղաքականացնել։

Հեղինակ՝ Իզաբել Սահակյան

Աղբյուր` Փաստինֆո