Փաստ ինֆո

Շուշիից կրակոցներ միշտ էլ լինում են, բայց վերջին օրերին ինտենսիվացել են: Այս մասին «Փաստինֆո»-ի հետ զրույցում ասաց Արցախի ԱԺ պատգամավոր Մետաքսե Հակոբյանը:

«2-3 օր է անընդհատ կրակոցներ կան Շուշիի կողմից, դա ոչ թե իշխանությունների տված ինֆորմացիան է, այլ մենք ինքներս ենք լսում այդ կրակոցների ձայները:

Հատկապես երեկոյան, երբ խաղաղ է, մարդիկ կրակոցները իրենց տներում լսում են: Նախկինում եզակի դեպքեր էին լինում, երբ միայն սահմանին մոտ գտնվողներն էին լսում, բայց հիմա մենք արդեն Ստեփանակերտում ենք լսում, դա նշանակում է, որ կրակոցները շատ են: Ոչ միայն Շուշիի կողմից, Մարտունու կողմից էլ է եղել»,-ասաց Մետաքսե Հակոբյանը՝ նշելով, որ նախքան պատերազմը շփման գծում տեղի ունեցող կրակոցները լսելի չեն եղել, քանի որ սահմանը շատ հեռու էր, հիմա բոլորն են սահմանին մոտ բնակվում:

«Փաստացի, հիմա Արցախում չկա բնակավայր, որից մի քանի մետրի վրա թշնամի տեղակայված չլինի»,- արձանագրել է պատգամավորը։

Ըստ նրա՝ բանակցություններից առաջ հակառակորդը մշտապես սահմանային լարվածություն է ստեղծում: Նախկինում եւս, երբ պետք է բանակցություններ սկսվեին, ադրբեջանական կողմը ոգևորվում էր, հիմա ավելի ագրեսիվ է դարձել, որովհետև հաղթողի և թելադրողի կարգավիճակում է:

«Այն փաստաթուղթը, որի մասին անընդհատ Ադրբեջանը խոսում է, իսկ հայկական կողմը լռում, կա՝ այսպես կոչված խաղաղության պայմանագիրը: Ես վստահ եմ, որ սա Ալիևի և Նիկոլ Փաշինյանի պայմանավորվածությունների շարունակությունն է, որովհետև Ադրբեջանի նախագահը վերջերս անընդհատ ասում էր, որ իրենց պայմանավորվածությունները հերթով կատարվում են: Այն սցենարը, որ միասին կազմել են, իր տրամաբանական շարունակությունն է ստանում, և մնալու է ավարտը՝ խաղաղության պայմանագրի ձևով:Այսօր Արցախի հարցը քիչ է շոշափվում, խնդիրը Հայաստանի սուվերեն այն տարածքներն են, որոնք Ադրբեջանն ակնկալում է ստանալ:

Նիկոլ Փաշինյանն ինչպես Արցախի դեպքում արեց՝ իր ասելով 30 հազար զինվորի կյանք փրկելու համար հանձնեց Արցախը,նույն սցենարով Հայաստանի դեպքում է անելու՝ նոր փաստաթուղթ կստորագրի՝ ասելով, թե ուղղակի փրկեց Հայաստանը»,-ասաց Մետաքսե Հակոբյանը՝ արձանագրելով, որ ողջ ժողովրդով մասնակից ենք դառնում Նիկոլ Փաշինյանի գործողություններին և լեգիտիմացնում դրանք։

«Միայն խոսում ենք, բայց որևէ գործողություն չենք անում: Խոսողներս քիչ ենք, իսկ իշխանությունն իրենց ձեռքին է, ինչ ուզում, անում են: Ցավոք, այս պատերազմում հաղթեց Նիկոլ Փաշինյանն իր թիմով: Իրենք այստեղ են հոխորտում, Ալիևն էլ ստիպում է, որ իր բոլոր պահանջները կատարվեն:Համոզված եղեք, որ սա երկար չի տևելու, ոչ ավել, քան երկու ամիս»,-ասաց նա:

Աղբյուր` Փաստինֆո